ပြိုင်ဘက်ကင်းဆေးနတ်ဘုရား

Chapter 78

ပြိုင်ဘက်ကင်းဆေးနတ်ဘုရား

ဘာသာပြန်သူ-ဖြိုးသူဝင်း

စာစဉ်(7)

Chapter-78

ရုတ်တရက် ဖိန်လျှိုချင်၏ ဘေးနားတွင် ကိုယ်တွင်းစွမ်းအင်များ စုစည်းကာ ကိုယ်တွင်းစွမ်းအင်မုန်တိုင်းငယ်တစ်ခု ဖြစ်ပေါ်နေခဲ့သည်။

ဖိန်လျှိုချင်၏ ခန္ဓာကိုယ်က ကိုယ်တွင်းစွမ်းအင်များကို အလောတကြီး စုပ်ယူလိုက်ပြီး အတားအဆီးများကို တဟုန်ထိုး ကျော်ဖြတ်သွားခဲ့၏။

မူလက သူမသည် အဆင့်(6)စိတ်ဝိညာဉ်ဖွဲ့စည်းခြင်းနယ်ပယ် အဆင့်သာ ရှိခဲ့၏။ ရုတ်တရက် ဥာဏ်အလင်းပွင့်သွားခဲ့သည့်အတွက် သူမ၏ စိတ်ဝိညာဉ်ခွန်အား က အဆင့်မြင့်အဆင့် မှော်ဆေးပညာရှင်မာစတာ အဆင့် သို့ ရောက်ရှိသွားသည်သာမက သူမ၏ ကျင့်စဉ်အဆင့်ကလည်း အဆင့်(6)စိတ်ဝိညာဉ်ဖွဲ့စည်းခြင်းနယ်ပယ် အဆင့်မှ အဆင့်(7)စိတ်ဝိညာဉ်ဖွဲ့စည်းခြင်းနယ်ပယ် အဆင့်သို့ တိုက်ရိုက်မြင့်တက်သွားခဲ့သည်။

ခန်းမအတွင်းရှိ ကိုယ်တွင်းစွမ်းအင်များ ပြန်လည်တည်ငြိမ်သွားသည့်အခါတွင် ဖိန်လျှိုချင်က သူမ၏ မျက်လုံးများကို ဖြည်းဖြည်းချင်း ဖွင့်လိုက်၏။

“ အဆင့်မြင့်အဆင့် မှော်ဆေးပညာရှင်မာစတာဖြစ်လာတဲ့အတွက်ဂုဏ်ယူပါတယ် ဖိန်မိန်းကလေး…..”

ဝမ်ဂျင်ဖူက ချက်ချင်းပင် ဂုဏ်ပြုစကားပြောဆိုလိုက်ပြီး အခြားသူများကလည်း လာရောက်၍ ချီးကျူးစကားပြောဆိုခဲ့ကြသည်။

ဖိန်လျှိုချင် က ယခု အသက်အရွယ်နှင့် အဆင့်မြင့်အဆင့် မှော်ဆေးပညာရှင်မာစတာ ဖြစ်လာခဲ့၏။ အနာဂတ်တွင် သူမက အနည်းဆုံး မှော်ဆေးပညာရှင်ဂရန်းမာစတာ တစ်ယောက် ဖြစ်လာပေမည်။

အနာဂတ် ချင်နိုင်ငံ၏ အဓိက ပုဂ္ဂိုလ်ဖြစ်လာမည့်သူဖြင့် ရင်းနှီးသောဆက်ဆံရေး ထူထောင်ထားရန်မှာ မရှိမဖြစ်လိုအပ်ပေသည်။

ဖိန်လျှိုချင် က ဂုဏ်ပြုစကားပြောဆိုသူများကို ဝတ္တရားအရ ကျေးဇူးတင်စကား ပြန်လည်ပြောဆိုနေသော်လည်း သူမ၏ မျက်လုံးများက လူအုပ်ကြီးကို ကြည့်နေခဲ့ကာ သူမရှာဖွေနေသော သူ ကို ရှာမတွေ့ခဲ့ပေ။