كرونيك#الظل

#الظل_الحلقة 122

الحلقة122:كان فالشركة قاعد يصلح فلي ممكن يتصلح لكن والو مش قادر يتصرف كلشي خرج عن طوعو كلش تخلط عليه و معرفش منين يبدا صونا هاتف المكتب كانت السكرتيرة تعلمو بوجود واحد إسمو يونس قالها بلهفة دخليه فورا و متخلي حتى واحد يزعجنا.
-بعدما تبادلو المصافحات جلس يونس حط رجل على رجل و تكلم:علابالي الشي لي راح نقولو مراحش يعجبك لكن لازم تعرف حتى توضحلك الصورة و تعرف عدوك من صديقك .
-إيه تفضل
-كيما كنت متوقع كاين شخص ورا تهييج الصحافة عليك و تشويه صورتك و مع الاسف هاذ الشخص هو عمك لهادي بلمختاري.
-هشام رغم وقع الخبر عليه لكن و كانو صار متعود على الطعن من هاذ العايلة الغدر صار سيمة من سيمهم:إيه و الحل كيفاه
-الحل أنك لازم دايما تكون سابقهم بخطوة
-يعني!!!!
-يعني أنك في عوض ما تخمم بالانتقام خمم و علاه عملو هاذ الشيء فاه يفيدهم إفلاسك و هوما جزء من هاذ الشركة .
-ممكن باه نرضخ ليهم و يصيرو يتحكمو فيا كيفما يحبو.
-عمك كان حاب يرجع يكسب ثقتك من جديد الشركة نتاعك مهمة بزاف باش يمرر أعمالو و لما عملت هند عملتها عرف أنو أول خطوة راح تخطيها هي فض شراكتكم و هاذ الشي راح يدمرو و ينهيه فما كان عليه غير أنو يدمرك و بعدها يمد يدو ليك حتى يساعدك و أنت وقتها لما تشوفو كيف وقف معاك مراحش تخرجو من هنا.
-و الله و ظهرت داهية يا سي لهادي لكن معليش دواك عندي.
-وش تقصد؟؟؟
-راح نخليه يصدق أني طحت فالفخة لكن فنفس الوقت راح نلعبلو من جهة أخرى راح نراوغو و بعدها نصدمو صدمة عمرو .
-رد بالك تغلط يا هشام أي غلطة راح تكلفك غالي عمك لهادي مش وحدو هو مجرد خيط في شبكة كبيرة و خطيرة و أنا ما ساعدتك غير لاني كنت متأكد من صدقك و حسن أخلاقك.
-متخافش يا يونس و هشام عمرو لا راح يخلف يخيب ظنك .
-أنا نخليك دوك لكن راح نبقا مراقبك و أي غلطة راح تلقاني قدامك بعد شوي راح توصلك قائمة بالموظفين لي باعوك لعمك لهادي اتصرف معاهم.
-بعدما خرج يونس بقا يخمم و يخطط كيف ياخذ بثارو من هاذ العايلة كان دايما يظن أنو نصيرة هي أسوء واحد فيهم لكن الظاهر أنو لهادي أسوء منها ببزاف دق الباب دقات خفاف فيقو من سهوتو دخلت ليه بخطوات ثقال التوتر ظاهر على وجها قلبها يدق بسرعة و يديها يرجفو ضمتهم لبعض علها تنقص شوية من توترها شاف فيها و قال بكل حدة: وش قررتي؟؟؟؟؟
Flash back:
-أي شيء نطلبو ديريه؟؟؟؟
-و الله أي شيء أنت قول برك.
-حك لحيتو و شاف فيها أممم و لوكان نقولك جيبيلي المعلومات لي نحتاجها من شركتكم راح ديريها؟
-شافت فيه بتوتر وش تقصد أي معلومات.
-مثلا الصفقات السرية ملفات المناقصات لي راح تدخلوها مشاريعكم الجديدة.
-كانت تسمعلو و هي مصدومة آخر شيء كانت تتوقعو أنو يطلب منها تجسس على شركتهم تخون عايلتها و تخرج أسرارهم: يعني حابني نبيع عايلتي و نخونهم؟؟؟
-عايلتك حرام تخونيها لكن هشام معليش دمروه و تعفسو عليه مالا علاه من صباح و انتي توجعيلي في راسي و تقولي نعمل لي تطلبو مني و لا حابتني نسامح و نرضى بلا مقابل شوفي آخر كلام عندي قلتو يا أما تساعديني و تجيبيلي لي طلبتو منك حتى نصلح الشي لي عملتوه و إلا آخر مرة جي تحكي معايا و السماح أنسايه و امحيه من بالك.
- بقات تشوف فيه و هي مصدومة لي قالو كبير و كبير بزاف هي تعرف أنو عايلتها غالطة و ظالمة و لي عملوه فيه ما يتغفرش لكن باش تصلح الغلطة بغلطة أكبر ميجيش تكلمت بتردد: خليلي يوم و لا يومين نفكر و بعدها نرجعلك.
Back:
-شافت فيه و تكلمت بسرعة قبل ما تغير رايها: موافقة لكن على شرط.
-ايه و تتشرطي ثاني واش هو شرطك يا لالة؟؟
-غير تتحسن أمور الشركة نحبس.
-أنا لي نقرر وقتاه تحبسي.
-تكلمت بحدة أكبر :و أنا لي عندي قلتو يا توافق و إلا قاطعها قبل ما تكمل و دور في رايها و هو ماصدق:خلاص..خلاص موافق لكن ردي بالك تلعبي بذيلك معايا ساعتها و الله واحد ماراح يرحمك من عذابي.