كرونيك#الظل

#الظل_الحلقة 165

الحلقة 165:-كمل بألم:ألقات الشرطة القبض عليا أنا و محسن لكن الرخيس نتاع لهادي لما شاف الشرطة منبهناش لا بالعكس هرب بجلدو كيف الفار.....دخلنا للحبس و أثناء التحقيقات رفضنا نذكرو إسم لهادي معانا و عطينالو كل الاموال لي عندنا حتى يشغلهالنا وقت نخرجو .
-و مر الوقت و فاتت قريب عشر سنين و طلعنا من الحبس.
-كنا نستناو في صاحبنا يجي يستقبلنا لكن هو لا جا و لا طل مهتميناش بهاذ الشي و قلنا أكيد مشغول رغم أنو طيلة هاذ السنين الاخيرة عمرو لا تنازل مرة و جا زارنا
-خرجنا و احنا فرحانين مكانش أفضل من الحرية خصوصا محسن الي توحش مرتو و اختو و ولدو لي مشافوش من وقت كان بيبي صغير أما أنا فوالدي المسنين توفاو في أول سنين سجني ماتو و داو حرقتهم عليا معاهم للقبر
-زوجة محسن عملت حفلة صغيرة بمناسبة خروجنا و كيما كان الحال رحت و ثم شفت سباب هلاكي أخت محسن الي خليتها طفلة صغيرة ليوم كبرت و صارت صبية كانت كيف الملاك زينها يسحر لعقول و لقلوب عشقتها من أول مرة و قلبي صار ملكها حبيتها و كلمة حبيتها قليلة في حقها ...روحت ليلتها هايم صورتها مفارقتش خيالي هبلتني و طيرتلي طرف من عقلي و حلفت ما تكون غير ليا .
- في اليوم لي بعدو رحت أنا و محسن لعند لهادي حتى نشوفوه و نعرفو وش عمل بالفلوس لي عطيناهملو لكن غير وصلنا عندو بدا يدخل و يخرج في الهدرة اصبرو و منعرف وش.
- من جهة تعلقي بوفاء زاد و حبي ليها صاى كيف الإدمان صارحتها بحبي و خبرتني أنها تبادلني نفس المشاعر فرحتي في ذاك اليوم معطتها لحد حسيت روحي خلاص كسبت الدنيا و ما فيها...
-علاقتنا طورت أكثر و أكثر و أنا خلاص صبري كمل مش قادر نتحمل أكثر حابها تكون مرتي ليوم قبل غدوة....صارحت محسن بنيتي في خطبت أختو لكنو رفض. و أنا مهما كان عاذرو هي أختو الوحيدة و اكيد يتمنالها راجل مكمول من كلشي مش خريج حباس.
-وفاء مرضت بعد رفض خوها و أنا مرضت أكثر و الي زاد هدني أنو لهادي باين خرج علينا الطريق يعني حتى لحياة لي وعدتها نوفرهالها منقدرش نوفيلها بيها
- محسن لما شاف حالت أختو و حالة صاحبو مقدرش يتحمل وجيعتهم و قرر أنو يوافق على زواجهم و هذاك الي صار .
-تزوجت أنا و حبيبة قلبي و كان ذاك ليوم أسعد يوم في حياتنا رغم الفقر و رغم المشاكل لكن حبنا كان أكبر من كل شي...
-صرت نعمل في حانوت عند واحد جارنا في حين محسن فتح بقالة صغيرة في قراج دارهم بعدما باعت مرتو الذهب الي عندها لكن حرقتنا تزيد و تزيد أكثر وقت نشوفو لهادي غناه كل يوم يزيد على الثاني بدراهمنا .
-محسن خلاص شوية الصبر الي عندو كملت و ماكان عليه غير أنو يستعمل التهديد و هذاك الي صار رحنا للهادي و حطيناه قدام الامر الواقع يا أما يعطينا حقنا يا أما يعطو تسجيلات نتاع الكاسات لي كان مخليهم محسن (في ذاك الوقت الكاسات كانت عزيزة ههه) للشرطة و ساعتها يروح بين الرجلين(التسجيلات كان فيهم كلامهم و هوما يتفاهمو على صفقة مخدرات) لهادي تلبك و معرفش وش يقول و وعدنا أنو يعطينا أموالنا لكن نمهلوه فرصة.
-بعدها بيومين جا أسوء يوم في حياتي في ذاك اليوم رجعت للدار قبل وقت رجوعي خاطر كنت محموم و مول الحانوت خلاني نروح ....روحت و يا ريتني ما روحت يا ريتني متت قبل لا نشوف الشي لي شفتو كانت مرتي عريانة تماما و راقدة في حضن صاحبي...تصدمت و صرت كيف المجنون نضرب فيه و فيها بلا رحمة ما خليتيهم حتى كانت دموماتهم معبية لمكان.. شفت فيها بحسرة و الدموع على خدي و خرجت آخر كلمة كنت نتصور راح نقولهالها طلقتها ايه طلقتها لكن هكذاك و غليلي مشفاش....خرجت و أنا هابل الدنيا ظلامت في عيني كرهت الدنيا و ما فيها و مالقيت غير السكرة لي تنسيني.
-بعدها بأيام سكرت بزاف و زودت فالدوزة عينيا حمارو و صرت ما نشوف فحتى شي قدامي هزيت موس فيدي و حلفت ليوم نقتلها و نبرد قلبي رحت لعند دار خوها و جنون الدنيا دايرين بيا اليوم يا قاتل يا مقتول ليوم لازم نقتلها و نمحي عاري...وصلت لدار محسن و بديت نسب و نكفر بأعلى صوتي حتى كامل الجيران دارو بيا خرجلي محسن و بعدما كنت غير نسب جبدت الموس ناوي ندخل للدار و نقتلها محسن مخلانيش و صرات حرب كبيرة بينا ما فكوني منو غير الجيران لكن قبل ما نروح قلت الجملة لي دمرتني و خلاتني هنا شفت فصاحبي بكل حقد و قتلو: أقسم بالله غير نحرقكم كامل كيما حرقتو قلبي.
-رجعت لبيتي و حيلي مهدود رقدت و دمعتي على خدي لكن غير جا الصباح نلقا البوليس داخلين عليا هزوني تحت أعين الجميع و أنا مش فاهم والو حتى وصلت للمركز وقتها عرفت تهمتي تهمتي لي أنا بريء منها براءة الذئب من دم يوسف أنا مستحيل نعمل هاذ الشي مستحيل نحرق عايلة كاملة و هي حية بلا أي رحمة ولا شفقة.
Back:
-و هاذي هي حكايتي