كرونيك#الظل

#الظل_الحلقة 136

الحلقة 136:كان قاعد فالبيرو نتاعو حتى دخلت عليه بابتسامة عريضة هازة فيدها زوج كيسان نيسكافي قدمت الكرسي لعندو و بداو يتناقشو فأمور الخدمة فجو لا يخلو من المرح...لي يشوف هاذ الزوج يكذب أنو قبل 3أشهر كانو ميطيقوش بعضهم أو بالأحرى كان ميطيقهاش لأنها هي من الاول تعبد التراب لي يمشي عليه...هشام رجع شخص آخر مختلف مع هند قريب منها لدرجة ميفوتش يومو بلا ما يشوفهم اكتشف فيها جوانب عمرو ما تخيلهم يكونو فشخصيتها قربها منو اعتبرو صداقة و صداقة قوية نسى فيها حرب المصالح لي قاعدة دور بين العيلتين رغم أنو ما ينكرش أنو استفاد بزاف من هاذ العلاقة و ربح من وراها بزاف صفقات زعزت شركة عمو و أثرت عليهم .
في الجهة الاخرى كانت هند الفرحة مش سايعتها وش رح تتمنى أكثر من هكذا لي حبو قلبها قريب منها يحكي و يضحك معاها عكس ما كان بكري صحيح ما يحبهاش و ما يبادلهاش نفس المشاعر لكن هي راضية و عندها أمل أنو يجي نهار و يحبها مدام أنو قدر يتقبل صداقتها فمش مستحيل أنو يرجع يبادلها الحب.
-عند نصيرة و لهادي فوتو أسوء ثلاث أشهر في حياتهم عياو يحوسو على يونس لكن والو ملقاوش ليه حتى أثر و هاذا لي موترهم و مخليهم على أعصابهم و من جهة أخرى أمور الشركة متبشرش بالخير كل صفقة يدخلو ليها يخرجو بالخسارة معرفوش وين راه المشكل و الشي لي زاد عليهم أنو أغلب الصفقات ربحهم هشام، بالنسبة لوفاء فنصيرة كانت فقمة راحتها منها من يوم جاتها و هددتها مزادتش رجعت...لكن لهادي هابل و طاير عقلو ما خلى وين يحوس عليها لكن ملقاهاش و معرفلهاش طريق.
-بالنسبة لوفاء كانت راح تجن من التخمام حابة بنتها ميتة عليها لكن معرفتش وين تلقاها و لا منين تبدا تحوس عليها كانت تخرج لافة الخمار على راسها و مغطية كامل وجها حتى ميلقاهاش لهادي توقف يوميا بالساعات عند باب المستشفى لي كانت فيها تقول بالاك نلقى خيط و لا حاجة دلني عليها لكن فكل مرة تتراجع و تخاف أنهم يعرفو هويتها و يقبضو عليها ترجع للدار تجر في أذيال الخيبة تقعد ليل كامل و هي تبكي و تتحسر على الماضي لي راح و ظلمها و منصفهاش.
-عند ميساء و وليد فكانو يعيشو أجمل أيامهم البيبي لجاي زاد قوى حبهم أكثر و أكثر و خلاهم متعلقين ببعض ميساء كرشها بدات تظهر شوي و بدا دلالها على وليد كل يوم يزيد هبلاتو بوحمها و كل مرة تخرجلو بخرجة جديدة وهو على قلبو كيف لعسل يلبي فشهاويها بكل حب و بلاما يتقلق و لا يتردد