كرونيك#الظل

#الظل_الحلقة 89

الحلقة 89:في المساء وصل لهادي للقصر بعدما جابو وليد كانت نصيرة تستنى فيه متوترة أكيد راح يسقسي على مريم علابالي ليوم يقلبها فوق راسي .
-دخل للداخل استقبلاتو نصيرة و هند بالبوس و الأحضان و عاونوه حتى يطلع لفوق لغرفتو بقاو معاه ولادو شوية و بعدها كل واحد راح لغرفتو بقا غير هو نصيرة تكى بمرفقو على لمخدة و قال بصوت حزين:المغضوبة نتاع مريم وين مزالت محبوسة في غرفتها
-نصيرة بدات تمهمه و ملقات ما تقول لكنها مضطرة تخبرو أحسن ما يعرف وحدو:أحمم مريم زوجتها و سترت عليها خلاص أنسى حكايتها
-عيط على طول صوتو :كيفاه كيفاه عاودي مسمعتش مليح .
-قتلك زوجتها.
-ناض ليها كيف الثور الهايج حكمها من كتفها و بدا يخض فيها:لهنا و برك يا نصيرة هنا و برك طول عمرك تلعبي بيا كيف ما تحبي لكن توصل تلعبي بحياة بنتي نقتلك و نشرب من دمك وين درتي الطفلة أنطقي قبل م الجنون لي فيا يخرجو و ندير الشي لعمرك شفتيه
-كانت تسمع فيه و الخلعة حاكمتها أول مرة تشوفو بهاذ الحالة زادت ندمت أكثر و أكثر أنها جابت مريم لهاذ الدار تكلمت بصوت مرجوف:كان لازم نعمل هكذا و نستر عارها لمهم تزوجت و خلاص ما جات تكمل هدرتها حتى تطبع كف قاوي على وجها:مريم بنتي أنا و أنا وحدي لي نقرر إذا نزوجها و لا نخليها حكمها من شعرها لواه بين يديه و جابها فالارض طلعلها راسها ووجهو ليه:وين درتي مريم يا نصيرة آخر مرة نقولك
-تكلمت متألمة من قبضتو معلاباليش وين تسكن زوجتها بالعساس و معلاباليش وين يسكن و هو خلاص مراحش يزيد يرجع يخدم
-طلعها و هو مزال حاكمها من شعرها زير على سنيه و تكلم بصوت أقرب لفحيح أفعى:أنتي لي حبيتي و أنتي لي جنيتي على روحك من اليوم كل أملاكي راح يصيرو باسم مريم و نشوفو إذا تقدري تتكلمي
-فلتت يديه الحاكمين شعرها و نطقت كيف المحنونة مستحيل مستحيل تعمل هاذ الشي نقتلك قبل ما ديرها و الله غير نقتلك قبل ما تمد حق ولادي لذيك اللقيطة.
-نديرها يا نصيرة نديرها سكتلك بزاف و حسيتي سكوتي عليك خوف منك راح نكتب كلشي باسمها و لي تحبي تعمليه أعمليه راح نعوض بنتي على سنين الحرمان لي عاشتهم بعيدة عليا.
-و ولادك راح تحرم ولادك من رزقهم
-ولادي مش محرومين ولا نسيتي لما شرطتي عليا نكتب نص أملاكي باسمك مقابل مريم
-نصيرة هبلت جنت في مخها خيوط اللعبة راح يطيحو من يدها خلاص لازم تخبرو الحقيقة و لا يديرها هاذ المهبول و يكتب كلش باسم مريم
تكلمت مرعوبة علابالها الشي لي راح تقولو واعر بزاف و قادر يقتلها عليه لكن تتحمل شوي أحسن ما يروح تعبها باطل:كيفاش راح تكتب ملكك على وحدة مش بنتك شاف فيها مصدوم و بعدها ضحك:هههه نصيرة كذباتك هذو عادو ميتعداوش عليا شوفيلك كذبة أخرى.
-تكلمت بحزم أكبر :قتلك مريم مش بنتك مريم بنت محمد أنا كذبت عليك طول هاذ السنين
-عيط بأعلى صوتو:كذااااااااااابة
-منيش كذابة وراح نثبتلك راحت تجري فتحت لخزانة جبدت الكوفر نتاعها فتحاتو و بدات تقلب حتى لقات الورقة لي تحوس عليها
-وقفت و مدتهالو و هي ترجف علابالها راح تاكلها في جنابها إذا مقتلهاش حكمها بسرعة و بدا يقرا كيف الملهوف كلما يقرا حرف صدمتو تزيد أكثر الورقة عبارة عن تحليل ADN يثبت أنو مريم مش بنتو.
كمش الورقة بين يديه و دمعة حارة طاحت على خدو يعني طول هاذ السنين عايش على كذبة نصيرة طول هاذ السنين تحكمت فيه كيف ما يحب المهم متأذيلوش بنتو و فالأخير ظهر كل هاذ الشي فيلم من إخراجها و تمثيلها طلع راسو ليها لقاها رايحة جيهة الباب باه تهرب لكن وين ليوم يا قاتل يا مقتول.
لحقها بسرعة قبل ما تفتح الباب و جبدها ليه هبطها للارض وطاح فيها يضرب كيف المجنون يضرب في كل بلاصة وصلت ليها يدو و رجلو يضرب كيف عمرو ما ضرب حد خرج فيها غل السنين خرج فيها قهرتو من كذبها و خداعها شافت عينو نساء على قد شعر راسو لكن كيف هاذ الشيطان مزال ماشاف بقات يدو تضرب و تضرب حتى حس بروحو فشل و النفس ضاق عليه راح يجري ياخذ في دواه في حين استغلت نصيرة الفرصة و هربت بطلوع الروح لغرفة أخرى.