كرونيك#الظل

#الظل_الحلقة 124

الحلقة 124:قام واقف كيف المجنون مش مصدق أنو ضيعها مرة أخرى لا مستحيل راح يجري ركب سيارتو و أمر الشوفور يتبع الطاكسي لي فاتت قبل شوي.
- في الجهة الأخرى كانت تبكي و كل شوية تشوف وراها متأكدة أنو راح يتبعها: الله يسترك خويا زيد شوية فالفيتاس.
-كشما كاين اختي راكي تباني أنورمال.
-إيه يا خويا كاين واحد راه يتبع فيا و خايفة لا ياذيني.
-متخافش اختي بربي ان شاء الله مراحش يلقاك دوك نتلفلو الطريق.
-عند لهادي لي كان فقمة غضبو مش مصدق أنو بعدما لقاها و ظهرت عايشة يزيد يضيعها دار ليه الشوفور و هو متوتر سامحني سيدي بصح الطاكسي ضاعت مني و معرفتش وشمن طريق خذات.
-الله لا تربحك و لا تربح لي يتكل عليك حمار أجرع للقصر بسرعة قبل لا نستجرم فيك.
-بعد ربع ساعة كان فالقصر طلع يجري لعند نصيرة ليوم يقتلها مفيهاش هدرة.
-عند نصيرة لي كانت ممدودة في فراشها بعدما ألغات الموعد مع المحقق حاسة راسها راح يطرطق جية وفاء خلطتلها كلشي جات تغمض عينها و تاخذلها غفية تفتح الباب على مصراعيه و دخل لهادي عليها كيف البركان بلا كلمة بلا زوج قدم منها حط يدو على رقبتها و وقفها تكلم و عينيه تقدح نار:أنا يا قح..ة أنا تلعبيها عليا و تقوليلي وفاء ماتت و قت ولادتها لمريم.
-نصيرة الدم نشفلها حلت عينيها على وسعهم كملت هاذا وش كان ناقص لي كنت خايفة منو سنين رجعت طحت فيه الله ينعلك يا وفاء الله ينعلك طلعت يديها لعند يديه لعله يفكها لكن والو كان معمي و الحقد عمرلو عينيه تكلمت بصعوبة بالغة:أطل..قن..ي..وش...قا..ع..د....تح..كي..
-طلق منها حتى يسمع وش راح تكذب عليه .
-تمالكت روحها و رسمت على ملامحها الدهشة و الله ما عرفت بلي عايشة غير ليوم و الله المستشفى فذاك اليوم عيطولي و قالولي لمريضة توفات و هي تولد قاطعها و هو يغلي كذابة يا نصيرة كذابة أنتي لي هربتيها و بعدتيها عليا أنتي هي مستحيل تقدر دير هاذ الشي وحدها.
وعلاش ما تقدرش إذا يونس الطفل الصغير و قدر يخدعنا كامل هاذ السنين راح تغيب على وفاء.
- أنا و أنتي علابالنا بلي حالتها فذاك الوقت متسمحلهاش لا تهرب و لا تخطط لهاذ الشي.
-مقلتش هي لي خططت لكن خمم فيها يمكن لي هرب يونس و قال بلي مات هو نفسو لي عمل هاذ الشي مع وفاء .
-لا مستحيل واحد ما عندو مصلحة فهروب وفاء غيرك.
-و هروب يونس حتى أنا عندي فيه مصلحة تكلم نظن كاين سر فالموضوع كاين واحد قاعد يلعب بينا طول هاذ السنين و حنا موش عارفينو.
-وش قصدك شكون هاذ الشخص كامل الناس لي خفنا منهم تخلصنا منهم إذا قصدك على محمد فمستحيل يدير هاذ الشي لا وضعو و لا ظروفو يسمحولو يتصرف هكذا.
-وين علابالك يمكن كلف ناس يقومو بهاذ الشي ما تستغربش
-زعما يكون كلامك صحيح و محمد طول هاذ السنين قاعد يلعب بينا.
-إيه كلشي ممكن .
-زير على يدو بكل حقد و الله غير نقتلو هاذ المرة.
-رد بالك ديرها يا لهادي ساعتها راح تنوض الحرب على روسنا يونس موش ساهل و لو عملنا أي خطوة غالطة قادر نروحو فيها.
-إيه و الحل؟؟؟
-الحل تبعد من طريق وفاء و أي حاجة عندها علاقة بالماضي أنا سامحتك مرة يا لهادي و غفرتلك خيانتك لكن نقسملك بلي خلقني لو رجعت و كررت خيانتك ليا ساعتها اترحم و أقرا الفاتحة على روحك.
-بقا يشوف فيها متردد كلامها وسوسو و خلاه يشك بأنو كاين حاجة غالطة قاعدة تصير زعما شكون لي دار كامل هاذ الشي لكن قبل لازم يتأكد من كلام نصيرة يعرفها ذيبة و تعرف تلعبها أما بخصوص وفاء فمستحيل يتخلى عليها بعدما لقاها دخل للحمام يغسل في وجهو ويهدي في أعصابو مخلي نصيرة تتبسم براحة:أوففف الحمد لله قدرت نبلعطو بكذباتي لكن لازم نتصرف قبل ما يتحرك نعرفو مش راح يصدقني بسهولة.