كرونيك#الظل

#الظل_الحلقة 41

الحلقة 40:جا نهار جديد حامل في جعبتو الكثير.
-بعد ليلة عداتها تبكي فاقت و راسها قاتلها من الوجع مقدرتش توالف هاذ المكان حاسة بالخنقة و الضيقة توحشت دارهم و نعجاتها و دوارهم توحشت جداها و الفيقة مع الفجر على ريحة كسرة القمح سخونة و معاها كاس حليب بقرة جديد و الزبدة و زيت الزيتون توحشت تفيق على صوت الديك يصيح و النعاج يبعبعو باه يخرجو يسرحو فالمروج و جداها تخرنن عليها باه تزرب كانت حياة بسيطة لكنها جميلة جمال قلوبهم فاقت من سرحتها بعد ما سمعت الباب يدق مسحت دمعاتها و فتحت على الخدامة قاتلها بلي راهم يستناو فيها على الفطور أوماتلها براسها و دخلت غسلت وجها بدلت قشها و لبست نفس فستان البارح و هبطت.
-وصلت لقات كامل العايلة لتحت يفطرو.
تكلمت نصيرة بصوتها المسموم:صباح الخير مريم كيما راكي تشوفي العايلة كامل تحب تتجمع مع الفطور قبل ما يروح كل واحد لخدمتو نتمنى ديري هاذ الشيء في بالك.
-عيط عليها الهادي عيطة زعزعت الكل:نصيرة خلي عليك الطفلة تفيق وقت ما تحب مهيش ملزومة تفطر معانا.
- مريم وجها حمار و حست بالإهانة جاوبت نصيرة:سامحيني خالتي مكنتش علابالي بالنظام نتاع لعايلة نوعدك من اليوم نعود نحترم وقت الفطور.
-معليش مسامحة بصح آخر مرة تناديلي خالتي منيش في دوراكم قوليلي طاطا نصيرة و لا مدام نصيرة.
-لهادي مقدرش يتحمل المشهد أكثر خبط المنشفة من يدو و وقف خزر خزرة تحذير و قال لوليد تبعني نروحو .
-بعد ما راح لهادي ووليد خلا الجو لهند باه تنفث شوية من سمها:قوليلي مريم شفتك لابسة نفس فستان البارح إذا معندكش واش تلبسي متحشميش راني اختك نعطيك شوي من قشي لقديم.
-جاوبتها مريم بعد ما فاض بيها الكاس:لا الحمد لله كثر خيرك تربيت نحمد ربي على نعمتو و نقنع بالشي لعطاهولي و ما نمد يدي غير للي خلقني.
-تكلمت نصيرة تعاتب في مريم:عيب عليك يا مريم ختك ما قصدت والو كانت برك حابة تعاونك و انتي فسرتي كلامها على هواك كبري قلبك ووسعيه.
-آه يا ربي عاوني يجرحو فكرامتي و يرجعو لغلطة فيا أنا كيفاه راح نقدر نعيش هنا كيفاه،مسحت فمها بالسرفيتة و قالتلهم شبعت(أصلا مكلات والو) صح ليكم دايمة ناضت و خلات ربع عيون ياكلو فيها ماكلة.