الحلقة 183:هز بورطابلو و كلم واحد من جماعتو: محمد سحنوني نحبكم تراقبوه مليح و أي حركة مشبوهة أعلموني بيها....كمل يسوق و هاذ المرة الوجهة هي نقطة البداية ....بعد دقايق وصل للعمارة لي ساكنة فيها مريم و عمتو غير دخل لقا جماعتو ثم يستناو فيه قرب لعندهم: و تكلم لوين وصلتو....تكلم واحد فيهم رانا نشوفو فكاميرا العمارة يمكن يكون لي خطفها هزها من هنا ...مال براسو و دور البيسي ليه يشوف في اللقطات و يثبت فيهم مليح...بقا على هذا الحالة ساعة...حتى يشوف في طومبيل مش غريبة عليه عقد حواجبو باستغراب و بعد شوي نزلت مراة لافة شعرها بخمار و عاملة لينات كبار مغطيين نص ملامحها...المراة بدات تقرب بشوي بشوي حتى وصلت لعند العساس حكات معاه شوي و بعدها رجعت ركبت فطومبيلها ضرب رجلو على الارض بغش:الله ينعلك كيفاش مخممتش فيها...مسح على لحيتو و صرخ في وجوههم: جيبولي العساس هنا....ما هي إلا ثواني حتة كان قدامو مخلوع و مش فاهم حاجة...دورلو البيسي وقالو: هاذ المراة وش حكات معاك؟؟؟؟؟
-سيدي جات تسقسي على مدام مريم و على راجلها قالت هي قريبتهم و حابة تزورهم أنا قلتلها كاينة مريم صح ساكنة هنا بصح هي مش متزوجة هي مطلقة حسب علمي و عايشة مع أمها ....
-شاف فيه بشك: هذا مكان....
-الراجل بلع ريقو بصعوبة صدقني هذا مكان سيدي.
-روح كمل خدمتك و إذا تفكرت أي حاجة خبرنا بيها...بقا يشوف فالتسجيلات لكن ما بينولو والو(ملاحظة:لما قارا لهادي قارا شوي بعيد يعني الكاميرا متقدرش تحكم عليه و على طموبيلو) غلق البيسي بغش و جا باش يمشي....شاف لابوليس وصلو نزلو و نزل معاهم هشام....شافو في بعضهم بحقد...قرب هشام لعندو و تكلم: أنت وش قاعد دير هنا؟؟؟
-تبسم باستهزاء: مليحة هاذي قاعد قدام داري تسالني
- هشام دخلو الشك من هاذ الراجل حاس أنو يعرفو حاس أنو مش غريب عليه صوتو مألوف بالنسبة ليه عيا يعصر مخو لكن والو سألو بفضول: شكون أنت؟؟؟
-قرب منو بحقد و غيرة: أنا لي إذا مبعدتش على مرتي راح نسفرك لعالم البرزخ..
-ههه عامين و أنت مطيش مرتك وذرك برك وين تفكرتها
-لوكان تهتم بأمورك و بمشاكلك مش أحسن ما تدخل بين راجل و مرتو قالو هاذ الكلمتين و دار ماشي صوب طومبيلو ركب و ديمارا رايح للمخبزة لي راحت ليها عمتو و قبل ما يوصل كلم رجالو و وصاهم يراقبو نصيرة و يعسو كل حركة تعملها أكيد هي ورا الخطف راح يستنى و يشوف إذا قدر يوصللها بهاذ الطريقة و إذا مقدرش حلو الوحيد يخطف نصيرة.....لكن الشي لي محيرو نصيرة علاه تخطف عمتو وش مصلحتها من هاذ الشي....ندم و ندم بزاف اول مرة يحس روحو عمل غلطة كبيرة كان لازم يسمع لعمتو قبل عامين هي كانت راح تحكيلو كلشي لكنو زرب سافر و هاهي نتيجة تسرعو داخل في دوامة و مش عارف يخرج منها....
- في مكان آخر كانت رايحة جاية راح تهبل إذا يونس مش مع مريم مالا وينو يعني يكون صح طلقها....اووف مصيبة هي كانت الخيط الوحيد لي راح يوصلني ليه...اخخخ لازم نلقاك يا يونس لازم نلقاك و نقتلك بيديا زوج لازم ....تفتح باب الغرفة و دخل لهادي و تبسيمة غريبة مرسومة على وجهو...دارت ليه و تكلمت باستهزاء: لوكان بتت برا خير علاه جاي بكري
-مراحش ندير عليك و على هدرتك خليني نروح نرقد شوية راني تعبان.
-سما شايفني حيط قدامك تروحلي في نصاص الليالي و لازم نسكت و منسقسيش.
-اووف يا نصيرة قتلك ذاك العام مكان لاه تلعبيها الزوجة الصالحة لي تخاف على راجلها .
-هه تعرف وش هي أسوء حاجة فيك رغم أنك معمر مساوئ ...أنك نكار للخير أنا لي عاونتك و أنا لي كنت نخططلك لكلشي و لو مش أنا عمرك ما تحلم توصل لربع لي راك فيه بالاك تقول هاذي نية و تسكت على حقها و كيما غدرتها و خنتها قبل عشرين سنة و سكتت و رضات راح ترضى ديما بغدري و مهما نعمل فيها لا يا حبيبي أنا ماسكتت غير على مصلحتي و مصلحة ولادي رضيت بخمجك و حطيت حجرة على قلبي بصح نصيرة مش فكل مرة تسامح تغلط مرة و زوج لكن فالثالثة نقتل و ما نرحمش.
-شاف فيها بملل و رهبة في نفس الوقت يعرفها شيطان و يعرفها قد كلامها و تهديدها: من لخر المطلوب أحكي خليني نتخمد شوي
-وين كنت حتى لهاذ الوقت؟؟؟؟
-هه الظاهر يا نصيرة الكبر بدا يأثر عليك نسيتي ليوم بلي كان موعد دخول السلعة و اذا مش مصدقتني تقدري تتأكدي
-سكتت و مانقشاتوش نسات خلاص هذا الشي لكن رغم هذا قلبها مش مطمنها و حاسة وراه حاجة
أنت تقرأ
كرونيك#الظل
Romanceقصة رومنسية درامية إجتماعية تجمع في طياتها الكثير من المشاعر المتناقضة و الأحداث المشوقة من حقد و كره و إنتقام🖤🖤🖤🖤و من عشق و غرام و هوس ❤❤❤معاناة و تضحية 😢😢😢حب من طرف واحد💔💔💔و الكثير الكثير من المفاجآت 💣💣💣💣💣💣💥💥💥💥💥💥💥🔞🔞🔞
