الحلقة 115:بعدما خرج من عند هشام ركب موطوه متوجه للدار لكن وقف أول ما شاف بيجوتري بقا يتذكر فكلام سهيلة الصباح زعما صح يكون ظالمها لكن هو أصلا تزوجها باش يعذبها و يخلف ثارو منها مش باش يدللها و يشريلها و يفرحها عاود عفس على الفيتاس و ديمارا ماشي خلاص ميهمنيش فيها مش علاجال هدرة سهيلة نضعف و نستسلم أصلا هي مرتي غير بالورق الخاتم ماعندو وش يغير غير أنها تبان للناس أنها متزوجة أول ما جات الفكرة لبالو كفر في سرو و كسر الدورة راجع للبيجوتري الله ينعلني يعني ليوم خرجت و شافوها الرجال مش دايرة خاتم أكيد قالو مش مرتبطة و حطو عليها العين أوففف يا يونس كيفاه راح من بالك هاذ الشيء وقف عند البيجوتري و بقا يخير فالأنواع حتى عجبو خاتم بسيط من الذهب الأبيض فصو زهري خلص مول لمحل و رجع من طريقو.
-عند مريم دخلت للدار و هي فرحانة بعدما وصلتها سهيلة حلفت عليها باه تدخل لكن هي رفضت حطت الاكياس و قعدت تتذكر فنهار اليوم لي تعتبرو من أجمل أيام حياتها فتحت كيس و جبدت منو فستان أزرق ملكي طويل بأكمام مكشوفة ضيق من فوق و بعدها يوساع عند الخصر قاستو و بقات تتمايل بيه و هي فرحانة تذكرت لما كانت فالمحل و محبتش تشريه لانها مش حابة تثقل على يونس و يقول ما صدقت عطيتلها دراهم لكن سهيلة أصرت عليها و حلفتلها ما تخرج غير و هو في يدها.
-تفتح الباب و مريم غايسة ففستانها دور و تميل فخصرها يمين و شمال غافلة على العينين لي يراقبو فيها راح ياكلوها من شدة رغبتهم و إعجابهم أول مادارت دار معاها شعرها الطويل و هنا يونس غمض عينيه لا هاذ الشي بزاف عليه لازم ميشوفش أكثر و إلا مش راح يقدر يتحكم فروحو أكثر .
-مريم لما شافت وجهو حمار مغمض عينيه و كابس على يديه لزوج تحيرت و ترعبت عليه خافت ليكون مريض و موجوع من غير ماتفكر مرتين تقدمت منو و هي مش واعية بالشي لي تقوم بيه كانت كيف المخدرة رايحة ليه و مش هامها ردة فعلو غير وصلت عندو دقات قلبو تسارعو و حرارة جسمو طلعت أكثر تسائل في نفسو وش دير هاذي مش حاسة أني مش قادر نصبر مش فاهمة أني حاب نبعد و نهرب منها و هي بكل سهولة جاية عندي تتحدى فيا و في كياني و في قلبي و صلاتو الإجابة أول ماحطت يدها الصغيرة الدافية على جبهتو و تسائلت بكل براءة :يونس أنت مليح؟؟؟؟غير سمع إسمو خلاص فقد صبرو و كل إنش من جسمو صار ينادي عليها صار راغب فيها و هابل عليها نار و شبت في صدرو قلبو خرج عن طوعو و قالو أعمل حل و إلا نتمرد و ندير وش متمني ندير من زمان حل عينيه حاب يعرف كيفاش تفكر هاذ الطفلة زعما صح خايفة عليا زعما يهمها أمري و متحيرة عليا تمنى تعاود تذكر إسمو مرة أخرى حاب يستمتع بكل حرف يخرج من شفايفها الكرزيتين حاب يستطعم إسمو و يعمل من حروفو أجمل سمفونية عازفتها آسرة عقلو و محيرة أمرو ... مريم مكانتش من العاكسين و لباتلو رجاؤو غير شافتو سكت عاودت سئلت :يونس قولي وش بيك موجوع من حاجة...ضحك في سرو و تسئل فيا إذا موجوع إيه موجوع لكن موجوع منك و من قلبي لي ملقيتلوش حل وش نعمل معاك يا مريم وش نعمل و الله راح نهبل خايف نتبع هاذ القلب و بعدها نندم و نتعذب و هاذ القلب طاب من العذاب و مش راح يتحمل عذاب آخر طلع يدو لقلبو يهدي في دقاتو تمالك روحو و خرج كلماتو: معامن حكيتي ليوم؟؟ضحكتي لكاش راجل؟ عجبتي كاش راجل؟؟قولي و الا درتي رايك و قلتي خلي نستغل الفرصة مدام يونس غايب و مش راح يشوفني...كانت تسمع لكلامو و هي مصدومة شوف هي وين و هو وين دايما يشوف فيها بنظرة شك دايما يتهمها و يجرحها بكلامو عينيها تعباو بالدموع و قبل ما تأذنلهم بداو يطيحو قاتلو بصوت مرجوف:مريم رباتها حليمة تصون راجلها و تحمي شرفو حتى لو كان هاذ الراجل في آخر الدنيا و مش خوفا منك راح نصونك و نحافظ عليك لكن خوفا ملي أكبر مني و منك ...دارت رايحة مش قادرة تبقى معاه أكثر و تسمع إهانة أخرى لكن قبل ما تمشي جبدها لحظنو وزير عليها بذرعيه حتى قريب تدخل وسط ضلوعو مريم و كأنها ماصدقت لربي حتى تخرج هم قلبها فالبكى أما هو فكل دمعة تخرج من عينها كانت كيف الجمرة تكويلو في قلبو كي دمو فار و تمنى يتقطع لسانو قبل ما يخرج كلامو المسموم بقات مدة و هي في حضنو حتى هدات و سكنو شهقاتها بعدت عليه و هي حمرة من الحشمة لكن غير مشات خطوة عاود رجعها ..خرج علبة من جيبو فتحها و خرج منها خاتم تحت نظراتها المحتارة و المتسائلة لكن مخلاش تساؤلها يطول و جبدلها يدها قرب الخاتم منها و بدا يدخل فيه بشوية وسط صبعها الرقيق ...مريم ذابت و داخت مش مصدقة لي قاعد يعملو يعني هاذ الخاتم ليها يعني تفكرها يعني خمم فيها و شرالها حاجة منو ليها فاقت من سرحتها على بوسة مرصوصة فوق جبهتها خلات السخانة تغزو جسمها تخلخل عروق قلبها و تسرع دقاتو حبت تهرب منو و من إحساسها إيه لازم تهرب قبل ماترجع ليه و تحضنو و هاذ المرة مستحيل تخليه لكن غير جات ماشية وقفها صوتو:نقتلك يا مريم نقتلك لوكان يتنحى من يدك
عملتلو إيه براسها وراحت هاربة للحمام و البسمة مالية شفايفها.
أنت تقرأ
كرونيك#الظل
Romanceقصة رومنسية درامية إجتماعية تجمع في طياتها الكثير من المشاعر المتناقضة و الأحداث المشوقة من حقد و كره و إنتقام🖤🖤🖤🖤و من عشق و غرام و هوس ❤❤❤معاناة و تضحية 😢😢😢حب من طرف واحد💔💔💔و الكثير الكثير من المفاجآت 💣💣💣💣💣💣💥💥💥💥💥💥💥🔞🔞🔞
