كرونيك#الظل

#الظل_الحلقة 86

الحلقة 86:لما شافو طول فالسكوت تكلم بصوت ماكر:الظاهر ياعمي أنك استكثرت عليا ندخل شريك معاكم رغم أنكم أنتم شركاء معايا في شركتي و كنت قادر ننهي هاذ الشراكة لي بينا في أي لحظة لكن احتراما ليك خليتكم معايا بما أنك رفضت يا عمي فأنا مضطر ننهي كل شي بداية من العرس وصولا للشراكة لي بينا وقف وراح يمشي باتجاه الباب حتى يفتحو و يمشي في حال سبيلو حتى سمع عمو ينديلو تبسم بخبث و دار عندو:ناديتلي يا عمي.
-شاف فيه لهادي و قال باستسلام:خلاص أنا موافق بعد ما نخرج من المستشفى راح ننهيو كل الأمور الإدارية.
-ضحك هشام بانتصار أخيرا قدر يحط هاذ العايلة تحت رجليه:نشوفوك يا نصيرة وش ديري لما تسمعي
-ودع عمو و خرج الضحكة واصلة من الوذن للوذن غير شاف نصيرة و هند تقدم ناحيتهم :مبروك علينا يا مرت عمي. و كمل في طريقو
-نصيرة لي مافهمت والو وش يقصد بمبروك يعني وافق على هند لكن وش بيه فرحان هكذا قلبها مهناهاش دخلت تجري لغرفة لهادي و هند وراها :ممكن تفهمني على واش حكيتو أنت و هشام.
-شاف فيها و هو مش حامل روحو :تفاهمنا على الشي لقلتي عليه راح يتم عرس ميساء و وليد و عرسو هو و هند.
-هند غير سمعتها عرسها مع هشام الدنيا دارت بيها مفهمت حتى حاجة:كيفاه عرسي مع هشام مع شكون تشاورتو حتى تقررو في مكاني.
- شافت فيها نصيرة الفرحانة بهاذ الخبر:هند عيب كيفاه هاذا معامن تشاورتو حنا والديك و نعرفو مصلحتك أكثر منك.
-صرخت في وجوهم إيه صح خاطش تشوفو فيا صغيرة نرضع في صبعي من بكري تتحكمو في كلش هند ديري هاذي و مديريش هاذي خيرتو قرايتي و حرمتوني من حلمي بعدتوني على بلادي خيرتولي جامعتي حتى صحابي و كنتو ديما تخيروهملي متصاحبيش فلانة و صاحبي علانة استخسرتو فيا حتى عرس كيف البنات نحب و نتحب و نتخطب و نعيش أجواء العرس كيفي كيف أي عروس حابين تزوجوني و تعملولي عرس مسعمتش بيه غير قبل يوم منو مخممتوش وش راح يقولو الناس تزوجت بواحد قبل سمانة كان خاطب وحد أخرى.
-صرخ في وجها لهادي هننننننددددد أخرجي عليا مش حاب نشوفك قدامي لا نغلط فيك
-كانت راح تتكلم لكن قاطعتها أمها:هند أستنايني برا نحكي مع باباك و بعدها نتفاهمو.
-خبطت رجليها في الارض و خرجت تاكل في روحها ماكلة لعبوها عليها و حشاوهالها.
-غير خرجت هند قربت نصيرة من لهادي و الفرحة قريب تنطق من عينيها:أحكيلي كيفاه حتى وافق بهاذ السهولة
-ضحك باستهزاء وشكون قالك وافق بسهولة طلب حاجة عمري لا تصورتو يطلبها بصح ظهر ذيب و يعرف منين ياكل الكتف.
-نصيرة الدم جمد في ركايبها:وش طلب متخوفنيش
-20%من أسهم الشركة الرئيسية و إلا راح يلغي شراكتنا مع شركتهم و يلغي معاها الزواج.
-لا مستحيل قولي راك تتمسخر
-منيش نتمسخر شايفتني في وضع نتاع تمسخير
-قعدت على أقرب كرسي ليها الصدمة شلتها:و أنت أنت علاه توافق
-كيفاه حابتني منوافقش الشركة هذيك هي الصح في خدمتنا هي لي نفوتو بيها تجارتنا و نبيضو بيها أعمالنا الشركة هذيك حاربنا باه نكونو فيها من وقت مصطفى ماكان حي و لا نسيتي وش عملنا فيه
-قالت و الصدمة مزالت على ملامحها لا منسيتش و عمري ننسى الشي لي عملناه في خوك عمري نقدر
ننساه .
-هشام عرف منين يحكمنا و مكان عندي حل غير نوافق حتى يفوت لعرس و بعدها نشوف كيفاه نتصرف.
- أنا نروح نشوف هند و نقنعها بالزواج غدوة إن شاء الله نحاول نخرجك إذا سمحلك الدكتور.
-خرجت و هي الغش ماكلها حاولت تتمالك روحها قدام لهادي قد ما تقدر بسبة مرضو و الله يا هشام و عرفت تلعبها بصح معليه جاية لايام و نشوفو شكون يربح يا أنا يا أنت