كرونيك#الظل

#الظل_الحلقة 196

الحلقة196:فتح الباب بخطوات ثابتة و راس مرفوع معندو علاش يحشم و لا يخاف الي لازم يحشم هي أمو لي خدعاتو و عيشاتو في كذبة طول هاذ السنين ....طلع راسو لقاها هي و لي كان يحسبو باباه يخزرو ليه بدهشة و الصدمة مرسومة على وجوهم و خصوصا نصيرة لي نطقت اسمو بصوت خافت و بعدها جات ليه تجري و ترمات في حضنو تبكي و تبوس فيه من كل مكان و ما انتبهتش لردة فعلو الباردة...بعدها على حضنو بشوية يشوف فيها و يتأمل في هاذ الإنسانة كيفاش قدرت تخدع و تعيش الكل في خدعتها بكل دم بارد تكلمت وسط دموعها لي أول مرة ميأثروش فيه: علاه يا وليد علاه عامين ..عامين كاملين و أنت غايب ...عامين مقدرتش تعيط و تقول أمي و بابا قلبهم محروق عليا خليتنا نحوسو عليك من بلاد لبلاد وريحتك مكان...قولي علاه هذا كامل علاخاطر ذيك السوسة نتاع ميساء....
-ههج غيابي مش بسبة ميساء بصح بسبتك أنتي
-كيفاه!!!!! ..علاه وش عملتلك أنا؟؟؟؟
-عملتي أبشع حاجة ممكن تعملها المراة في حياتها...قوليلي شكون هو محسن****؟؟؟
-بعدت عليه متوترة و الدم نشف في ركايبها دارت لا إراديا للهادي لي حالتو متقلقش سوء على حالتها يحسبوه عرف أنهم هوما ورا موتو هو مرتو لكن صدمهم و صدم لهادي أكثر وقت كمل كلامو ...
-والا نسيتيه حبك الأول و عشيقك و باباة ولدك قالها بألم؟؟؟
-أنت...أنت...وش قاعد تقول..منين جبت هاذ لكلام؟؟
-جبتو من عندك مش انتي لي كتبتيه بيدك و خبيتي تصاوركم لجمعتكم مع بعض....قرب منها و بدا يخض فيها بعنف ناسي أنها أمو و لاغي كل علاقة تربطو بيها كل لي متذكرو أنو هاذ الام عيشاتو في كذبة طول حياتو: علاه كذبتي عليا علاه مخبرتينيش بحقيقتي علاه خليتيني طول حياتي نعيط لواحد معندي بيه حتى علاقة بابا علاه....يحكي و يشهق وكل كلمة تدخل في صدر نصيرة كيف السكين...يعني خلاص يعني كل شيء عملاتو طول هاذ السنين طاح فالماء يعني السر لي خباتو تكشف يعني بانت حقيقتها و تعرات قدام ولدها وراجلها ...طلعت راسها تترجى فيه بعينيها لي تعباو بالدموع و صارو يسيلو بلا حساب: ول..ولي.د..أسمعني أنا..أنا...قاطعها يصرخ بكل قوتو أنتي واش إنتي واش أنتي وحدة كذابة وحدة كذابة وحدة متستاهلش تكون أم و لا زوجة
-طاحت تبكي و تنوح عند رجليه: الله يخليك سامحني و الله كلشي عملتو علاجالك حتى متكونش منبوذ بين الناس و الله كذبت و خبيت حتى يبقى ديما راسك مرفوع و فخور بأصلك...عارفة لي عملتو غالط بصح حس بيا راني أم و الأم مستحيل تقدر تأذي ولادها ...
-الكذب و الخداع عمرهم لا كان عندهم مبرر كنت راح نرضى نعيش باسم لقيط على أني نكتشف هاذ الكذبة..
-يحكيو و يتناقشو و ناسين الراجل لي وراهم الراجل لي فنا حياتو يربي و يكبر و فالأخير يظهر أنو كان يربي فالوهم كان يدلل و ينادي ولدي لواحد مش من صلبو لا و الأسود من هذا ولد عدوو حس بقلبو تزير عليه و ألم قوي سرا في جسمو سالت من عينو دمعة وجيعة وبعدها طاح مرمي فالأرض....
-دارو ثنينهم مصدومين من مصدر الطيحة ...بقاو ساكتين و طرافهم مشلولة مش عارفين وش يعملو بعدها تكلمت نصيرة بصعوبة: الدو..اء...الد..و..اء...
-راح يجري ليه فتش جيوبو حتى لقاه جبدو و دار ماشي جيهة الكوزينة حتى يجيب الماء...