كرونيك#الظل

#الظل_الحلقة 79

الحلقة 79:بقات تبع فيهم عاملة كيف الأطرش في الزفة حتى وصلو عند مكتب كبير شافتو واقف قدامو استغربت و تمتمت بين شواربها يونس.
-كان يشوف فيها جاية من بعيد تمشي ورا نصيرة و هند مهبطة راسها و تمشي بثقل كبير و جها أصفر مفيهش قطرة دم عينيها حمر دم و دمعات محجرين فيهم عطاوهم لمعة شعرها محكوم بإهمال لكن رغم هاذا عاطيها جمال فريد من نوعو فرح بشوفتها على هاذ الحال و توعد أنو كل أيامها معاه راح تكون هكذا أو أسوء غير قربت منو ضربت ريحتها في نيفو غمض عينيه مستمتع بهاذ الشعور متناسي و عودو ليها و متناسي الدنيا و ما فيها ريحتها برك قدرت تعمل فيه هاذ الشي قدرت تعزف في قلبو أجمل مقطوعة لحنها نادر و ما يعرف نوتاتو غير عازفة وحدة هي مريم
-تكلمت نصيرة و فيقاتو من حلمو الجميل هيا ندخلو زير على يديه تمالك نفسو خذا نفس و دخل هو أول واحد تبعاتو نصيرة و هند و آخرهم مريم لي مش فاهمة والو و خصوصا وجود يونس هنا.
- غير دخلو صافح مدير البلدية نصيرة بحرارة و قالها:و الله هاذ الاجراءات يطلبو أيام حتى يوجدو و لكن في خاطر و خاطر سي الهادي حضرناهم.
-ضحكتلو نصيرة و قاتلو ربي يخليك مزيتك مش راح ننساوها.
-فرح أنو كسب رضى عايلة كيف هاذي تكلم بلهفة:هيا نبداو على بركة الله شكون العرسان.
-شافت فيه و قالت يونس***و مريم*** .
-مريم غير سمعت اسم عرسان و بعدها سمعت اسمها حست بالهواء ثقيل و يدخل جسمها ببطأ الدنيا بدات دور بيها و رجليها فشلو و عينيها تغمضو جات راح طيح ماحست غير بيد مسكتها و حملتها مخلاتهاش تطيح راح يجري حطها على أول كرسي دار ليهم لقاهم واقفين يشوفو فالمشهد صرخ عليهم بقوة جيبولها الماء فاش تستناو
راحت هند تجري مدتلو كاس الماء من بعد الشي لدارولهالدارولها ليوم ولات تخاف منو خوف عمرها حساتو اتجاه شخص.
بقا يقطر على وجها فالماء حتى فاقت و بدات تحل فعينيها شافت يمين يسار بعدها بدات تستوعب الشي لي واقع بعدها وقفت كيف الملسوعة.
لما شافتها نصيرة صحات تكلمت بسرعة حتى تقطع عليها أي محاولة للرفض.
-بامكانك تبدا فالاجراءات الطفلة الحمدلله راها بخير.
-جات تحكي تقولهم فهموني قولولي وش صاير كيفاه راح نتزوج يونس علاه مخبرتونيش علاه مسألتونيش موافقة و لا لالا و يونس زعما هو قابل بيا و لا هو ثاني مجبور كيفي آه يا ربي علاه يا جدة رحتي و خليتيني لو كنتي حية مكنتيش راح تخليهم يديرو فيا هكذا.
فاقت على صوت الراجل و هو يقولها آنسة مريم***تقبلي الزواج من السيد يونس***على سنة الله و رسوله دموعها بداو يطيحو بلا حساب كتمت شهقتها بالسيف طلعت راسها لقات الكل يستنا في إجابتها جات عينها في عين نصيرة غمزتلها و قالتلها هيا مريم وافقي باباك موصيني قالي نحب غدوة نشوف مريم عروسة دموعها زادو طاحو أكثر وصلتلها ميساج أنو والدها هو لي ورا تزويجها و أنها لازم توافق نزلت راسها فركت يديها بقوة من شدت التوتر و قالت كلمتها بصوت يكاد يتسمع موا...موافقة مع نطقت طلعت راسها لقات يونس قرب منها الدفتر باش توقع هزت القلم بيد مرجوفة ووقعت غير كملت سمعت صوت التصفيق و رئيس البلدية يباركلهم:مبروك بالرفاه و البنين. طلعت راسها بقات تشوف في يونس معقولة القدر لما كنت قريب نتزوج بهشام القدر لعب لعبتو و وليت زوجة يونس هاذ الإنسان الغامض لي على قد ما تمنيت قربو على قد ما هبت غموضو معقولة وليت زوجة إنسان مانعرفش حتى شكلو زعمة حتى هو سمع بحكايتي زعمة حتى هو مصدق أني نعمل هاذ الشي زعما راح يصدقني و يآمن ببرائتي بقات تتساءل و تتساءل حتى حست بيد كبيرة خشينة مست يدها الصغيرة لي غرقت فيها الدم عاود طلع لخدودها و حرارتها ارتفعت و رجعتلها نفس الرجفة لي ديما تحسها و هي بقربو طلعت راسها باش تشوفو لكنو كان مدور راسو لجهة أخرى تمنات تشوفو تشوف وجهو تعرف واش يحس كيفاه يفكر لكن هو حرمها من كل هاذ الشي.