كرونيك#الظل

#الظل_الحلقة 174

الحلقة174:حط يدو على كتفو و تكلم بكل فرحة: ألف مبروك
-هز راسو و قام من سجود الطويل وقف و الدموع مالية عينيه: خيرك عمري لا راح ننساه الشي لي عملتو خاطري كبير و كبير بزاف و مش عارف كيفاه نردهولك.
- أنا معملت حتى شي يا محمد أنت كنت مظلوم و ربي مستحيل يرضى بالظلم كان لازم يجي نهار و كل شي يرجع كيما كان و يبان الحق و يزهق الباطل.
- أنا عارف فضل ربي لكن حتى أنت ليك دور من بعدو سبحانو.
-هيا خلاص ذوك مرحلة السجن طويناها لكن متنساش مزال قدامنا تحدي كبير بزاف صحيح ظهرت برائتك لكن مزلت في دائرة الإتهام و القضية رجعت تفتحت من جديد لذلك لازمك تعاوني حتى تكشف برائتك نهائيا و نظهرو المجرم الحقيقي علابالي راح نكونو قدام تحدي كبير خصوصا أنو لهادي راح يكون محل اتهام و هاذ الشي مش ساهل لهادي مش مجرد شخص عادي هو رجل أعمال و سياسي كبير و مدعوم من وزراء و جنرالات و باش يتوقف قدامو للمحكمة هذا بحد ذاتو إنجاز .
-شاف فيه و لمعة الانتقام تلمع في عينيه و أنا نوعدك أني نذوقو أضعاف لعذاب لي شفتو..خبطلو على كتفو خوذو وعد من عند عمك محمد....بعدما كمل كلامو جاو زوج حراس حتى يرجعوه للسجن ثم يكمل إجراءات خروجو و يلم ثيابو و لوازمو....
- بعد نصف ساعة فالسجن و داخل الزنزانة كان يودع في زملائو بالواحد و الكل يبكو على فراقو كان نعم الناس و عمرهم لا شافو و لا سمعو منو حاجة العيب معرفتو كانت كنز بالنسبة ليهم خذاو منو الكثير من العبر و الدروس و كسبو أخ و إبن و أب ليهم .....وصل لعند آخر واحد فيهم يوسف رفيق الدرب لي تشاركو نفس الزنزانة من عشرين سنة يوسف واحد من لي قسات عليهم الدنيا و عطاتهم بظهرها دخل بسبب جريمة شرف لقى مرتو تخون فيه مع واحد على فراشهم هبل و عقلو غاب ساعتها الغش عماه و ماكان منو غير يروح للمطبخ يجيب سكينة حتى يذبحهم الزوج لكن الطحان هرب و مبقات فالواجهة غير مرتو واقفة ملفوفة بدرا راح تهرب لكنو حكمها قبل ما تخطي خطوة لبرا رجعها من شعرها كسلها على الارض و بدا يطعن فيها بكل غل و بكل حقد مشفاش غليلو حتى عمل من جثتها سيار....
-قرب لصاحبو و حظنو بكل حب و دموعهم في زوج تسيل : راح نتوحشك صاحبي...
-ههه متخافش شهرين و نكون مغروس قدامك .
-هه و أنا لي قلت يكون كره مني خلي يتهنى مني شوية.
-متقولش هكذا يا صاحبي يشهد عليا ربي لو مكنتش معايا طول هاذ السنين نقسملك أني نتحرت من زمان أنت مش مجرد صاحب لا أنت خويا لي مجابتوليش أمي.
-دخل الحارس قطع هاذ العناق و تكلم : محمد هذاك هو جا الوقت....بعد من حضن صاحبو دار للباقي ودعهم بيدو وخرج وهو مش عارف وش مزالت مخبيتلو الدنيا زعما راح تنصفو هاذ المرة و تعوضلو شوي من الي عاشو و لا راح ترجع تعطيلو بظهرها مرة أخرى .....تقفل باب الحبس و بقا واقف هاز على ظهرو كابة صغيرة مسح على وجهو و بدا يمشي راجع لنقطة البداية .......في كل خطوة يخطيها دهشتو تزيد تكبر المدينة تبدلت و البنايات لقديمة تغيرو ببنايات أكبر و أضخم الطرق تبدلو و السيارات مبقاوش كيما خلاهم...معقولة عشرين سنة صرا فيهم كامل هاذ الشي..ضحك في سرو حتى هي عشرين سنة مش شهر و لازوج....
-بقا يمشي و يمشي حتى بدا يقرب بالشوي من الحي نتاعو قلبو بدا يوجع فيه و الذكريات لقديمة بداو يجتاحوه دخل لوسط الحومة و وقف قدام بيت صاحبو تنهد بوجيعة و حسرة حط يدو على الحيط و دمعة حارة نزلت من عينو: يشهد عليا ربي لا أذيتك ياصاحبي ...لكن نوعدك نظهر الحق و نبين شكون لي عمل فيك هاذ الشي....نزل يدو بألم و كمل يمشي لدارو الدار لي شهدت أجمل لحظات حياتو كيما شهدت أتعسها شهدت الحب كيما شهدت الخيانة شهدت العشق كيما شهدت لوجيعة راجعلها ومش عارف كيفاه راح يقدر يعيش فيها.