كرونيك#الظل

#الظل_الحلقة 169

الحلقة169:واقف فالبالكون هاز قارو فيدو ينتر منو فالدخان مخو و تفكيرو مش هنا مع لي ساكنة قلبو و عقلو أكثر من عامين عامين كاملين مكحلش عينو بشوفتها مشمش ريحتها و لا متع سمعو بكلماتها زعما وش تكون عاملة في حياتها زعمة تكون نساتني زعما تكون كرهتني و حقدت عليا ...ضحك بسخرية على روحو أكيد وش حاب تروح و تستقبلك بالأحضان و تقولك توحشتك و نحبك
الشي لي عملتو فيها كبير و ميتغفرش بعدما وعدتها بالحب و خذيت أغلى ما عندها تروح الصباح و تخليها كأنك مخلي كرسي و لا باب في ذيك الدار مش إنسانة وهباتك قلبها و عقلها و بدنها و روحها و أنت جبدت بيها لبساط ....دخل عليه مروان لقاه واقف و يتكيف تكلم بحسرة على حال صاحبو: يا خويا أرحم روحك شوي و أنت هاذ الزبل ديما في فمك.
-دار ليه بعدما نار آخر نترة منو ورماه في الارض: هاذ الزبل لي مش عاجبك هو لي مصبرني عليها هو لي يطفي شوية من نار الوحش لي لاهبة فيا لو موش هو صاحبك راه هبل و رما كل شي وراه ورجعلها يجري.
-حالتك صعيبة يا صاحبي و مش ساهل تشفى منها .
-ضحك باستهزاء على كلام مروان وشكون قالك حاب نشفى منها كاين واحد فالدنيا يحب يرتاح من الهواء لي يتنفسو .
-زعمة تظن راح تسامحك بعد كامل هاذ الوقت لي عملتو فيها مش ساهل.
-تنهد بحسرة عارف يا مروان عارف وهاذ الشي لي مخوفني لكن يطول الزمان و لا يقصار مصيرها ترجع لحظني بالحب و لا بالاكراه.
-تقدم منو تكى على حاشية البالكون و هو يضحك
-شاف فيه بتساؤل: خير وش لي يضحك فيك؟؟؟
-هههه نضحك عليك كنت ديما تستهزا بحبي لسهيلة و تضحك عليه لكن ربي حنين كريم جا اليوم لي تذليت فيه و شفت الحب مرمدك حالتك..بصح فهمني حاجة وحدة برك وعلاه مخليتش رجالك يجيبولك خبارها و وصيتهم يحميوها برك؟؟؟
-آه يا مروان آه ...خفت لا هاذ القلب يضعف وقت يسمع خبارها خفت لا يقوليلي راها تبكي راها مفجوعة و لا مغبونة و أنا مش بجنبها صدقني ساعتها يجن صاحبك نورمال و ينسى مهمتو و ينسى الوطن و ينسى كلشي و يروح ليها يجري.
-مالا مزية لي عملت هكذا تالي كنت دخلنا في حيط و تروح خدمة سنين في سبة مجنون مريم.
-خبطو للكتف يضحك لي يسمعك يقول هذا عمرو لا حب و لا عشق و هو كل ليلة يبات يهترف بسهيلة بصح نستعرف بيها عرفت كيفاه جرجرك.
-أخخخ متفكرنيش فيها و الله شوية الصبر لي عندي قريب تكمل بصح هاذ المرة قررت نبدل الخطة خاطر الجري وراها مجابش فايدة.
-ههه و الله وطلعت مش ساهل يا حلوف .
-نعجبك راني...لمهم الاوراق كلهم واجدين و لعشية إن شاء الله نكونو فالمطار .
-عينيه لمعت بفرحة غير تذكر أنو راجع ليوم أخيرا راح يرجع لمحبوبتو.
-حل الليل و هبطت الطائرة القادمة من فرنسا نزلو منها أسدين من أسود لبلاد نزلو بكل شموخ و براس مرفوع الحمد لله غربتهم و اشتياقهم و صبرهم ماراحوش هكذاك بل وصلو و هوما مكللين بأكبر إنتصار عرفو الوطن بعد انتصار الاستقلال هو الانتصار على الفساد رجعو و هوما محمليين بأخطر الأسرار لي كانت بحوزة رئيس جهاز المخابرات السابق و لي من خلالها قدر يبقى متحكم في زمام لبلاد لسنين طويلة ليوم فقط يقدرو يقولو أنهم قطعو راس الأخطبوط و مزالت أذرعو لي عاثت فسادا و دمرت إقتصاد هاذ الوطن.
-يجر في فاليزتو و البسمة مالية وجهو أخيرا راجعلك يا نور القلب راجعلك براس مرفوع من ليوم مراحش نحشم بوجهي و لا نغطيه من ليوم راح نحكم يدك نخرجو مع بعضنا و أنا فخور و واثق من شكلي عملت هاذ الشي كلو في خاطرك تحملت ألم العمليات و تعبها في خاطر عيونك خاطر حابك تكوني مراة كيف كامل النساء مرا عندها راجل كامل ومش ناقصو شي.
-شاف في صاحبو بفرحة عارف قداه كان تشوهو عاملو عقدة كان دايما منعزل على الناس و على الحياة بسبة شكلو لكن ليوم يشوف في يونس آخر غير يونس لي عرفو حسو تغير من داخل أكثر من تغيرو من برا .