كرونيك#الظل

#الظل_الحلقة 154

الحلقة 154:-كان واقف بسيارتو قدام فيلتهم كيف كل يوم شهر كامل و هو هابل مخو يدي فيه و يجيب توحشها و مطاقش فراقها حاب يشوفها و يملي عينو بشوفتها لكن أملو يخيب وقت يحل الليل و هي مخرجتش يديماري بطوموبيلو لاقرب بار يشرب الكاس ورا خوه باش ينسى لكن والو تقولشي يشرب فالماء خدمتو هملها و صحتو فرط فيها لحية هايجة و قلب معمر و لي مهبلو أكثر خايف لا يطلع ظالمها ساعتها يقتل روحو مفيهاش هدرة ....روح يتمايل مع وجوه الفجر دخل لفيلتهم و جا طالع لبيتو يرتاح لكنو لمح خيال أمو خارج من القبو تخبا ورا الستار حتى متلمحوش و الشك قاتلو وش دير أمو فالقبو وش لحاجة لي عندها ثم ..تفكر لما كان صغير و شافها دخلت ليه راح لحقها و غير دخل عليها تخطفت ورمات الصندوق لي في يدها راحت تجري خرجت و خرجاتو معاها حكماتو من وذنو و بدات تعيط عليه و تهدد فيه إذا شافتو مرة أخرى هنا.
-زعما وش لي مخبية فيه يا ماما أنا لازم نعرف ..راح جيهتو يمشي بشوية و يتلفت يمين و يسار خايف لا يشوفو كاش واحد هبط مع الدرجات بلعقل حتى وصل عند الباب حط يدو على المقبض و دور لكنو محبش يتفتح : الله ينعلك خبط الباب برجلو و دار راجع أكيد المفتاح عندها خلي كي تخرج غدوة نروح نحوس عليه...طلع لبيتو يرقد و الشي لي شافو شاغل بالو .
-جا الصباح و كان الكل ملموم على طاولة لفطور في جو من الهدوء تكلم لهادي و هو يمسح في فمو: دايمة هيا وليد للخدمة.
-سامحني بابا مش قادر ليوم
-شاف فيه لهادي بغش: لا أنت سكتلك بزاف شوف يا تسقم روحك يا نديرلك كيف اختك أنت لي مفروض تخدم عليا و لا لعكس.
-تنهد يكضم في غيضو مش حاب يكبرها مع باباه على الاقل ليوم: بابا و الله نتاع الصح عيان خليلي ليوم و نوعدك من غدوة نكون تحت تصرفك.
-هاذي آخر فرصة ليك غدوة تكون مزروع قدامي.
-مشى لهادي و تبعاتو نصيرة و هو تنفس الصعداء..غير تاكد منها مشات بسيارتها طلع يجري لغرفتها يحوس على المفتاح حوس في كل بلاصة لكن ملقاهش و بعدها قال مادام عندو قيمة عندها فاكيد حاطاتو مع مجوهراتها الثمينة راح للخزانة و جبد الكوفر نتاعها و لحسن حظو مكانش مقفول حلو و كيما توقع المفتاح محطوط معاهم هزو بزربة خباه في جيبو و رجع كلشي لبلاصتو هبط يتسرسب للقبو و غير فتحو غماتو ريحة الغبار شعل الضو نتاع بورطابلو و بقا يحوس على الصندوق لي شافو من سنين....بقى حوالي ساعة و هو يحوس حتى لقاه أسفل صندوق كبير مليان خردوات هزو بين يديه و قلبو يخبط فالألف خايف يلقى حاجة تصدمو أول ما فتحو لقا فيه ألبوم صور كلهم لأمو وقت شبابها و معاها راجل آخر بدا يقلب فيهم بالصورة حتى جبد آخر وحدة قلبها و بدا يقرا: عارف يا محسن بلي هاذ القلب مهما جرحتو و مهما ذليتو مهما قسيت عليه و ظلمتو لكنو مزال ينبض بإسمك و عمرو ما راح يعرف يحب راجل غيرك تعرف وش لي مصبرني على فراقك ولدك يا محسن ولدك وليد الحاجة الوحيدة لي خرجت بيها من حبنا حبنا لي هدمتو بيدك دفنتو و رميت عليه التراب .
- كان يقرا فالمكتوب و دموع القهر يسيلو ويدان يعني حياتو طلعت كذبة يعني لي كبرو و رباه و عيطلو بابا يطلع خاطي هو يعني هو ولد راجل آخر ولد حرام و يماه طول هاذ السنين معيشاتو في وهم زير على الورقة بين يديه و قلبو خلاص حاسو راح يحبس الدنيا ظلامت في وجهو هبط على ركايبو يناجي في مولاه الرحمة من هاذ الكابوس ضغط على يديه لزوج طلع راسو للسقف و عيط على طول صوتو: لااااااااااااا.