كرونيك#الظل

#الظل_الحلقة 102

الحلقة 102:روح للدار مهدود و تعبان غير دخل لمحها واقفة عند التاقة تشاور بيديها جاه الفضول يعرف لمن قاعدة تشاور غير قرب شاف جارتهم لمقابلتهم طل من التاقة و تحكي مع مريم و مريم تضحك و مش جايبة خبر بلي وراها طلع راسو و الدم جمد فيه عينيه حمارو و قلبو عاد يخبط فالالف ولد جارتهم واقف فالبالكون فالطاج الفوقاني و قاعد يخزر لمريم بنظرات إعجاب و لالة مش فايقة و طارحة فمها للضحك و لحكايات ماوعاش على روحو و حكمها من شعرها دورها ليه و جابها في حضنو مريم الخلعة حكمتها و مفهمتش وش بيه طلعت راسها و تلاقاو عينيها الخضر لمشفرين بعينيه الحمر الشاعلين كيف الجمرات سها في عينيها و كيفاه قاعدة تشوف فيه ببراءة و شفارها كيف لمراوح يطيرو و ينزلو مع كل ترميشة هبط بعينيه لخدودها الموردين و شفايفها المنفوخين تمنى يذوقهم و يستطعم من شهدهم يغرق فيهم و ما يخرجش منهم اااه يا مريم زينك سحرني و خايف لا يقتلني في يوم من الأيام و فجأة تقلب حالو و زاد من قبضتو على شعرها لما تفكر ولد جارتهم و وهو يشوف فيها يتأمل فيها و يمتع عينيه بيها يعني حط عينو على حاجة مش من حقو حاجة نتاعو هو ملك ليه وحدو ووحدو لي عندو لحق يملي عينيه بشوفتها زاد هبل أكثر و قت خمم أنها تكون حتى هي خزرت فيه و عجبها يمكن من قبيل و هوما يتبادلو فالنظرات أكيد أكيد عجبها و تمنات يكون هو في مكاني راجل كامل مكمول مش واحد مشوه محروق نحى يديه من شعرها و هبطهم لكتافها بدا يخض فيها كيف المسعور هاج و معرفش واش يخرج من فمو:ربك من صباح وانتي واقفة تتمعشقيلي مع الطحان و أنا دايرتني كيف الطرطور منيش راجل قدامك أنطقي لا ليوم نجيف قسامك و ندفنك في بلاصتك أحكي قولي وش كنتي تقوليلو كنتي تقوليلو راجلي مش راجل راجلي معندوش وش عندك أحكي.
-كانت تشوف فيه و مش فاهمة وش بيه حاكمها من شعرها و مدور يديه عليه حتى حست بجلدة راسها قريب طير وبعدها طلق منها و بدا يخض فكتافها و يخرج في سمو لي قتلها عينيها دمعو هي موش خاينة موش رخيسة باش تشوف في راجل و هي متسمية على راجل آخر حركت راسها يمين يسار بزربة تنفي فلي قاعد يحكي و تكلمت بصوت متقطع من لبكا:أنا...أنا مشفت فحتى راجل و الله ما شفتو و لا لمحتو أنا..أنا مستحيل نشوف فراجل و أنا متزوجة متربيتش باش نخون مدامني باسمك عمري لا نشوف فراجل غيرك
كان يسمع فيها و موش مأمن يعني هي راضية بيا كزوج يعني قابلة بيا لا مستحيل أكيد قالت هكذا من الخوف لا بصح عينيها ميكذبوش أووووف طلق منها جابها طايحة فالارض حكم شعرو من الغش قريب يطيرو و بعدها خرج من الدار و طربق الباب وراه راح ديراكت لدار جارتهم بدا يخبط فبابهم بيديه لزوج حل يا الطحان حل ليوم ني...ك حل يا عرة الرجال حل غير حلت جارتو الباب مخلوعة ومش فاهمة والو بعدها بيديه و تعداها طالع لولدها لي غير وصل عندو عطاه ببونية للراس طيحاتو دايخ بصح مبردش قلبو بقا يضرب فيه من كل بلاصة و يسب ويكفر أنا يا الطحان تشوف في مرتي علاه حاسبها مزوجة بمراة عينيك نحيهملك يا نقش لوكان نزيد نشوفك حطيتهم عليها كمل يركل فيه و جارتو تبكي و تحاول فيه يرحمو بصح هو مقدرش مغلغل منو و غشو مزال مبردش مهداش حتى ركعت أمو عند رجليه راح تبوسهملو نوضها و قالها في خاطرك يا خالتي رحمتو بصح مرة أخرى يعاودها غير وجديلو كفنو.
رجع للدار لقاها ضامة رجليها و تبكي غير طلعت راسها وشافتو جات راح توقف حتى وقفها يهدر :آخر مرة نشوفك واقفة مع التاقة و إلا رجليك نحشهملك فاهمة.
-مردتش عليه و بقات غير تبكي حتى زاد عيط على طولو فاااااهمة ترعدت في بلاصتها و هزتلو براسها و قالت و هي تشهق فا...همة.
-شاف حالتها و هي تبكي حن و رق قلبو كان راح يوقفها و يمسحلها دمعاتها بصح ميقدرش يدير هاذ الشي كبرياؤو يمنعو و يعرف أنو لو يستسلم مرة راح يبقى ديما يضعف و يحن دخل لغرفتو خبط وراه لباب حتى تهزت من قوة الخبطة شعل قارو و بقا يتكيف فيه لعل يهدى و يطفي شوية من غشو.