كرونيك#الظل

#الظل_الحلقة 163

الحلقة 163:قاعد على كرسي و مقابلو يستنى فيه يحكي
- بعد شوية تكلم: فكرت مليح فالشي لي طلبتو مني و حبيت نخبرك بقراري.
-ايه وش هو يا يونس؟؟؟
-راح نسافر كيما قتلي
-شاف فيه بفرحة و تكلم: هاذا هو يونس لي نفتخر بيه متتصورش شحال فرحتني لكن راح تقدر توفق بين الاثنين؟؟؟
-راح نحاول نوفق و إن شاء الله ننجح.
-تنجح يا يونس تنجح أنا كلي ثقة فيك لكن دير بالك منو راهو مش ساهل خلاص أسرار الدولة كامل تحت يدو.
-كون مطمن مدام يونس الي وعدك فعمرك لا تخاف
-تعرف لو يطيح بين يدينا كامل الأمور راح تتحل و يصير القبض على رؤوس الفساد أسهل بكثير بدأ برئيس الدولة للوزراء لرجال الاعمال راح تكون أكبر عملية تصفية في تاريخ لبلاد
- أنا نخليك لازم لعشية نسافر توصي على حاجة
-لا اتهلى في روحك لما تلحق راح تلقى كل الي تحتاجو
-هزلو براسو و خرج لكن أول ما وصل للباب لقى سهيلة و مروان واقفين عندو
-تكلمت سهيلة و الدموع في عينيها هكذا ماشي و مخلينا و مفكرتش حتى تودعنا
-الله غالب ياسهيلة لما ينادي الوطن فما عليك غير انك تلبي
-خسارة عليك يا صاحبي و أنا آخر من يعلم؟؟؟
-ههه متبكيش برك أصلا بعد شهر راح تكون معايا معنديش ثقة في حد غيرك كمل أمورك هنا و بعدها نحبك مغروس قدامي.
-كيفاه كيفاه يعني راح تروحو ثنيناتكم و تخلوني وحدي.
-شاف فيها بجدية و تكلم: الرائد يونس لما يأمر لازم الكل ينفذ بدون اعتراض.
-بصح..قاطعها مكانش بصح خلي على الاقل تتوحشي هاذ المغبون الي يظال يحاول فيك يمكن غيابو يحنن قلبك عليه
-قلبت شفايفها بغش و هو ضحك عليها جبدها لحظنو و زير عليها: اششت وراس ختي الغالية غير راح نتوحشك...
-ما خرج من مقر خدمتو غير بطلوع الروح سهيلة هبلاتو بدموعها و تخرنينها...ركب موطوه وساق نحو وجهة واحدة....
- بعد ساعة كان واقف قدام دارها طبطب لباب و بعد شوي فتحتلو خلع من حالتها كانت تصعب على الكافر تكلمت وسط شهقاتها: يو...يونس حرام عليك لبارح نهار كامل و أنا نعيطلك و أنت قافل تليفونك..م..مر..يم..هربت مني يا يونس هربت من أمها ورفضت تسمعني مش عارفة وين راحت راح نهبل يا يونس راح نهبل..
- تكلم بهدوء مريم عندي يا عمتي متخافيش..قاطعاتو تحكي بلهفة كيفاه عندك فهمني
-جات لبارح عندي و أنا أنا جيت ليوم باش نخبرك تروحي لعندها راح تصيري تعيشي معاها
-و أنت يخي أنت راجلها
-لا يا عمتي أنا خلاص خرجت من حياتها و معادش نرجع ...لعشية راح يجو رجال يوصلوك عندها
-شافت فيه بشك وين رايح يا يونس؟؟؟
-مسافر و متسقسينيش وين لكن وقت نرجع نحبك تحكيلي كل حكايتك نحب نعرف وش عملو فيك وساعتها نوعدك نشربهم المر.
-ي..عني بعدما لقيتك راح تخليني بعدما لقيت الي نشم عليه ريحة الغاليين راح تروح و تخليني علاه يا يونس علاه.
-الله غالب يا عمتي محتمة عليا نخليك و الله محتمة
-و مرتك وش قالت؟؟؟
-تكلم بجدية تخفي وجيعتو لكبيرة: مرتي متعرفش..لكن راح تخبريها أنت قوليلها يونس راح أنسايه و عيشي حياتك.
-بهاذ السهولة يا يونس بنتي باينة تحبك و تعشق فيك كيفاه عطاك قلبك تخليها.
-مسح على وجهو يهدي في أعصابو مجرد ما يفكر فيها يحس بنار وشعلت في قلبو ....عمتي الله يخليك متزيديش عليا...خليني نروح و أنا مرتاح من جيهتكم...عندي طلب واحد نفذيهولي
-واش هو اتهلايلي في مريم متخليهاش تبكي و لا تحزن الي تطلبها اشريهالها حاولي ديما تزرعي البسمة على وجها ..راح تعيشو في دار أخرى غير داري لقديمة و كل طلباتكم مجابة
-توصي فيا على بنتي يا يونس روح و أنت مطمن أمانتك فالحفظ و الصون.
-قرب منها و جبدها لحظنو حاوطها بيده و باس راسها: كنت متمني نشبع منك أكثر لكن الله غالب ظروف أقوى مني و منك ديري بالك على روحك و ادعيلي ديما في صلاتك راح نكون محتاج لدعواتك...بعد منها يمسح في دمعة سايلة على خدو ركب موطوه و مشى لطريق مش عارف إذا راح يخرج منها حي و لا ميت...