كرونيك#الظل

#الظل_الحلقة 171

الحلقة171:دخل لغرفتو لقاها على حالتها عامين هاذي و هي مش على بعضها غياب وليد مهبلها ومش مخليها ترقد الليل مش عارفة وش صرالو خلاتو الصباح لاباس عليه غير رجعت قالولها الخدم هز فاليزتو و مشا فالأول تحسبو زعفان على طلاقو من ميساء لكن طول بزاف و هاذ الشي مش مبرر أنو يروح و يحرمهم من شوفتهم عامين كاملين...
-غير شافتو راحت ليه تجري: ها خبرني كشما عرفت عليه.
-هبط راسو و سكت مش عارف وش يقوللها...لكن هي غير شافتو ساكت عرفت بلي مكانش حتى جديد...نزلت دمعة حارة من عينها: يعني مكان والو الطفل خلاص بح فص ملح و ذاب راح نهبل يا لهادي و الله راح نهبل.
-يشوف في دموعها و قلبو واجعو معرف يواسيها و لا يواسي روحو بين ليلة و ضحاها صارو وحيدين ضيعو ولادهم في زوج و خسروهم..تنهد بألم هز راسو بشوية و تكلم: آخر مرة شافوه فيها كان فاليونان و من بعدها زاد خرج يمكن حاليا يكون فصربيا راح نزيد نسق مع السفارة ثم حتى نتأكد من مكانو حاس أنو هاذ المرة راح نلقاوه.
-تنهدت بأمل : إن شاء الله يا لهادي إن شاء الله و الله قلبي حاستو راح يخرج من الوحش ...صونا تليفونها شافت الرقم تلبكت و بدات دخل و تخرج فالهدرة: أنا..أنا..نروح نشوف الخدامات لتحت قلتلهم يلمعو أواني الفضة منعرف إذا كملوهم..خرجت تسرسب كيف الفار مخلية لهادي وراها يضحك بمكر: ههه حاسبتني داب حتى نصدق خدعتك باين ورا هاذ التليفون حاجة..هز بورطابلو دون رقم و اتصل بيه: اسمعني مليح ليوم مدام نصيرة ممكن تخرج نحبك تبعها مليح و تعرفلي وين راحت...
-حاضر شاف..حبيت نقولك خبر آخر...السلعة ليوم إن شاء الله تدخل للبور.
-صحيت و خبر لجماعة يحلو عينيهم مليح منحب حتى غلطة و ذرك دير لي قتلك عليه.
-دخلت تجري لغرفة الضيوف قفلت الباب وراها فتحت الخط و تكلمت: علاش عيطت.
-الظاهر أنو فكرتي نجحت و القطة طاحت فالفخ ليوم جات تزور قبر جدتها و قدرت نعرف عنوانها .
-تبسمت بانتصار: صحيت نستعرف بيك ابعثهولي ذرك في ميساج....قفلت الخط و عينيها يلمعو بخبث : أخيرا لقيتك يا يونس.
Flash back:
قبل أشهر كانت فمكتب المحقق رايحة جاية راح تهبل و تعرف وين صارت كل يوم عايشة حالة رعب و خايفة لا كشما يعمل فيهم دارت للمحق و عينيها شاعلة بالغضب: يعني صارلك شهور و أنت تبلع فالصوارد بلا فايدة بلاك حاسبني حالتلك بنكا هنا و أنا مش فايقة شوف يا تلقاه يا خليني نشوف محقق آخر.
-شاف فيها و هو يبلع في ريقو: و الله تقول جني مش إنس كامل معلوماتو الشخصية مخفية أنا صرت متأكد أنو هاذ الشخص عميل فالمخابرات و إلا الانتربول لانو حتى رجال المافيا و تقدري تتعقبيهم.
-و هاذ الشي لي مخوفني خايفة يكون من المخابرات ساعتها نترحم على روحي و الحل كيفاه مكان حتى خيط عليه .
-نسقسيك أنتي تعرفيه هو برك متعرفيش عايلتو صحابو؟؟؟
-وشمن عايلة وشمن صحاب أنا نقولك الراجل مقطوع من شجر...طلعت يدها لفوق و خبطت بيها راسها: الله ينعلني الله ينعلني كيفاه راح هاذ الشي من بالي
-شاف فيها متعجب: وش هو!!!
-مرتو مريم مرتو هي الخيط الي راح يوصلنا ليه
-ضحك بفرحة: ايه و علاش مقلتيش هاذ الشي من الاول اعطيني معلوماتها
-سجل عندك: الاسم مريم*** السن **..
-ايه كملي
-واش نكمل هاذا وش كاين
-العنوان..تقرا ..تخدم..إسم عايلتها..صحابها...
-العنوان لوكان جيت نعرفو مش حتى نجي لعندك و ما تقرا ما تخدم ما عندها عايلة رباتها مراة و ماتت هاذ المراة عندها قريب عامين ملي ماتت.
-بفف يعني حتى هي صعيب باش نلقاوها.
-دبر راسك هاذ المرة يا تلقاها يا ترجع كلشي ديتو بالفرنك.
-بلع ريقو من الخوف :هاذ المراة لي رباتها كانت حنينة عليها؟؟؟
-وش هاذ السؤال: أكيد حنينة عليها.
-مالا تكون ديما تزورها في قبرها.
-شافت فيه باستغراب: وش قصدك
-لي نقصدو أنو المكان الوحيد لي نقدرو نلقاوها فيه هو قبر جداها لما جي تزورها.
-صح كيفاش راحت هاذ الفكرة ممن بالي.
- أعطيني عنوان المقبرة و اسم المراة نروح ثم و نوصي واحد يعيطلي وقت يشوفني لكن لازم تزوديلي شوية دراهم يمكن نطيح فواحد طماع و يطلب بزاف.
-شافت فيه بملل مكانش طماع قدك.
Back:
وصلها العنوان في ميساج قراتو و خرجت من الغرفة تجري.