كرونيك#الظل

#الظل_الحلقة 153

الحلقة 153:فات شهر كامل على ذاك النهار
-لهادي قدر يرجع شوي من الخسائر لي تسببت فيهم هند لكنو مزال مغيوض و متقلق منها رغم أنو كاين جانب فيه ساعات يحن و يقولو سامحها لكن لما يتذكر كلامها لي قالتولو يرجع يقسي قلبو...بحثو على وفاء محبسش لكن كانو يحوس على ابرة وسط كومة قش.
-نصيرة طول الشهر و هي على أعصابها غشها كامل رجعاتو فالخدامة نتاع لقصر توحشت هند و مقدرتش تصبر على فراقها مهما دير و مهما تعمل لكن في النهاية تبقى بنتها لي عملت كل شي باش تشوفها فرحانة ديما تعيطلها و تحاول تتواصل معاها لكن نفس النتيجة تقفل في وجها الخط...بقات تروح و تجي على المحقق بخصوص يونس لكن لا جديد يذكر و هاذ الشي موترها و مخليها تبات تكوبس.
-وليد شهر كامل و هو على أعصابو بينو و بين نفسو عارف أنو غالط و عارف أنو الشي لي قالتو ميساء صحيح لكن مش قادر يصدق مش ثقة في والديه لا لانو لو ظهر حكيها صحيح راح يعرف أنو خلاص خسرها نهائيا و معندوش أمل يرجعلها.
- في الجهة الاخرى ميساء خرجت من المستشفى هي و أمها و حاليا راهي في فترة نقاهة امها لما عرفت بمرضها دارت مناحة و قريب رجعت انتكست حالتها كانت طول الوقت مسكرة البيت على روحها و تبكي شوية من لوعة الفراق و شوية من ظلمو ليها.
-فيروز كانت تحاول تمثل أنها قوية و تجاوزت الازمة لكن النار لي داخلها مستحيل تطفى تضحك قدامهم فالنهار لكن فالليل ما ترقد غير بعدما تبل وسادتها بدموعها.
-وفاء بقات في دارها متخرجش منها خلاص خصوصا بعدما نبها يونس على هاذ الشي كان ديما يزورها و يخفف عليها وحدتها ديما تحاولو و تترجاه يبات عندها لكنو فكل مرة يرفض طبعا على خاطر مريم.
-عند عصافير الحب لي حبهم تفتح و ازهر على جديد كانو يعيشو أحلى أيامهم هاذ الحب لي خفف شوية من آلامهم و كان كيف البلسم لجروحهم هند لقات في هشام العايلة لي خسرتها لقات فيه السند و ماسح جروحها لقات معاه الراحة و السعادة لي طول عمرها تحوس عليها كانت الفرحة مالية عينيها كيف لا وحب حياتها اخيرا حن عليها و حس بحبها لكن رغم هاذا كاين وجيعة في قلبها متقدرش تمحيها توحشت عايلتها توحشت والديها ودارهم عارفة انهم غالطين و غلطة كبيرة بزاف بصح وش دير مهما كان يبقاو أهلها زيد على هاذا الوجيعة لي في راسها محبتش تخف و صارت مقلقتها و محيرتها.
-أما هشام فماكانش مصدق الشي لي قاعد يعيشو حبو لهند لي كان من سابع المستحيلات صار ليوم حقيقة صار يعشقها و كلمة عشق قليلة في حقها في شهر برك قدر يعوض روحو و يعوضها سنين من الضياع كان حبهم كل يوم يزيد يكبر أكثر و أكثر خصوصا لما لمس جسدها أول مرة و من ذاك ليوم صارلو ادمان ميفوتش ليلو بلا سهرة حمراء ينصهرو فيها قلوبهم قبل أجسادهم لكنو فنفس الوقت متحير على أمو و أختو عارف بلي يخبيو عليه في وجيعتهم قلبو يتقطع عليهم لما يفوت كل ليلة على غرفهم و يسمع بكاهم يحس روحو عاجز مشلول و هو مش قادر يعمللهم حاجة هاذ الشي خلى نار الحقد تكبر أكثر و أكثر في قلبو و حلف أنو يدمر لهادي وين قدر يحكم عليه بعض الادلة لي تدينو لكنو يستنى في إشارة من يونس.
-يونس و مريم هاذ الزوج لي الحب قتلهم و عذبهم لاطاقو البعد ولا حملو القرب شهر مر عليهم كيف الكابوس ...من ذاك اليوم المشؤوم صار غايب عليها ما تشوفو غير وقت يرجع في وقت متأخر من الليل تبقى مغمضة عينيها تستنى فيه يقرب يلمسها و يلعبلها بشعرها كيما كان يعمل لكن حتى هاذي حرمها منها يبقى يتفرج فيها من بعيد بعدها يتنهد ويدخل لبيتو غير يقفل الباب تفتح عينيها لي يقطرو بالدموع دموع الوحش و القهر دموع العشق لي نهار جرباتو ما ذاقت منو غير المر ايه هي حباتو و عشقاتو عشقت كل شي فيه حتى الحرقة لي في وجهو حبتها لانها منو و فيه حباتو و عارفة حبها مستحيل عارفة مراحش يحس بيها و لا يبادلها هاذ الشعور.
-يونس خلاص صبرو كمل و لازم يلقى حل راح يرجعها لامها و يطلقها و يرتاح ....هاذا هو تفكيرو من شهر لكن كل ما يجي نفذو يضعف و ميقدرش فراقها صعيب وواعر ساعات يحن و يقول خلي نروح نعنقها نبوسها و ننسى كلشي خليني نعيش كيفي كيف الناس ننسى شكلي و انتقامي و كرهي نتمم زواجي و نجيب وليدات منها لكن ذاك النهار محفور في ذاكرتو إذا بقى معاها هاذ الشي راح يتكرر مرة و زوج و ثلاثة و هو مش راح يكون أناني خليها تشوف حياتها و تتزوج بلي يناسبها.