الحلقة20:دخل لفيلتهم لقا أمو قاعدة في وسط الصالة تشرب في قهوتها و حاكمة البورطابل في يدها تعيط على ميساء شافتها طولت قرب منها باس راسها و قعد شافها متقلقة:غير الخير يما تباني متقلقة. -*فيروز*:لا والو يا عمري غير شوية وجع نتاع راس دوك يتنحى بالاك من سهرة البارح. -*هشام*:إذا حابة تجبديلي نفس الموضوع فغير انساي حكاية البارح ماتت في بلاصتها ما نديو من عندهم ما يديو منعندنا نبقاو ولاد عم أفضل لينا و ليهم -*فيروز*:علاه يا وليدي هكذا و الله هند طفلة مكاين كيفها زين و عين و رزانة و ثقافة و حتى وليد طفل الله يبارك راجل و فحل و فوق ما راهو ولد عمك راهو صاحبك يعني لوكان شفت فيه عيب متصاحبوش -*هشام*:يا يما انتي تعرفيني بلي منحملش نصيرة وهي مرت عمي حابة تزيدي تحتميها عليا و تولي جدات و لادي و تدخل في الكبيرة الصغيرة -*فيروز*:مفهمتش وعلاه تكره نصيرة لهاد الدرجة هي صح عندها عيبوها بصح مكانش إنسان معصوم من الخطأ و أنا طول حياتي نعرفها عمرها لا أذاتني يهديك ربي يا وليدي زيد خمم -*هشام*:بينو و بين نفسو مسكينة يا يما تحسبي كامل الناس نية كيفك نصيرة واحد ما يعرفها كيفي أنا برك لنعرف خبثها مليح فاق من سرحتو و تكلم:خلاص يا يما آخر مرة يتجبد هاذ الموضوع و الا نخرج و نخليلكم الدار لا أنا راح نتزوج بهند و لا ميساء تتزوج بوليد على هاذ الكلمة دخلت ميساء للصالة و كانت هدرة وليد تخدم في مخها:إذا انت مش قابل تتزوج بهند هاذي حاجة تخصك لكن أنا موافقة على وليد ومش راح نعارض قرار عمي . -على هاذ الهدرة ناض هشام كيف المجنون جبدها بكف زلزلها وجها بيه رص على سنيه و قال نهار نموت و تدفنيني ديك الساعة ديري رايك لكن مدامني حي أنا لنعرف واش يخرج عليك.
أنت تقرأ
كرونيك#الظل
Romanceقصة رومنسية درامية إجتماعية تجمع في طياتها الكثير من المشاعر المتناقضة و الأحداث المشوقة من حقد و كره و إنتقام🖤🖤🖤🖤و من عشق و غرام و هوس ❤❤❤معاناة و تضحية 😢😢😢حب من طرف واحد💔💔💔و الكثير الكثير من المفاجآت 💣💣💣💣💣💣💥💥💥💥💥💥💥🔞🔞🔞
