كرونيك#الظل

#الظل_الحلقة 91

الحلقة 91:ركب في موطوه و الغش يهز فيه و يحط مكانش لازم يحكيلهم على زواجو راح يبقاو كل مرة يجبدولو عليها خصوصا سهيلة لي ولات صحبة هي و مريم و أكيد مش راح ترضى بمعاملتي ليها اااه يا مريم حبيت نلهي روحي بالخدمة لقيتك لاحقتني وين ما نروح حاب ننساك و نشغل روحي عليك حاب متفكر غير كرهي و حقدي اتجاهك أنتي عدوتي و المشاعر الوحيدة لي لازم تكون هي الكره و الحقد و الإنتقام لازم لما يخرج باباك يلقى نص الإنتقام كمل و نكمل النص الثاني معاه بقات الأفكار تهز فيه و تحط حتى لقا روحو وصل غير فتح الباب ضربت نيفو ريحة بنينة غمض عينيه يستنشق فيها و يعدي في لسانو لا إراديا مافاق غير على ضحكة مريم الحلوة لي سحراتو وقت شافها و شاف شفايفها اللامعين مفتوحين على آخرهم مبينين حبات اللولو المرصوصين في ثغرها الجذاب تمالك روحو لا يجن و يعمل فيها عملة حمحم و تكلم بصوت قوي :خير وش لي يضحك فيك
- مريم غير سمعت صوتو سكتت و كتمت ضحكتها معرفت وش تقولو
-قتلك وش لي يضحك فيك قالها هاذ المرة بنبرة أعلى
- توترت و معرفتش وش جابو لكن خافت إذا سكتت أكثر يزيد يتعصب:نقولك بصح متضربنيش
-أول ماسمعها وش قالت ضحك في سرو عليها و الله تقول طفلة صغيرة :قولي و منضربكش وعد
-أحمم ضحكت عليك وقت شفتك مغمض عينيك و تعدي في لسانك على فمك تقول ولد صغير و كملت ضحكتها
- غير سمعها وش قالت تبسم لكن سرعان مرجع غوبش و مشى بخطوات سريعة لغرفتو حتى متلمحوش قالها و هو عاطيها بظهر أول مايوجد لعشا ناديلي.
-بعد ساعة كان لعشا واجد مريم عملت شخشوخة حارررة و بنينة كانت ساخفة عليها من لي ماتت جداها مذاقتهاش خاصة أنو فالقصر كانو ياكلو مؤكولات عجيبة غريبة ما فيهم لا طعم و لا بنة راحت لغرفتو دقت عليها مرتين و بعدها قاتلو بلي لعشا حاضر
أول ما قعد و شاف الأكل عينيه لمعو بالفرحة جا راح يحط المغرفة في فمو لكن حبس و دار ليها لقاها واقفة بجنبو تخزر للارض شاف فيها و قال :متاكليش؟؟؟
-لا كي تكمل أنت ناكل أنا
-غاضتو و كان راح يقولها أقعدي تاكلي معايا لكن خاف لما تقابلو و تشوف شكلو تعاف و متقدرش تاكل رجع لبس قناع القوة من جديد و قالها بكل جفاء أحسن
-أما هي فحست بخيبة لما شافتو سألها قالت ممكن يحن و يخليني ناكل معاه لكن الظاهر أنو عمرو ماراح يحن فيا أنا عدوتو و راح نبقى عدوتو للأبد زعما و علاش عمل فيهم بابا هاذ الشيء كانت حابة تسالو لكن خافت أنو يثور عليها و يمرمدها خليني ساكتة أحسن.
-أما هو فأول ماذاق أكلها مات منو كان بنين فوق ما تصور عمرو لا ذاق شخشوخة كيفها هجم عليها و بدا ياكل و يزرب تقول راح يخطفوهالو من يدو مسح الطبسي مسحان و كان حاب يزيد بصح مقدرش يقولها راح تفهم بلي عجباتو الماكلة
-مريم كانت تشوف فيه كيفاه ياكل و مستمتع فرحت أنها عجباتو و غير كمل سقساتو و هي متلهفة للإجابة:عجباتك؟؟
-مسح يديه و فمو دار ليها و قالها سامطة رهج كليتها غير كي عدت جيعان مشا و خلاها مصدومة فيه إذا سامطة و لحس الطبسي مالا لوكان جات بنينة وش يدير لمت الطابلة و حطت ليها تاكل أول ماذاقتها عجبتها و الله غير بنينة هو لي ميعرفش كملت ماكلتها غسلت لماعن فرزت الكوزينة صلات لعشاء و حكمت بلاصتها جاها الملل كون غير كان كاين تليفزيون تتسلى بيه لكن تحمد ربي على الاقل ليوم تقدر ترقد مرتاحة و عظيماتها دافيين خير من ليلة لبارح تبسمت وقت تفكرت أنو تفكرها و جابلها كوات رقدت و التبسيمة مزينة فمها رغم كل لي مر عليها لكن فعلا كيما يقولك بات مظلوم و لا تبات ظالم الظالم عمرو ما يرقد هاني و مرتاح.