كرونيك#الظل

#الظل_الحلقة 42

الحلقة42:خرجت من الشركة و هي فاشلة ليوم تلقات أقوى صفعة في حياتها صفعة خلاتها تفيق على بزاف حوايج مع خرجت شافت سيارة خوها قارات و هبط منو زربت تخبات قبل ميشوفها علابالها لوكان يشوفها هنا متفراش معندها حتى مبرر لجيتها حتى هند متخدمش هنا ،بعدما شافتو دخل تنفست الصعداء وراحت تجري.
-في مكتب سي لهادي دخلت السكرتيرة و خبراتو بلي هشام ولد خوه وصل قالها دخليه و جيبيلنا زوج قهاوي.
-دخل هشام سلم على عمو و جلس مقابلو.
-علابالي راك تقول واش يحوس مني عمي كل مرة ،كيما تعرف يا بني أنت و أختك راكم مش ولاد خويا برك لا راكم ولادي و أمانة المرحوم حاب نموت و أنا مطمن عليكم الله يخليك يا بني خمم فيها مليح مستحيل ندير حاجة لتضرك و تضر أختك ممكن أنت مش حاب تتزوج بهند لكن ميساء سقسيتها على رايها بلاك راهي قابلة بلاك راهي حابة ترتبط بوليد و أنت حرمتها من هاذ الشيء متكونش أناني يا بني و خمم بعقلك قبل قلبك.
-سكت هشام ملقا ميقول مهما يكون هذا عمو و ميقدرش يحشمو لكن في نفس الوقت ميقدرش يتزوج بهند ميقدرش يتخيل روحو معاها على نفس الفراش يتنفسو نفس الهواء الفكرة برك خلاتو يتخنق فمابالك أنو يعيشها.
-رايك على العين و الراس يا عمي إذا على ميساء نوعدك إذا كانت موافقة على وليد مراحش نوقف في وجها أما على زواجي من هند سامحني يا عمي بنتك منحملها ما تحملني منقدرش ندير هاذ الشيء.
-خسارة يا هشام خسارة و أنا قلت مراحش تكسر بخاطري.
-تنفس هشام بعمق هاذ الشيء واعر عليه أنك تتزوج إنسان متحملوش و مستراحش ليه حاجة مش ساهلة مش عشرة نتاع يوم و لا يومين لا لا راهي عشرة عمر و راح يكون فيها ولاد آه يا عمي فاه حطيتني يعني لازم نتزوج ببنتك بعدها و كأنو تفكر حاجة بنتو نسيت بلي عمي و لا عندو زوج بنات كيفاه نسيتك يامريم كيفاه و الله و جيتي في وقتك .
-تكلم بصوت جاد:بما أنك مصر يا عمي على هاذ الزواج فأنا موافق لكن...مخلاهش لهادي يكمل من الفرحة و أخيرا .
-الحمدلله يا بني هذا هو هشام لي نعرفو لميحشمش عمو تعرف و الله ما راح تلقى كيما هند راهي بنتي و مربيها على يدي ..قاطعو هشام.
-لا ياعمي أنا مقصدتش هند أنا راغب في مريم يخي هي ثاني بنتك و هند و لا مريم عندك كيف كيف.