كرونيك#الظل

#الظل_الحلقة[9]

:تعمر القصر بالزوار لي جاو يهنيو مدام نصيرة و مسيو لهادي على تخرج بنتهم كانو كلهم من الطبقة المخملية لتهمها غير المظاهر تلقا نساهم يحكيو غير على الالبسة و لي مارك ووين يجوزو ليفاكونس نتاعهم كل عام و رجالهم يحكو غير على التجارة و الارباح حديثهم غير بالملايين و الملايير يستغلو كيما هذا الجمعات باه يقويو علاقاتهم و نفوذهم أصحاب المال يستغلو أصحاب السلطة والعكس صحيح - كانت الفوق دير فاخر رتوش المكياج طلتها ساحرة فستان أحمر قاني مع عقد ألماس رقيق مزين عنقها الطويل و صندالة كحلة طالوها عالي نظرت لروحها نظرة أخيرة كانت راضية على شكلها قبل متخرج دخلت عليها أمها و من وراها فضيلة هازة في يدها زوج علب - *نصيرة* :خموس على بنتي ربي يحفظك من عين العديان متخرجيش حتى نجيبلك شوية ملح نسبحلك بيه نعرف عينين المسمومات لراهم لتحت يا لطيف منهم ضحكت هند على أمها :ماما مازالك تامني بهاذ الخرافات وشبيك وشمن ملح و شمن تسبحيلي يهديك ربي *نصيرة*:إيه أضحكي أضحكي على أمك زعما كي قريتي فالخارج عينيهم مش راح تضربكم سقسيني أنا لنعرفهم و نعرف خبثهم. كانو هوما يحكيو و فضيلة تسمعلهم و تحكي بينها بين روحها:وش بي جدهم هادو يحكو على العين لوكان نبقى نعاين فيك طول حياتي ألف فرنك مش راح تنقص من ثروتكم بففف يخي مخلوعين ياو حنا لتحكم فينا العين مش نتوما ما تفيق من سهوتها غير على عيطة نصيرة:يعطيك الطرش ساعة و انا نقولك هاتي الكادوات للالاك *فضيلة*سامحيني لالا كنت نخمم فالخدامات لتحت كشما يديرو غلطة وأنا مش معاهم *نصيرة*:إيه خلاص فهمنا راح تحكيلي قصة حياتك هذاك مخصني هاتي الكادوات و طيري من وجهي لا استناي فضيلة تكلمت هند هنا فضيلة ضحكت من الوذن حتى الوذن عرفت بلي هند منساتهاش في الكادو تقدمت منها و عطاتها كيس فيه مونطو فورير اصلي فضيلة عينيها تحلو على آخرهم:ربي يخليك لينا لالاة ويحققلك وش تتمناي و خرجت تجري ضحكتلها نصيرة ضحكة خبث و قاتلها :برافو عليك بنتي لازم يدك تكون سخية مع هاد الاشكال متعرفيش الزمان وش مخبيلك و ممكن يجي نهار و تحتاجيها جاوبتها *هند*:وي علابالي ماما هيا نهبطو طولنا *نصيرة*:أستناي تشوفي وش شريتلك خلي لمبعد طولنا على الضيوف.