الحلقة 81:لما لصقت فيه حس بالنار شعلت فيه إذا وهي بعيدة عاملة فيه لعمايل فما بالك لما قربت حس بدقاتو زادو فسرعتهم لدرجة قريب يحبسو أنفاسو قاعدة تتسارع و جبينو بدا يعرق ريحتها البنينة خدراتو و حرارة جسمها فشلاتو أول مرة يحس بهاذ الشي شعور مقدرش يوصفو و لا يعبر عليه تمناها تزيد تقرب أكثر تماناها تدخل في وسطو و متزيدش تخرج لكن في نفس الوقت حبها تبعد و ترحمو ترحم روحو لقاعدة تتعذب في قربها ملازمش يضعف قدامها ملازمش يخليها تأثر عليه لازم يقسى و يقسي قلبو عليها لازم ديما يبقى متفكر أنها عدوتو بنت عدوه بنت لي حرم النوم من عينو بنت لي دمرو و دمر عيلتو لازم كلما يشوف روحو ضعف يتفكر شكون هي لازم يخلي هاذ الشي راسخ في قلبو.
مريم مكانتش في حالة اقل منو لما قربت منو حست روحها طايرة و محلقة فالهواء ريحتو كانت كيف المخدر لي سكرها و دفا جسمو خلاها تحس بالأمان تحس أنو عندها سند فهاد الدنيا مراحش يخليها و لا راح يتخلا عليها مسكينة كانت غارقة في أحلامها و مش عارفة الشي لي قاعد يستنى فيها معاه.
-فالسبيطار عند لهادي كان فايق و قاعد وحدو مهموم آه يا وفاء لما قلت لقيت بنتنا وراح نعوض غيابك بيها نلقاها عملت فيا هاذ الشي تمنيت لو كنتي عايشة و ربينا بنتنا مع بعض كبرناها و قريناها أكيد عمرها ما كانت راح تعمل هاذ الشي فاق من شرودو على دخول نصيرة و هند بقاو يتطمنو عليه حتى تكلمت مخاطبة هند:معليش تخلينا وحدنا عندي هدرة مع باباك.
- غير خرجت حتى قربت الكرسي منو أكثر و تكلمت:وش نديرو يا لهادي مصيبة و طاحت فوق روسنا العرس بعد غدوة و هشام لغى العرس كيفاه نديرو الناس راح ياكلو وجوهنا.
-شاف فيها و تكلم بياس:معندنا ما نديرو مصيبة و طاحت فوق روسنا .
-لا لازم ندبرو حل مش عايلة بلمختاري لي تطيح بيها عيط لولد خوك و حاول تقنعو يتزوج بهند حتى نداريو لفضيحة.
-كيفاه هاذي فهميني فيها كان راح يزوج بوحدة و بعدها يتزوج بختها خمي فيها هاذي.
-لهادي يا لهادي ساعات نقول مخك منعرف وش فيه شكون عارف بلي مريم اخت هند ولا واحد عارف من غيرنا احنا و الناس نقولولهم كان راح يتزوج بمريم لكن في آخر لحظة متفاهموش و حب يدي بنت عمو هي أكثر وحدة توالمو و يتفاهمو
-و مخممتيش فالناس وش يقولو راح يقولو كيفاه قبلوها على بنتهم تكون البديل راح نصيرو علكة في فمهم
-خلي يحكو شوي و بعدها ينساو المهم مصلحة ولادنا يا الهادي.
-سكت يخمم في كلامها حس أنو عندها حق لكن متاكد انو هشام راح يرفض.
أنت تقرأ
كرونيك#الظل
Romanceقصة رومنسية درامية إجتماعية تجمع في طياتها الكثير من المشاعر المتناقضة و الأحداث المشوقة من حقد و كره و إنتقام🖤🖤🖤🖤و من عشق و غرام و هوس ❤❤❤معاناة و تضحية 😢😢😢حب من طرف واحد💔💔💔و الكثير الكثير من المفاجآت 💣💣💣💣💣💣💥💥💥💥💥💥💥🔞🔞🔞
