كرونيك#الظل

#الظل_الحلقة 139

الحلقة 139:-أنت تعرف ربي حتى تحكي عليه شيطان كيفك و كيف مرتك مستحيل يعرفو ربي ماجات تكمل هدرتها حتى جاتها كف حارة من عند وليد خلخلتلها توازنها و خلاتها راح طيح لكن حكمها فآخر لحظة و زادها الكف الثاني و الثالث و الرابع و الخامس مشبعش و بقا يضرب فيها من كل مكان ناسي بلي راها بين روحين و هازة قطعة منو في أحشاءها تقدم منو لهادي و نصيرة يفكو فيه لكن والو جن و مخو طار مقدرش يتحمل كلامها على والديه محبس حتى قاتلو أمو: أطلقها يا ولدي إذا مش علاجالها على جال ولدك لي في كرشها..بعد كلام أمو كأنو شكون جا و فيقو هاذا وين تفكر ولدو بعد منها و هو يلهث شاف فيها باشمئزاز و نطق بآخر كلمة توقعوها منو: أنتي طالق يا ميساء و آخر مرة نحب نشوف وجهك قدامي طيري من وجهي لا نقتلك .
- كانت تسمع فيه و هي مصدومة هاذ الكلمة قتلتها و زادتها جروح على الجروح لي عملهم في جسمها الدموع جفو من عينها و حست بخنجر حاد و مسموم تزرع في وسط قلبها تركزت بيدها على الحيط و وقفت بشوية متقوية على الوجايع لي تحس بيهم أول ماوقفت شافت فعينيه و قاتلو كلمات زعزوه من داخل: أني رايحة يا وليد رايحة بصح دير حاجة في بالك ميساء سامحتك مرة و عفست على كرامتها مرة لكن عمرها ما راح تعاود الغلطة و عمرها ما راح تسامحك مرة أخرى ..دير في بالك يجي نهار و تندم لكن ندامة ذاك الوقت بلها و أشرب ماها خاطر ما راح تفيدك بوالو.
-دخلت لغرفتها خذات ساكها و مفاتح سيارتها و خرجت تحت أنظارو من لي قالت هاذ لكلام و هو جامد خاف لا يكون ظلمها خاف لا يكون غلط في حقها للمرة الثانية و ساعتها هو لي مش راح يسامح روحو مش هي لكن لا هو هاذ المرة مغلطتش تبلات على والديه و سبتهم قدامو و حاباتو يسكت تستاهل لي عملو فيها.
- غير شافها راحت دخل هايج لبيتو يخبط و يكسر فأي حاجة جات فطريقو مكانش يتصور فأسوء كوابيسو أنو راح يجي نهار و يتفرق معاها لكن ديما للقدر راي غير لي نتمناوه حنا.
-دخلو لغرفتهم و هوما يتنفسو الصعداء الحمد لله لي قدرو يخدعو وليد و مقدرش يكذبهم شافت فيه نصيرة بحقد و تكلمت: كلو بسبتك ليوم على شعرة و كنا راح نتفضحو قدام ولدك تخيل لوكان صدقها وش كان راح يجرى نأكدلك ساعتها عمرنا ما راح نشوفو وجهو .
-لا مش كلو بسبتي أنتي السبب و أنتي هي راس المشكل من 17 سنة مش أنا انتي لي بديتي توسوسيلي في مخي حتى تخليت على رجولتي و سمحتلك تعملي علاقة مع خويا.
-ألف مرة قتلك معملتهاش راني معملتهاش كل لي عملتو اني....
Flash back:
-مصطفى بلمختاري خو لهادي بلمختاري صحيح يجمعهم نفس الإسم لكن تفرقهم الكثير من الحاجات مصطفى كان رجل عصامي بمعنى الكلمة كان طالب ذكي و طموح تفوقو الدراسي خلاه يحصل على منحة لخارج لبلاد فرنسا ثم قدر يفرض روحو و كسب عمل محترم في شركة تابعة لواحد جزائري عايش ثم سي أبراهيم منصوري في سنوات قليلة قدر يحصل على ثقتو و رجع ذراعو ليمن و منحو اسهم كثيرة فشركتو خلال هاذ المدة تعرف مصطفى على بنت رب عملو فيروز و نشأت بينهم قصة حب كبيرة ...يتبع