ပြိုင်ဘက်ကင်းဆေးနတ်ဘုရား

Chapter 127

ပြိုင်ဘက်ကင်းဆေးနတ်ဘုရား

ဘာသာပြန်သူ-ဖြိုးသူဝင်း

စာစဉ်(11)

Chapter-127

“ဟီး...စကားအများကြီး ပြောနေတာက အသုံးမဝင်ပါဘူး...ပြီးရင် အကုန် လက်တွေ့ သိရမှာပဲ…..”

ယီယွမ် ၏ ယုံကြည်မှုပြည့်ဝသော အပြုအမူကြောင့် စူးယူဘိုင် က အနည်းငယ် စိုးရိမ်စိတ် ဝင်လာခဲ့သည်။

သို့သော် ဟူချန်းရှန် ပင် ဤဆေးအမျိုးအစားကို မသိသောကြောင့် ဤဆေးကို ယီယွမ်က လုပ်ကြံပြောဆိုနေခဲ့သည်ဟုသာ ထင်နေခဲ့၏။

သူက ထိုအချိန်ကို ခေါင်းမာစွာ စောင့်ဆိုင်းနေခဲ့သည်။

ပြီးရင် မင်းဘယ်လို သေမလဲဆိုတာ ငါ စောင့်ကြည့်ဦးမယ်…..

စူးယူဘိုင် က ယီယွမ်ကို မည်သည့်အပြစ်ပေးမည်ဟု ကြိုတင်စဉ်းစားနေခဲ့၏။ သေဒဏ် ကိုတော့ ပေး၍ ရမည်မဟုတ်ပေ။ သို့သော် ကြိမ်ဒဏ်ကိုဖြင့် ပေး၍ ရပေ၏။

အရာရာတိုင်းက အစီအစဉ် တကျ ဖြစ်သွားခဲ့ပြီး ပျာယာခတ်နေသော လျူယူရှီ က လူအများရှေ့သို့ ရောက်လာခဲ့သည်။

စူးယူဘိုင် က လျူယူရှီကို ရေခဲတမျှ အေးစက်သည့် အကြည့်ဖြင့် ကြည့်လိုက်၏။ “မကြောက်နဲ့ လျူယူရှီ...ဌာနမှူး ဟူ တောင် ဒီလိုဆေးလုံးမျိုးကို တစ်ခါမှ မကြားဖူးဘူး...ဒါက အစစ်အမှန် ဟုတ်မယ်လို့ မင်း ထင်လို့လား...အဲဒီဆေးလုံးက အကျိုးသက်ရောက်မှု မရှိဘူးဆိုတာ မင်းက သက်သေပြနိုင်ခဲ့ရင် ဒီအကြီးအကဲ က မင်းရဲ့ အပြစ်ကင်းစင်မှုကို အတည်ပြုပေးနိုင်ရုံတင် မကဘူး...ယီယွမ် ကို အပြစ် ပြင်းပြင်းထန်ထန် ပေးလို့ရသွားပြီ...နားလည်လား…..”

မူလက လျူယူရှီ မှာ ပျာယာခတ်နေခဲ့သော်လည်း စူးယူဘိုင် က ထိုသို့ ပြောသည်ကို ကြားလျှင် ယုံကြည်စိတ်ချမှု အနည်းငယ် ရှိလာခဲ့သည်။

ဟုတ်တယ်...ဌာနမှူးဟူ က မှော်ဆေးပညာရှင်ဂရန်းမာစတ တစ်ဦးပဲ...သူက လုံးဝမကြားဖူးတဲ့ ဆေးလုံးတစ်မျိုးက သေချာပေါက် ယီယွမ် လှည့်စားနေတာပဲဖြစ်မှာ…..

လျူယူရှီက ယီယွမ်ဝင်ရောက်ဖြေဆိုခဲ့သော မှော်ဆေးပညာရှင်စာမေးပွဲ ကို တက်ရောက်နိုင်ခဲ့ခြင်း မရှိသည်က သနားစရာ ကောင်းလှ၏။ ထိုသို့မဟုတ်ပါက သူမ၌ ဤသို့သော ယုံကြည်မှုမျိုး ရှိမည် မဟုတ်ပေ။