كرونيك#الظل

#الظل_الحلقة 90

الحلقة 90:كان فالمكتب نتاعو جالس بكل شموخ أخيرا حس بالراحة هاذا هو مكانو و هذي هي خدمتو لي يعشقها صحيح مهمتو مزالت طويلة في قضية بلمختاري لكن على الأقل تهنا من الخدمة فذاك القصر رغم أنو رجع عليه بالفايدة و قدر يجمع عدة أدلة و قدر بفضلو يعرف أنو عدوه عندو طفلة راح يشفي غليلو منها تذكر مريم وراح فكرو لصباح لما شافها بذاك المنظر كانت كيف حورية خارجة من أحد الأساطير منظرها و هي مبلولة سلبلو عقلو و خلاه هابل عليها يحمد ربي أنو قدر يتحكم في روحو و يخرج قبل لا يعمل كارثة
بقى مرة يخدم مرة يفكر فيها و كل ما جي لبالو يقول زعمة وش راهي دير دوك زعمة تكون تستنا فيا و لا نسات أمري خلاص مافاق من سرحتو غير وقت دخلت سهيلة و هي تتكلم بكلام مفهموش
وقفت عند راسو و تكلمت:شوف خلاص أنا قعدة فذاك لقصر منزيدش نقعد كرهتو و كرهت سكانو.
حط ستيلو من يدو وشاف فيها بملل :و علاه كشما عملتلك فضيلة هاذ المرة.
-قعدت على الكرسي المقابل تكات بمرفقها على البيرو لا أصلا هذيك الذيبة من يوم عمل ولدها ذيك العملة في مريم مزادتش بانت.
-زير على ستيلو بين يديه حتى تكسر و هو موش جايب خبر كل ما يتذكر أنو هذاك الرخيس لمس مريم يهبل في مخو و يحب يروح يعطيه طريحة أكبر من الأولى و المشكل مش عارف علاه فطن من سرحتو و قالها إذا مش فضيلة لزاعجاتك مالا شكون.
-مريم يا يونس مريم الطفلة لبارح خليتها راقدة فالسرير غبت عليها ساعة جيت ملقيتهاش حوست عليها قلبت عليها لقصر و ريحتها مكانش راني خايفة كشما يكونو دارولها الطفلة نية و ضعيفة متقدرلهمش و متقدرش على شرهم .
-شاف فيها و قال بكل ثقة مريم عندي أنا تزوجتها.
-سكتت سهيلة شوي و بعدها طرطقت بالضحك هههههههههههههه و الله و عليك وحد لحكايات يا يونس شافتو ساكت و يخزر ليها بنظرات صارمة حبست ضحكتها و قالت حبس حبس متقوليش درتها بصحك آآآآآع راحت ليه تجري حضناتو و بدات تبوس فيه و هي ميتة بالفرحة يعني مريم عندك و هي بخير مهيش عند المسمامة نتاع نصيرة الحمد لله طمنتني بصح فهمني كيفاه حتى تزوجتو ووين و أنا علاه مسمعتش على هاذ الجملة دخل مروان مصدوم:شكون لي تزوج متقوليش
شافت فيه سهيلة قاطعاتو و الضحكة مرسومة على شفايفها إيه هو السبع نتاعنا تزوج بلا ميخبر صحابو شفت كيفاه نكر العشرة .
راح ليه مروان يجري خبطو على كتفو و الله و درتها قبلي مالا ليوم فيها عشا
شافت فيه سهيلة و قالت عيب يا مروان خلي الطفل مزال عريس .
و أنا وش قلت يخي طلبت غير لعشا مطلبتش لعروس.
-بقا يشوف فيهم يثرثرو فوق راسو حس بالندم أنو خبرهم دوك ما يحبسوش و يبقاو في كل دقيقة مكسرينلو راسو.
-وعى على صوت سهيلة و هي تسأل فيه بصح كيفاه حتى تزوجتو
- ضحك في سرو عليها هاذوين فاقت لالة :نصيرة و بنتها جاوني البارح و قالولي وش رايك تستر على مريم و أنا وافقت
- شافت فيه سهيلة بشك و انت غير قالولك هكذا قبلت هاذي متدخلش للعقل.
-و علاش لالا حسيت بلي الطفلة مظلومة قلت خلي نربح فيها ربي و نسترها.
-تكلم مروان و لحكاية مش داخلة مخو:سامحني صاحبي بصح لحكاية محبتش تدخل مخي.
-هز الفيستة نتاعو لبسها و جا واقف تكلم بكل غش:لي عندي قلتو و انتوما تصدقو و لا تكذبو هذيك حاجتكم خرج و طربق عليهم الباب خلاهم يشوفو في بعضهم حايرين في عصبيتو.