كرونيك#الظل

#الظل_الحلقة 134

الحلقة 134:كان يسوق فموطوه و هو سارح و مهموم الشي لي عرفو هاذا وين شلو أفكارو و خلاه مربوط يعني مريم بنتها بصح علاش خلاتها و راحت طول هاذ السنين و لا حتى هي كذبو عليها و قالولها ماتت لكن لا هي ذاك ليوم لما عيط الراجل لنصيرة كان يحكي على بنتها يعني أكيد عارفة بلي عايشة بصح علاه سمحتي فيها ورحتي و علاه رجعتي بعد كامل هاذ السنين لازم نلقاك فاقرب وقت لازم نعرف وش صرالك و وين كنتي و الا نهبل .....وصل للدار قارا الموطو و دخل مريم راقدة كيف العادة مغمضة ذوك لعوينات و مش جايبة خبر بالدنيا المقلوبة في جالها قرب منها بشوية بشوية حتى وصل عندها طابس على ركايبو نحى خصلة من شعرها طايحة على وجها وقعد يتأمل فيها و يملي في عينو بشوفتها : و أنا نقول و علاه ديما كاين حاجة تجذب فيا ليك و انتي ظهرتي قريبة ليا و أقرب مما كنت نتخيل كنت ديما نشوف فعينيك لي سحروني ونقول وين شفت هاذ لعيون لمعتهم مش غريبة عليا ....حط يدو على خدها و بقى يمشي فيها بشوي مستمتع بنعومتهم و كل ما يذكر كيفاش يحمارو وقت يشوفوه يهبل في مخو هبط بيدو على شفايفها المفتوحين كأنهم يغريو فيه كانهم ينادو فيه و يقلولو قرب وذوق من شهدنا اروي عطشك و روينا معاك و هو مكانش من العاكسين قلبو رغب و هو ما عليه غير يلبي النداء قرب بوجهو اكثر و أكثر حتى صار النفس واحد و الشفايف متلامسين فتح فمو باش يغوص و يغطس أكثر لكن عقلو حارم اللذات كانلو بالمرصاد و فيقو من احلى حلمة فيق يا يونس وش قاعد دير راح تبوس الطفلة و هي راقدة وين راك ماشي بهاذ المشاعر الحب مش ليك يا يونس الحب متخلقش باش يكون جزء منك و من حياتك لازم ننساك يا مريم و نبعدك من طريقي لازم نرجعك عند امك فاقرب وقت و نخلي انتقامي غير بيني و بين محمد انتي من اليوم خط أحمر ممنوع نتجاوزو راح ندفن كل شعور اتجاهك راح ندفنو و نرمي عليه التراب و إذا رجع خرج راح نظطر نكويه و نكوي هاذ القلب معاه بعد وجهو منها وجا واقف هارب منها و من روحو لكن يدها سبقاتو و حكماتو من يدو تصدم و قلبو تزعزع يعني كانت فايقة طول هاذ الوقت اووف الله ينعل حظي تكلمت بصوت مبحوح و ضعيف كمل على مابيه: يونس ....دار ليها وهو مش عارف وش يحكي و لا وش يقول كلشي تخلط عليه اختار السكوت كمهرب ليه حتى يعرف وش راح تقول بعدها يلملم الكلمات و يحصن روحو و يجاوبها لكنها صدماتو وقت سألاتو آخر سؤال توقع تطرحو: أنت تحبني؟؟؟تشل و معرفش وش يقول وش يجاوب و واش يهدر إذا بنفسو مش عارف الجواب إذا هو مش فاهم الشي لي صاير فيه و مش عارف يفسر هاذ المشاعر كيف راح يجاوبها هي و يفهمها حيراتو و دخلاتو في حيط علاه تسأل فيه زعما وش حابة تسمع حابتني نقولها إيه نحبك و نعشق فيك و لا حابتني نقولها لا إنتي مجرد عدوة ما يربطني بيك غير الكره لازم ميضعفش لازم ميحسسهاش بهاذ الشي هي مش ليه و هو مش ليها هي بنت وفاء وبنت وفاء تستاهل واحد أحسن مني واحد كامل مكمول مش واحد مشوه و وجهو محروق قسى قلبو تمالك روحو و خرج ضحكة إستهزاء: ههههه و الله واثقة في روحك بزاف يا بنت محمد يعني من دون كامل النساء راح نحبك أنتي انتي لي مصبرتيش على عرسك و عملتي فضيحة مع ولد الخدامة كيفاه راح نحب وحدة باعت روحها و سلمت في شرفها قولي كيفاه...كانت تسمع في كلماتو و قلبها يبكي قبل عيونها جرحها و جرحو هاذ المرة كبير و كبير بزاف هانها و هان شرفها قتلها بالحياة ذبحها و خلى دمها يسيل تكلمت بصوت باكي: أنا قتلك مرة و نزيد نعاودهالك مرة أخرى عمري لا فرطت فشرفي نموت و منعملهاش و إذا مش مصدق جرب حكمت روبتها بيدها و بكل غل قطعتها حتى طاحت و بان المستور جرب وشوف يا يونس شوف إذا أنا عاهرة و لا طاهرة.
-أول مرة يشوفها فهاذ الحالة يشوف مريم اخرى غير لي عرفها مريم القطة المغمضة صارت لبوة دافع بكل شراسة على روحها كلامها هدو و زعزعو من داخل يعرفها طاهرة و يعرف أطهر منها مكانش لكن هذا هو الحل حتى يهرب منها و من روحو اختار يجرح حتى ميتجرحش مرة اخرى دموعها يسيلو و كل قطرة كانت تحرق فيه هو مش هي صونا بورطابلو شاف فيها بنظرة مفهمتهاش حط يديه على طراف الروبة الطايحة على كتافها طلعاهلها شافت فبها شوفة طويلة باسها من راسها و خرج قبل ما يضعف و يدخلها في حضنو...أول ما خرج انهارت على الارض تبكي كيف عمرها لا بكات قتلها بكلماتو حطملها قلبها الصغير لي كان يستنى في كلمة حلوة منو .
-أول ما خرج من الباب تكى عليه ياخذ في النفس لي تقطع عليه هز على لي يعطلو جاه صوت من الجهة الاخرى: -الحدود مع ليبيا ملغمة شحنة أسلحة كبيرة داخلة هاذ الايام و القيادة العليا طالباتك تكون ثم فورا.
-حاضر...قفل عليه و رجع عيط لسهيلة قالها راح نغيب أيام أرواحي اقعدي مع مريم حتى نرجع.