كرونيك#الظل

#الظل_الحلقة26

الحلقة 26 :فاتو الأيام يجريو موقعش فيهم أحداث كبيرة - وليد و ميساء كثرو خرجاتهم مع بعض بلا ميعلمو العايلة بها ميساء كانت تعيش فأجمل أيام حياتها علابالها بلي وليد ميحبهاش و علابالها بلي حاب يتزوجها باه يرضي باباه فقط لكن رغم هذا هي راضية راضية بقربو راضية أنو يكون ليها بالجسد فقط و القلب موش ليها راضية أنو يكون وليد بلمختاري زوج ميساء بلمختاري و حتى طفلة متقدر تقرب منو أما الحب فأكيد مع الزواج و العشرة راح يجي - من جهة أخرى كانت خطتو تمشي كيما حب هو ميساء كل يوم تزيد تتعلق بيه أكثر و أكثر يستنى فالوقت المناسب للتنفيذ. - هند طول هاذ الأيام هادية نص و قتها معدياتو خرجات و سهرات مع صحباتها تهيأ في روحها نفسيا باه تبدا في الخدمة و مواجهة هشام. -هشام من ذاك اليوم لي تخاصم فيه مع أختو و هو متبدل دارهم ميروحلهاش غير في وقت متأخر من الليل ينسي في روحو بالخدمة و السبور لكن رغم هذا مقدرش غاضتو بزاف من أمو و أختو هو حاب يحافظ عليهم حاب يحميهم لكن هوما مش حاسين مش عارفين الشيء لعارفو هو يعتبرو فيه ذاك الأخ المتسلط المتجبر لحاب الكل يمشو بأمرو أحيانا يفيض بيه الشيء و يحب يروح لأمو و أختو و يحكيلهم السر لكن علابالو مش يقدرو يتحملو إذا هو راجل و مش قادر كل ما يتفكر فما بالك هوما. -لهادي طول هاد الأيام و هو على أعصابو سكوت نصيرة مخوفو و موترو يعرفها مليح و يعرف بلي إذا سكتت معناها راها دبر لحاجة كبيرة لمشكل هي حاكماتو من اليد لتوجع و إلا كان عندو معاها تصرف آخر. -نصيرة طول هاد ليام و هي تفكر و تخطط لأول خطوة مبقاش بزاف و جيب مريم و تفاجأ بيها الكل راح تلعب الكل على صباع يديها القصة ملكها و هي لي راح تكتب السيناريو. -يونس الحلقة الغامضة فهاذ الحكاية يخطط و يدبر و يستنى فاليوم الموعود لي راح يكشف فيه أسرار الهادي خيال هند يزورو من الحين للاخر ما ينكرش إعجابو بيها لكن لازم يوؤد هاذ الإعجاب قبل ما يوقع فالمحظور -مريم المسكينة قتلتها الوحدة بعدما راحو الناس و بقات وحدها بين أربعة حيوط دموعها حلفو لا يجفو و كيف يجفو و رفيقة الروح طلعت لمولاها و خلاتها غريبة فهاذ الدنيا حتى و ظهر عندها أب و عايلة لكن هاذ الشيء مراحش يخفف من حزنها و لا قهرها عارفة روحها رايحة لمصير مجهول إلا أنها مهتمتش و كيف تهتم بعد ما راح الغالي .