كرونيك#الظل

#الظل_الحلقة 186

الحلقة 186:قربت منو و حكات بصوت ضعيف و باكي: أهلا مروان.
- يشوف فيها و في حالتها و في الولد لي بين يديها و مش فاهم حاجة ..تكلم باستغراب : مريم وش بيك؟؟؟ وشكون هاذ الولد؟؟؟
-حاولت تتحكم في روحها و تكلمت بهدوء : ولدي
-كيفااااااه: يعني يونس عندو ولد و هو مش عارف .
-هزتلو براسها برك مش قادرة حتى تحكي
-رجع شاف فيها بحيرة وش بيك يا مريم وش هاذ الدموع أحكيلي أنا خوك.
-كلمتو لخرة هزتها شحال تمنات يكون عندها خوها يسندها و يوقف معاها فالحلوة و المرة يمسحلها دموعها و يصنع الضحكة على وجها.... تكلمت بصوت مبحوح و مرجوف من لبكا: ماما وفاء ...تخطفت لبارح و مش عارفة نلقاها.
-كيفاش!!!! وقف مخلوع صدمو هاذ لخبر و حزن على صاحبو و على مريم أكيد يونس يكون هابل لازم نروح نساعدو..قرب منها و حط يدو على كتفها: متخافش اختي إن شاء الله ما يكون غير الخير أنا لازم نروح نعرف وش كاين و نحاول نلقاها...جا خارج وقفو صوت سهيلة: متشربش القهوة....دارلها بزربة : مرة أخرى مظطر نمشي...
-خرج و خلا سهيلة تغلي يعني فوق ما نساها و رجع يحب وحدة أخرى عاد ثاني ميفيقهاش...قربت لمريم و رسمت ضحكة مصطنعة و بدات تلعب مع أبان حتى تلهي روحها و تنسى شوية مروان....فنفس الوقت كانت مريم سرحانة و ألف حاجة في مخها يديها مربطة و مش قادرة تعمل حتى حاجة لأمها لكن لازم على الأقل تعاونها بحاجة.....وقفت بزربة وراحت تجري للغرفة لداخل جابت جاكاتها ورجعت لسهيلة:
سهيلة أنا مضطرة نمشي راح نخلي أبان عندك حتى نرجع...مشات جيهة الباب فتحاتو وخرجتوخرجت مخلية سهيلة محتارة في أمرها و مخلاتهاش حتى تسقسيها وش كاين....
-ركبت في طاكسي و هي مقررة خلاص يا مريم من ليوم مكانش ضعف لازم نكون قوية على خاطر أمي لازم نرجع شوي من حقها و شوي من لعذاب لي تعذباتو لازم ....بقات مخها يدي و يجيب حتى وقفت الطاكسي عند العنوان لي عطاتهولو خلصاتو و هبطت...قربت بشوية للباب و قلبها يخبط فالألف عارفة راح يرجع يهينها و عارفة ممكن يطردها لكن لازم ليوم تحط النقاط على الحروف و ترجع كرامتها و كرامة أمها....وصلت للباب و دقت مرة و أثنين و ثلاثة وربعة لكن والو الظاهر مش هنا..ستنات شوية و بعدها فقدت الأمل جات ماشية مروحة حتى تلمح فيه جاي من بعيد يمشي منزل راسو و قارو الدخان في فمو يلتهم فيه بشراهة بدا يقرب بشوي بشوي حتى وصل لعندها هز راسو و تفاجأ بيها تكلم بكل قسوة تناقض المشاعر لي يحس بيها لما شافها: أنتي وش جاية ديري هنا يخي قتلك منحبش نزيد نشوفك.
-كلمتو زادت على مابيها قاستها في نص قلبها و قتلت كل أمل كان عندها تمنات لو يقولها سامحيني يا بنتي غلطت في حقك و مكانش قصدي البارح لكن الظاهر هذا القاسي عمرو لا يحن لملمت شتات نفسها و تكلمت: جيت باش نحط النقاط على الحروف و نرد كرامتي لي أنت هدرتها...أنا بنتك مهما تحاول تنكر بنتك من لحمك و دمك ...أنا بنت حلال جيت نتيجة علاقة شرعية منيش بنت زنا كيفما أنت تهمتني و إذا مش مصدق مستعدة نروح معاك لأي مستشفى و نعملو تحليل ADN
-جزء فيه حاب يصدقها بلعكس متمني يصدقها و تطلع هيا صح بنتو لكن جزء كبير رافض هاذ الشي و لي يزيد يأكدلو رفضو وقت جي صورتها و هي عريانة و في حضن ذاك الرخيس....طلع راسو يشوف في عينيها البريئتين يلمعو بالدموع مش عارف وش يدير زعما يصدقها و يبقى الشك قاتلو و لا يكذبها و يبقى محصور بين نار الندم و نار الشك....عارف أنو لي راح يقولو ممكن يجرحها لكن هذا هو الحل خلي يتاكد و يقطع الشك من اليقين...تكلم بكل جدية: و أنا موافق خلينا نروحو ذك و نتاكدو من كلامك
-على قد ما كلامو وجعها على قد ما ريحها و نحى عليها حمل كبير ليوم راح تثبت ليه و لنفسها بالدرجة الاولى أنها بنت حلال حابة تتأكد هي قبل ما يتاكد هو حابة طمن روحها و طمن أمها أنو البنت لي جابتها مش بنت حرام لا بالعكس هي ثمرة حب ناتجة عن زواج شرعي ...هزتلو راسها و مشات سابقاتو...