كرونيك#الظل

#الظل_الحلقة 48

الحلقة 48:فاتت ليلة بيضاء على الجميع حتى واحد فيهم مرقد هاني.
-ميساء الليل و طولو و هي في غرفتها تبكي بعدما دخلتها أمها ليها و غلقت عليها الباب بالمفتاح كانت حابة تنهي حياتها لكن راح تزيد أهلها فضيحة فوق الفضيحة لدارتها عمرها ماتصورت الحب لي طلعها لسابع سماء راح ينزلها تحت سابع أرض وليد قتلها و قتل كل شيء مليح في حياتها صدقاتو و صدقت كذباتو و هباتو شرفها بلا متفكر مرتين و في الاخير هذي جزاتها الخزي و العار من الكل.
-هشام عدى الليل كلو يهوم فالشوارع يرحي فالدخان رحيان مش قادر يروح للدار علابالو لوكان يرجع راح يعمل جريمة فيها كل ما يتفكر الطعنة لطعناتو يحس بالنار شعلت فيه مرمدتلو راسو فالتراب و لي ذبحو أكثر غدرة ولد عمو كيفاه قدر يدير هكذا فيه و فيها مهما كان راهي بنت عمو دمو و لحمو لا و يقولو فيها و هو فرحان كأنو عمل إنجاز الطحان بصح منستغربش منو الدم لازم يحن و مدامو ولد نصيرة فنتوقع منهم كلش.
-فيروز مكانتش حالتها أقل من ولدها عمرها لا تصورت في أسوء كوابيسها أنو ميساء دلولتها دير فيها هكذا تخون ثقتها و ثقة خوها كانت تعرف أنها تحب ولد عمها لكن متخيلتش راح توصل بيها لدرجة تسلملو نفسها باعت نفسها بالرخيص و أنا مستحيل نسامحها و لا نشوف في وجها مرة أخرى.
-وليد بعدما روح من السبيطار ترمى طول على فراشو تأنيب الضمير قاتلو ليوم على شعرة وخسر باباه في جرة استهتارو في لحظة غضب رمى الكلمة لمالازمش يقولها كلمة خرجها و موزنهاش لو كان مات باباه ليوم عمرو ميسامح روحو كان يحسب روحو ينتقم من هشام لقى روحو ينتقم من نفسو و كاد السحر ينقلب على الساحر كل ما يروح فكرو لميساء يحاول يتجاهلو مش عارف السبب هل لأنو حاس في قرارة نفسو بذنبو العظيم لكن خايف يواجه خايف يعترف يفضل الهروب على أنو يحاسب نفسو و يواجهها بالمصيبة الكبيرة لي ارتكبها رقد مع طلوع الفجر بعد أخذ ورد و لقى الحل الوحيد انو يرقد و يرمي كلش وراء ظهرو متناسي القلوب لدمرها و العايلة لي فككها و الطفلة لي حطمها.
- من جهة أخرى بعدما دخلت من الحديقة طلعت لغرفتها و قفت عند بابها حبت تستنى أي واحد منهم تسقسيه على حالة باباها لكن فالأخير خافت يأذوها بكلامهم و يجرحوها خصوصا هند ولات دخلت و تمددت على فراشها تناجي فالنوم ووالو محبش يجيها تخلط عليها كلش ساعات يروح فكرها لوالدها و ساعات ياخذها الحنين لدوارهم و لجدتها و بين الحين و الآخر جي صورتو في مخيلتها طريقة كلامو ريحة عطرو هيبتو و شخصيتو كلها أشياء بقاو راسخين فعقلها رغم أنها حكات معاه وقت قصير لكنو خلى أثر كبير فمخيلتها.
-يونس بعدما ماكمل وقت خدمتو راح طول لدارو عمل دوش خفيف ورقد لكن سرعان مافاق على وقع نفس الكابوس ليجيه ديما حرم عليه النوم و بقا ليل كلو و هو يطلع و يهبط فبزاف أمور شاغلة بالو و بين الحين و الآخر جي صورتها و قت لمست يدو يدها.