كرونيك#الظل

#الظل_الحلقة 82

الحلقة 82:بعد ليلة بيضاء فوتها يرحي فالدخان سيجار ورا خوه حب ينسى الخديعة لكنو مقدرش كل ما يتفكر الحالة لي شافها فيها نارو تزيد تشعل حس روحو طرطور و حبو يفوتوها عليها حبو يديرو بيه طريق و يمشيو أحلامهم على حسابو هو غل على مريم و على عايلتها و كرهو ليهم صار مضاعف غرايمهم كثرو و حان الوقت لي يدفعو فيه كل شي.
عمل دوش خفيف يمحي بيه آثار الدخان لبس قشو بسرعة و هو عازم على حاجة وحدة و لازم ينفذها غير نزل من الدرجات لمح أمو فالصالة رايحة جاية وجها أصفر و عينيها ذبلانين الظاهر حتى هي مرقدتش وصل عندها غير شافتو راحت تجري ليه ملهوفة:هشام ولدي كيف صبحت.
-تكلم بصوت تعبان بخير يا ماما نقولو بخير و انتي وش بيك بنتيلي مريضة.
-لي وقع البارح مخلانيش نرقد حاسة روحي في كابوس مش قادرة نصدق مريم الطفلة العاقلة الحشامة دير هاذ الشي لو كانت وحد أخرى ممكن نتوقعها منها لكن مريم و الله تصدمت.
-صدقي يا ماما صدقي لو ما شفتهاش بعيني يمكن نكذب لكني حكمتها بالجرم غدرتني و غدرتها كبيرة بزاف.
-و الحل يا وليدي العرس بعد غدوة و الناس راح تاكل وجوهنا إذا لغينا كيفاه نديرو و ميساء مش بعدما قربنا نسترو عليها و نلغيو كل شي ليلة كاملة و أنا فايقة و معرفتش وش المعمول.
-تنهد و قالها متخافيش الحل عندي و العرس راح يتقام و في وقتو.
-يعني راح تتزوج بمريم بعد الفضيحة.
-لا مريم حرمتها على روحي و كلمتي قلتهالهم و مراحش نعاودها.
-فهمني يا هشام راني مفهمت والو.
-سكت مدة بعدها تكلم الكلمة لي صدمتها راح نتزوج هند.
-ناضت فيروز مخلوعة كييفااه بصح يخي كنت مش حاملها و لا قابل بيها كيفاه حتى غيرت رايك.
-كاين بزاف حوايج تغيرو و قراراتي تغيرو معاهم.
-و عمك زعما يوافق على هاذ الشي.
-ضحك ضحكة طويلة:هههههههههه و لوكان نقولك بلي عمي هو بنفسو راح يطلب مني هاذ الشي وش تقولي.
-لا مستحيل لهادي يقولها.
-اوكي أصبري و راح تشوفي بعينك غير كمل كلامو صونا تليفونو مع هزو شاف عمو يعيط هزو و قربو من فيروز لي غير شافت الرقم استغربت قاتلو و هي مصدومة:راح دوخني هاذ العايلة كل ما نقول فهمتهم نلقا روحي مش فاهمة والو.
-هز هشام بورطابلو و مفاتح السيارة و تم خارج و هو يضحك في خاطرو:من اليوم راح نلعب اللعب لي يليق بيكم يا عايلة لهادي بلمختاري.