كرونيك#الظل

#الظل_الحلقة 98

الحلقة98:فاقت نصيرة على دق الباب تلمست بيدها على المخدة لي توالها بعدها تفكرت أنها راقدة في غرفة الضيوف كل ما تتفكر الطريحة لي داتها ذاتها ترجف و رجليها ينملو عليها في خلقها ما تضربتش بهاذ الطريقة يعطيك كسرة لذوك اليدين يا لهادي الدق قوى و هي مزال ما فتحت لبست كيمينوها وراحت تفتح ناسية وجها غير تحل الباب دخلت فضيلة و هي حالة فمها في شكلها لما تولهت نصيرة لحالة فضيلة تذكرت آثار الضرب لي على وجها قالت باستياء:ادخلي و زمي هذاك الفم كشما يدخلك فيه علاش جايتني على صباح ربي
-نسيتي يا لالة يخي قلتيلي بلي حابة تشوفي تسجيل الكاميرات راني هدرت مع ولد جارتي يخدم فمركز الشرطة قالي غدوة تقدرو تجو لكن بشرط تبيضيلو يدو بمصروفة.
-روحي انتي و أنا دوك شوي و نلحقك و ردي بالك تحكي لكاش واحد.
بعد ساعة كانو واقفين قدام مركز الشرطة نصيرة كانت عاملة خمار على شعرها و حاطة نظارات باش ميعرفوهاش و تولي فضيحة غير دخلو استقبلهم جار فضيلة و داهم لوحد الحجرة غير دخلو شغل تسجيل الكاميرا على ليلة الحادثة بقاو أكثر من ساعة و هوما يشوفو لكن والو الراجل كان ملثم نصيرة فقدت الأمل و كانت رايحة لكن فجاة لمحت حاجة في يد الراجل الملثم رجعت قعدت بسرعة و طلبت من الراجل يكبر الصورة على يدو بدا يكبر بالشوي بالشوي و هنا جاتها الصدمة تفكرت يونس وقت كان يخنق في هند بيديه كان عندو نفس هاذ الخاتم و حاطو فالخنصر قاتلو رجع صغر الصورة غير صغرها تاكدت من شكوكها نفس لاطاي و نفس الصباط لي كان لابسو نهار تقابلو معاه لكن لي ما فهماتوش علاش يونس يضرب في ولد فضيلة وش علاقتو بيه يا خوفي يطلع الشي لي راني نخمم فيه لا مستحيل مستحيل
غير خرجو من المركز طلبت من فضيلة تعيط لولدها تسقسيه إذا يعرف العساس يونس
غير هز على أمو سقساتو إذا يعرفو لكن جوابو كان لا و عمرو لا شافو
نصيرة الدم جمد في ركايبها زعما يكون هو لا لا يا ربي نكون نحلم حتى الاسم نفسو لازم نخبر لهادي و إلا الكارثة تحل على روسنا الماضي مالازمش يرجع
ركبت سيارتها عفست على الفيتاس وراحت للشركة
غير وصلت طلعت ديراكت عند لهادي فاتت على السكريترة و كانها مش موجودة فتحت عليه الباب و دخلت عليه كيف الثور الهايج
لهادي غير شافها ناض ليها باش يخرجها مش حامل يشوف وجها و زيد لاحقاتو حتى لهنا تكلم بصوت ماليه الغش اخرجي عليا وش جابك هنا
لا مانخرجش لازم نحكو كاين مصيبة يا لهادي و إذا طلع صحيح لي فبالي فخلات علينا.
شاف فيها و تكلم باستهزاء هه واش من كذبة راح تكذيبها هاذ المرة
لا مكانش حتى كذبة و هاذ المرة لازم تصدقني:ولد محسن متأكد أنو مات؟؟؟
شاف فيها مصدوم يونسسس!!!!