كرونيك#الظل

#الظل_الحلقة 75

الحلقة 75:راح يجري بدل قشو و خرج من الباب مخلي لعساس لآخر ينادي عليه لكنو مجاوبوش راح يجري ناحية موطوه لبس لكاسك نتاعو و بعث ميساج:أبعثيلي عنوان فضيلة ما فاتتش خمس دقايق حتى وصلو ميساج بالعنوان قراه عفس على الفيتاس وراح طاير للحي نتاعها.
-بقا سوايع و هو متكي على موطوه قدام بيتها يستنا في ولد فضيلة يجي لكن لحد الآن مزال مابانش حل الليل و ريحتو مكانش لكن ميأسش و متحركش من مكانو حتى شاف واحد من بعيد جاي جيهة الدار يمشي و يترنح قرب من البيت مد يدو للجيب باه يجبد المفتاح لكن يد يونس سبقاتو و عطاتو دبزة نساتو في حليب أمو دار ليه مخلوع و تكلم بصوت متلعثم ش..شكون أنت
-حكمو من كول الفاست و تكلم بصوت مغلول أنا عزرين لي راح يقبض روحك و يعطيه بدبزة أخرى للراس جابتو طايح للارض و تمد فوقو يضرب فيه من كل جيهة خرج فيه كامل غلو و زعافو خلى وجهو ميبانش من الدمومات و الجروح لي عملهم لكن هاذا مشفاش غليلو و قف ووقفو معاه و دورو بحيث ظهرو مقابل صدرو حكمو من ذرعيه لزوج و بقى يلوي فيهم و يدور حتى حس بطرطيق عيط على إثرها عيطة الأصم يسمعها رماه على طول جهدو دفل عليه و مشى مخليه وراه يبكي بأعلى صوتو من شدة الألم.
-كان في غرفتو يرحي في السيجار ورا خوه عينيه شاعلين بالخيبة و الكره يعني بعدما ما بنى أحلامو و رسم حياتو مع الإنسانة لي اختارها قلبو تطعنو هاذ الطعنة تهينو و تجرحو في كرامتو علاه فواش خير مني هو وش لي لقاتو عندو و ملقاتوش عندي وش لكان رح يعطيهولها و أنا مكنتش راح نمدولها علاه الغدرة و الخيانة لوكان قاتلي من الأول منحبكش مش قابلة بيك لوكان راني جبدت روحي و مرميتش روحي هاذ الرمية علاش يا مريم علاش و أنا لي كنت راح نعيشك عيشة لملوك لوكان تطلبي لبن العصفور نجيبهولك علاه يا مريم دمرتيني و حطمتي فرحتي سالت دمعة غدارة مسحها بقوة قبل ما تطيح مش هشام لي يبكي على مراة مش هشام لي يحزن على وحدة ضغط على السيجارة الشاعلة بيدو رغم الحرقة لي تسببت بيها ليدو لكن حرقة قلبو كانت اكبر تكلم بحقد و كره كبير :حسابكم كبر معايا بزاف يا بيت لهادي بلمختاري وراح تخلصوها غالية ولا مش اسمي هشام مصطفى بلمختاري.
-كانو فالمستشفى رايحين جايين يستناو في الطبيب وش يقولهم و أخيرا خرج راحو ثلاثتهم يتجاراو ليه:طمنا دكتور.
-الحمد لله هاذ المرة فاتت على خير لكن مرة أخرى منقدرش نضمنلكم وش ممكن يصيرلو أنا حذرتكم و قتلكم ملازمش يتقلق و إلا صحتو راح تدهور على كل هو راهو راقد تحت تأثير المنوم و منا على يومين تقدرو تخرجو بالشفاء إن شاء الله.
-دار ليهم وليد وقالهم تقدرو تروحو راح نبقى أنا معاه هزولو براسهم بمعنى إيه و خرجو و هوما فرحانين كيف لا و خطتهم نجحت و لي كانو حابينو صار كانو خايفين على لهادي لكن بما أنو بخير فكلشي راه ماشي كيما حبو.
-غير وصلو للقصر كل وحدة طلعت لغرفتها و هوما منتشيين بالفرحة قبل ما تفتح نصيرة الباب ناداتلها هند:ماما حابة نحكي معاك.
-تفضلي.
-غير دخلت و قفلت الباب قربت منها بسرعة و جلست بقربها.
-غير لخير كشما احتجتي.
-مريم لازم تخرج من القصر قبل العرس و قبل ما يخرج بابا من السبيطار.
-شافت فيها نصيرة مدهوشة و علاه.
-بابا بعد الفضيحة ممكن جدا أنو يترجى هشام يتزوج بيها حتى يستر عليها و هو ممكن يقبل حتى يتجنب القيل و القال و إذا تزوجو راح يعرف أنو مريم بريئة و أنو هاذ الشيء كان ملعوب على هاذي لازم تخرج قبل العرس.