كرونيك#الظل

#الظل_الحلقة29

الحلقة 29:كان قاعد فالمكتب نتاعو يراجع فحسابات الشركة حتى يلقاها داخلة عندو لا أحم و لا دستور وش جابها عندي هذي ضرك وش احتاجت من عندي تكلم بصوت غاضب:غير الخير قالولك حال قهوة حتى تدخلي بلاما تستأذني مني. -منحتاجش إذن باه نجي لشركة بابا و لا نسيت بلي نسالو فيها كيما تسال فيها انت. -لا متسالوش فيها كيما نسال أنا النسبة لكبيرة ليا أنا و نتوما عندكم غير لفتات و أنا محبيتش نخرجكم غير إحتراما للمرحوم بابا لداركم شركة معاه. -لفتات لي راك تقول عليه راهو 35% يعني لوكان ننسحبو على غفلة شركتكم طيح في السوق . -ربحت هذا وش مزالك يا هشام جي طفلة تنعتلك خدمتك هيا قولي وش عندك و طيري من وجهي مش حامل نشوف خليقتك. -مفهمتش يا هشام و علاه من صغري تكرهني و مطيقنيش كي أنا كي ماما. -المحبة و الكره من عند ربي هيا خلينا فالمفيد قولي وش جابك. -احم كيما تعرف أنا معنديش يامات ملي تخرجت من ألمانيا إدارة أعمال و اقترح عليا بابي نجي نخدم هنا معاك خاطش الشركة الاخرى متكفل بيها هو وليد و ميحتاجونيش معاهم. -كان راح يكركرها من شعرها و يجيبها برا لكن فآخر لحظة تمالك روحو و خدم عقلو مدام بعثوها هنا عندو فأكيد باه تجسس على الشركة و على اخباري و إلا من وكتا يهتمو بيها و أرباحهم كل عام جيهم فوق ما يتخيليو و بلا حتى جهد منهم،سكت شوي و قالها:إيه معليه ألالا وش حابة تخدمي هنا قالها باستهزاء -هي حارت فموافقتو بلا ميدير مشاكل و مبعد قالت أكيد خمم فيها و خاف من تهديدي:أمم معليش فلول نبدا بمديرة تسويق برك منكبرش كرشي بزاف. -ههه صح مكبرتيش كرشك لوكان طلبتي منصب مدير عام خير،معليه أسيدي نديروك مديرة تسويق ونشوفو إذا قادرة على شقاك و لا غير الهدرة فالريح. -حاجة باينة قادرة على شقاية راني هند بلمختاري و مش أي كان . -إيه نشوفو و بيناتنا ليام و نحكمو . -مالا بما أنو تفاهمنا فراح نخليك و غدوة كي نجي نلقا البيرو نتاعي واجد سلام. -بسلامة و قالها في قلبو طريق السد حاسبيني بهلول يمشيو رايهم عليا.