كرونيك#الظل

#الظل_الحلقة[7]

كان قاعد عند الباب سارح فخيالو خالق عالم خاص بيه وحدو حتى واحد ميعرف فاش راه يخمم انسان غامض لدرجة كبيرة يهدر غير إذا استدعات الضرورة همو كبير و بيرو غارق صعيب توصلو و إذا وصلتلو ممكن تغرق فيه نوضو من دوامة تفكيرو صوت تزمير الرانج روفر نتاع وليد فتح الباب بسرعة بعثلو و ليد تحية بيدو و هو رجعلها غير بتحريكة راسو شوية هكذا و هبطو هبط وليد هو الاول و بعدها تبعاتو هي وقفت بكل شموخ و تلفتت تشوف فكل أرجاء القصر من برا جات عينو عليها شاف فيها زين و جمال مش كل يوم يشوفو كانت كيف القمرة الساطعة فوسط الليل بمكياجها و لبستها الكلاس تعجب أي واحد يشوفها وطيح عينو عليها شافتو طول الشوفة فيها ضحكت باستهزاء ديما كل ماجي للبلاد تلقى نظرات الإعجاب من الكل و أكيد العساس راح يكون ضمن قائمة معجبيها الكبيرة هي تعرف بلي جمالها و مكانتها مش أي كان يقدر يمتلكها ممكن احنا نسموه غرور و كبر في شخصيتها أما هي تعتبرو ثقة . فتحت فضيلة الباب و بدات تمرحب و تعاود قريب تبوسلها يدها هذا هو طبعها الطمع يمشي في دمها أرميلها عظمة تروح تلهث ليها كيف الكلب بعدتها عليها بشوي و تكلمت *هند*:وينهي ماما و بابا وقيلا نساو بلي راني جاية نطقت نصيرة من وراها و أنا نقدر ننساك يا روحي راكي عيني لنشوف بيها ارواحي عند ماماك توحشتك يا عمري راح تجري ليها و أنا ثاني يا ماما متتصوريش شحال راني متوحشة تعنيقتك بعد عناق طويل سقسات أمها وينو سي الهادي متقوليش برك فالشركة *نصيرة*:لا ياعمري راهو الفوق يصلي فالعصر دوك شوي و يهبط دخلو للصالة الكبيرة يحكيو في ثلاثة وفضيلة واقفة عند روسهم حتى عيطت عليها نصيرة:وش راكي ديري هنا روحي قولهم يجيبو للاهم الاكل أكيد حبيبتي راها جيعانة قبل متمشي فضيلة حبستها هند:لا ماما راني شبعانة كليت فالطيارة خلي لمبعد. في هذا الوقت دخل عليهم الهادي بكل هيبة نطقو لكل في نفس الوقت تقبل الله ناضت ليه هند تجري:بااااابي توحشتك يا قلبي هكذا تقسي قلبك عليا و مجيش طل عليا هانت عليك هنودة بنتك *الهادي*:كيفاه تخمي هكذا يا حبيبت باباك راكي علابالك بلي الخدمة مدية كامل وقتي بصح مدام جات بنتي دوك نتفرغ شوية باه تشدي الشركات مع خوك سادت لحظة صمت بين الجميع كامل عارفين بلي هند مش حابة تخدم هاذ الخدمة.