ပြိုင်ဘက်ကင်းဆေးနတ်ဘုရား

Chapter 179

ပြိုင်ဘက်ကင်းဆေးနတ်ဘုရား

ဘာသာပြန်သူ-ဖြိုးသူဝင်း

စာစဉ် ( ၁၅ )

Chapter-179

အလင်းဖြူဝင်ရောက်သွားသည့်လမ်းများအားလုံးက စွန့်ပစ်ထားသောလမ်းကြောင်းများ ဖြစ်ပြီး မတ်စောက်သောနေရာများလည်း ဖြစ်ကြ၏။ ယီယွမ်က လမ်းတစ်လျှောက်လုံး အလင်းဖြူနောက်မှလိုက်လာခဲ့သော်လည်း တစ်စုံတစ်ယောက်က သူတို့ကို ရှာဖွေတွေ့ရှိရန် ခက်ခဲလှပေသည်။

“ဒီအကောင်ငယ်လေးက ရတနာကိုရှာဖွေနိုင်တဲ့ စွမ်းရည်တွေ တကယ်ပဲရှိနေတယ်ထင်တယ်…..” ထိုအမြင်အပေါ် ယီယွမ်က ပို၍ပို၍ သေချာလာခဲ့၏။

ထိုသို့အမှန်တကယ်ဖြစ်ပါက ကျားဖြူမကြီးမှာ အလင်းဖြူက သွေးဗောဓိကို ရှာဖွေတွေ့ရှိခဲ့၍ လာရောက်ယူဆောင်ခြင်းဖြစ်သော်လည်း ထိုနယ်မြေကို နေရာယူထားသော ရောင်စဉ်ခုနှစ်သွယ်စီးဆင်းတိမ်စပါးအုံးမြွေနှင့် တွေ့ဆုံရမည်ဟု မျှော်လင့်မထားခဲ့ဘဲ ကံဆိုးစွာ တွေ့ဆုံခဲ့ရခြင်း ဖြစ်ပေလိမ့်မည်။

နှစ်ကောင်စလုံးက ကြီးမားသောတိုက်ပွဲတစ်ခုကို ဆင်နွှဲခဲ့ကြပြီး ကျားဖြူမကြီးက ရှုံးနိမ့်သွားပေသည်။

ဤသို့ဆိုလျှင် အရာအားလုံး ရှင်းလင်းသွားခဲ့ပေပြီ။

“အလင်းတန်းစီးဆင်းခြင်းကျားဖြူတွေမှာ ဒီလိုစွမ်းရည်မျိုး မရှိပါဘူး… ဒီအကောင်ငယ်လေးက တကယ်ကိုပဲ အရည်အချင်းကောင်းကောင်းမွန်မွန် ရှိနေတာကိုး…..” ယီယွမ်က လေးစားစွာဖြင့် ပြောဆိုခဲ့၏။

ယီယွမ်က မိစ္ဆာသားရဲမုဆိုးများအပေါ် အလွန်နှံ့စပ်စွာ လေ့လာထားခဲ့သော်လည်း အလင်းတန်းစီးဆင်းခြင်းကျားဖြူများ၌ ရတနာရှာဖွေနိုင်သည့် စွမ်းရည်ရှိသည်ဟု တစ်ခါမှ ကြားဖူးခဲ့ခြင်းမရှိပေ။ ကြည့်ရသည်မှာ ထိုစွမ်းရည်က ဤအကောင်ငယ်လေး၏ ကိုယ်ပိုင်စွမ်းရည်သာ ဖြစ်ပေလိမ့်မည်။

သူကအမှန်တကယ်ပင် ရတနာတစ်ခု ကောက်ရခဲ့ခြင်းဖြစ်သည်။

သူကအလင်းဖြူကို စတင်တွေ့ရှိခဲ့စဉ်က သူ့အတွက်အနှောင့်အယှက်ဖြစ်စေမည့်အရာဟု ထင်မှတ်ခဲ့သည်ကို ပြန်တွေးမိပြီးနောက် ယီယွမ်က ကူရာကယ်ရာကင်းမဲ့စွာဖြင့် ဇောချွေးများ စီးကျလာခဲ့၏။