كرونيك#الظل

#الظل_الحلقة 161

الحلقة 161:دخل للفيلا هاز فيدو ملف وصل للصالة لقاهم قاعدين و كل وحدة غارقة فعالمها تحسر على حالتهم في قلبو و تمنى لوكان يقدر يخفف عليهم و لو شوي من الوجيعة لي قاعدين يحسو بيها لكن الله غالب هو بيدو مربوط ومش عارف كيفاش يتصرف...قرب منهم أكثر و وقت شافهم منتبهولوش حمحم بشوية حتى يفيقو من سرحتهم...هزت راسها فيه و تكلمت بصوت خافت وقتاه جيت هشام؟؟؟
-شوي هاذا وين..دار بعينيه يحوس عليها لكن مشافهاش سئل والدتو: هند مزال مرجعتش؟؟؟
-لا أنا مشفتهاش يمكن تكون في بيتها عيطلها فالتليفون
-تليفونها مقفول من الصباح و أنا نعيط و مكانش .
-أصبر دوك نقول لنوال تطلع لبيتكم تشوفها ...بعد دقايق هبطت نوال و خبرتهم بلي مكانش فبيتها.
-متحيرش يا وليدي بالاك
طاحلها الشارج و هي متولهتلوش مدير والو في بالك.
-تنهد بحيرة إن شاء الله يا ربي سكت شوية و بعدها تفكر الدوسي لي هازو في يدو...احمم ماما كاين موضوع لازم نقولهولك.
-خير يا وليدي أحكي؟؟؟
-احمم ليوم رحت للمستشفى باش نجيب نتائج الفحوصات سكت مقدرش يكمل...
-كمل هشام و علاه سكتت.
-شاف فيها و رجع هبط راسو مش قادر يقولها هاذ لخبر خايف لا ترفض و ما تتقبلش: متخافيش ماما مش حاجة تخوف أما الطبيب المختص خبرني أنو لازملك زرع صمام للقلب و اقترح عليا اسم دكتور مليح في سويسرا راح تكون عمليتك على يدو مضمونة إن شاء الله
-إذا العملية مش مهمة خليني بلاما نديرها أصلا أنا حاسة روحي شفيت و مبقيتش نحس بحتى وجيعة صدقني.
-عارف ياماما لكن هكذا حتى نتفاداو أي مشكل فالمستقبل على خاطري يا ماما أعمليها و خلينا نتطمنو عليك.
-تكلمت ميساء تايد في كلام خوها: هشام عندو الحق يا ماما مدام العملية بسيطة و متخوفش فديريها حتى نطمنو أكثر عليك..ها وش قلتي
-و الله حصرتوني و مخليتوليش مجال ...خلاص الي تشوفوه لكن على شرط.
-أنتي تأمري قالها هشام.
-حابة ميساء تكون معايا أنت علابالي مشغول و متقدرش تخلي أشغالك لكن على الاقل يكون واحد فيكم معايا.
-وشكون قالك باش نخليك أنا أصلا كنت حابة نبعد من هنا و نرتاح و هاي جات الفرصة المناسبة منها أنتي تشفي و منها أنا ننسى الشي لي جرا.
-وقتاه السفرة يا هشام.
-منا على يومين إن شاء الله راح نبدى فالإجراءات غدوة و كي تلحقو ثم راح تلقاو صاحبي هو راح يعاونكم.
- أنا نخليكم ذك حاس روحي تعبان تصبحو على خير.
-و أنت من أهل الخير ردو الاثنين.
-طلع لبيتو قلقان و متحير و مش عارف حتى وينها حتى و إذا طاحلها الشارج هي قاتلو خارجة مع صحباتها كانت قادرة تهز تليفون نتاع وحدة فيهم و طمنو...بقا رايح جاي فغرفتو كل دقيقة يطلع راسو للساعة و هي مزال مجاتش حاس روحو راح يهبل خاف لا يكون كشما جرالها خايف لا تكون مرمية فكاش سبيطار و هو قاعد هنا مش جايب خبر خلاص صبرو بدا ينفذ..زعما متكونش راحت لدارهم لا مستحيل هند مديرهاش نعرفها مزالت مجروحة منهم و لو يقتلوها مترجعلهمش...