كرونيك#الظل

#الظل_الحلقة 106

الحلقة 106:حكمت خدها مصدومة من كف والدها أول مرة في حياتو يهز يدو عليها سكتت و بقات تشوف للفراغ إذا مش هو مالا شكون لا أكيد هو .
Flash back:
كان قاعد في مكتبو غاطس بين أوراقو حتى يشوف في بنتو دلولتو داخلة عليه فرح بزاف بشوفتها خاصة أنهم ما بقاوش يتلاقاو من بعد زواجها.
-أوووه واش هاذ المفاجأة السارة وينك يا طفلة ما تقولي عندي بابا راه متوحشني نجي نطل عليه و لا سي هشام نساك فينا.
- ضحكت على كلام والدها وقالت:وشمن هشام يا بابا أنا و أنت نعرفو بلي الراجل يكرهني و ميطيقنيش.
-تنهد بحسرة على بنتو و هو يشوف في لمعة الحزن في عينيها عارف روحو غالط و عارف أنو هذا الزوج عمرهم ما راح يتفاهمو لكن أنانيتو خلاتو معمي على هاذ الحقيقة :سامحيني يا بنتي عارف روحي قسيت عليك و ظلمتك لكن صدقيني أنا عملت هذا الشي لمصلحتك و لمصلحة خوك.
-عينين هند اللامعين ما قدروش يصبرو أكثر و طاحو دموعها بلا حساب منها وشمن مصلحة يا بابا و كرامة بنتك تتهان كل يوم من ولد خوك لي ميفوتش فرصة إلا و يعايرني و يهيني إذا كانت هذي هي المصلحة فالله يلعن المصالح لي كيف هكذا أنا تحطمت و مش عارفة آخرة هاذ الزواج وش.
قرب منها يمسح في دموعها و يبوس و الله ما عرفت راح تعاني هكذا سامحيني يا قلب باباك حضنها بكل قوتو و خلاها تبادلو العناق كانت ضعيفة و محتاجة كتف تتكا عليه و تفرغو قلبها و مكانش كيما حضن الأب لي مهما يقسى لكن أول ما يشوف دمعة ولادو يحن....بعدها من حضنو باسها من راسها حكملها وجها بين يديه و تكلم:قوليلي يا هند قوليلي وش حابة و أنا نديرلك لي حبيتي حتى و إذا حبيتي تتطلقي قولي و أنا مستعد نطلقك منو ليوم قبل غدوة.
-كلام باباها فرحها و حسسها أنو سندها عمرو لا تخلى عليها و هاو قاعد يثبتلها في معزتها و قيمتها عندو مسحت دموعها استرجعت أنفاسها و قاتلو:حابة نرد شوية من كرامتي المهدورة حابة نذل ولد خوك كيفما ذلني حابة نعطيه درس عمرو لا ينساه في حياتو عاوني يا بابا عاون بنتك و رجعلها حقها.
-محتاجة تمضيلي على شيك بقيمة****و تخليلي أفضل رجالك هاذ الأيام محتاجتهم.
-لما سمع المبلغ بلع ريقو لكن قدرش يكسرلها خاطرها بعدما وعدها:لي تشوفيه يا بنتي كل لي طلبتيه راح يكون بين يديك.
Back:
-إذا مش أنت مالا شكون رجالك و أنت الوحيدين لي يعرفو بخطتي أكيد أنت لي بلغت الشرطة عليه.
-لهادي مقدرش يصبر لكم الاتهامات نتاع بنتو كان راح يرفع يدو عليها مرة ثانية لكن نزلها مش وقت الضرب بعد هاذ المصيبة تمالك نفسو و تكلم:حاسبتني مهبول نبلغ الشرطة عليه و نجلب الأنظار لينا متنسايش بلي عندنا أسهم فيها و سمعتي ثاني راح تتضر و الأهم منيش مجنون حتى نربح عداوة هشام لكن الغلطة فيا أنا لي تبعتك و خذيتلك رايك و خليتك تدينا للهاوية هشام عمرو مراح يغفرلنا هاذ الغلطة وهاذا الكل بسبب غباءك.
-نزلت هند للارض و هي منهارة:أنا كنت حابة تعطيلو درس خفيف بصح و الله ما خبرت الشرطة و الله ما كانت هذي نيتي إذا مش أنت مالا شكون لي خبرهم؟؟
-أول ما سمع لهادي هدرتها حس بصدقها و عرف أنو كاين إن فالموضوع دار لنصيرة شاف فيها بشك و قالها:نصيرة نقتلك لوكان تطلعي أنتي مولات الفعلة.