كرونيك#الظل

#الظل_الحلقة 36

الحلقة 36:كان الكل قاعد في وسط الصالة يستناو في الشيء لجمعهم عليه الهادي كانت الأجواء أقل ما يقال عليها متوترة خصوصا بين هشام و وليد ليتبادلو فنظرات غاضبة متحدية من جهة هشام و أخرى ناقمة متشفية من جهة وليد ميساء كان الجسم هنا و العقل غايب كل ما جي عينها فعين خوها و لا أمها تهبط راسها متقدرش تشوف فيهم بعد الشيء لدارتو حبت تدي شوي أمل من وليد لكن كل ما تخزرلو يدور و جهو و لا ميعبرهاش و هاذ الشيء لزاد خوفها خايفة ليغدر بيها و ميخطبهاش ساعتها متقدرش تتحمل. لازم تحكي معاه و تفهم منو وش بيه أما هند فكانت تخزر لهشام بكل حقد كل ما تتفكر كيفاه رفضها يزيد غلها عليه مش قادرة تنسى هاذ الإهانة و مستحيل تفوتها -لهادي فرحتو مكانش سايعاتو و أخيرا جا النهار لراح يشوف فيه بنتو زعما تشبه لأمها فاتنة كيفها عندها نفس ضحكتها نفس عيونها آه و آه من عيونها . -نصيرة كانت تشوف في فرحتو الباينة على و جهو ضحكت ضحكة نتاع استهزاء و قالت في سرها أفرح بيها هاذ الأيامات و بعدها راح نصدمك صدمة عمرك بعدما يكون كلش كيما نحب عليه أنا. -فهاذ الأثناء وصلت للقصر سيارة المرسديس لباحة القصر قارات و هبطت منها مريم بفستان البسيط و شعرها المظفور الطويل طايحين خصلاتو على وجها يذري فيهم الريح كانت مدهوشة من الشيء لتشوف فيه و أكيد راح تتدهش أول مرة تخرج من دوارها و كي خرجت جات لهاذ القصر كانت تشوف في عالم مختلف تماما على العالم لكانت عايشة فيه بقات دور في عينيها على أرجاء القصر من برا حتى جات العين فالعين كان واقف بعيد يراقب بصمت و يربط الخيوط ببعضها شاف طفلة جمالها ساحر لكن لباسها بسيط أول مرة يجي هاذ النوع من البنات للقصر متعود ديما يشوف بنات الطبقة الراقية لابسين أغلى الماركات و يسوقو فأحدث السيارات معقولة هذي هي بنت الهادي بلمختاري باباها غارق فالعز قصور و سرايا و سيارات فخمة و يخوت و سفرات لكل أنحاء العالم و بنتو حتى حقيبة دير فيها قشها معندهاش هازاتو في ساشي فعلا المظاهر خداعة راح نشوف واش حكاية بنتك هذي يا السي الهادي و علاه خرجتها فهاذ الوقت بذات. -فاقت من سرحانها فالقصر على هدرت الشوفور يا آنسة رانا وصلنا هيا تدخلي تمشات وراه كيف الولد الصغير لخايف لا يضيع صونا الباب و حلت فضيلة قالت بنبرة متعالية :خير يا كمال وش جابك وشكون هذي شافت في مريم من الفوق لتحت متنكرش إعجابها بجمالها لكن كي شافت لباسها البسيط استحقرتها و قللت منها. تكلم كمال الشوفور:قولي لمدام نصيرة الطفلة راهي وصلت. -استغربت من هدرتو شكون هاذ الطفلة لتحوس عليها مدام نصيرة بلاك خدامة جديدة -راحت لوين قاعدين قربت من نصيرة و خبرتها بلي الطفلة و صلت نصيرة بدورها خبرت الهادي لكان حاب يطير باه يزرب يوصللها-تكلمت نصيرة بصوت مسموع للكل دخليها و جيبيها هنا للصالة. -راحت ليها فضيلة و قاتلها بلغة آمرة تبعيني مريم مكانتش هنا الشيء لي شافتو لداخل مايقلش فخامة على لي شافتو برا ثريات كبار مزهريات راقية أرضية مصنوعة من أجود أنواع الرخام زرابي ساحرة حارت واش هاذ الشيء لشافتو عمرها سمعت بلي كاين ديار كبار كيما هكذا غير فحكايات الخيال لحكاتهملها جدتها عمرها مكانت تتصور بلي راح تعيش فمكان بحجم دوارهم كامل فاقت من سرحتها و قت لقات روحها في و وسط صالة معبية بالناس -في الجهة المقابلة كان الكل مصدوم ماعادا وحدة لهي نصيرة طبعا الكل بقا يشوف فيها بنظرات مختلفة نظرات فرحانة مسحورة معجبة متحيرة غيرانة حاقدة. -هنا راح تبدا حكاية مريم في قصر بلمختاري يا درا وش مخبيلها الزمان يادرا راح تبقى عايشة فيه و لا القدر راح يرميها لمكان خلاف؟؟؟؟