ပြိုင်ဘက်ကင်းဆေးနတ်ဘုရား

Chapter 160

ပြိုင်ဘက်ကင်းဆေးနတ်ဘုရား

ဘာသာပြန်သူ-ဖြိုးသူဝင်း

စာစဉ် (၁၄ )

Chapter-160

“ဘယ်လိုလဲ...အထင်သေးနေခဲ့တယ်ပေါ့ ဟုတ်လား…..”

နန်ဖိန်ဇီရိုက ပါးစပ်အဟောင်းသားဖြစ်နေသော စူးရီရှန်းကိုကြည့်၍ သူမကိုယ်တိုင်အဆင့်တက်သွားခဲ့သလို အလွန်ဝမ်းသာကျေနပ်နေခဲ့ပုံရပေသည်။

စူးရီရှန်းက အမှန်တကယ်စိတ်ရှုပ်ထွေးသွားခဲ့၏။

ယီယွမ်စုပ်ယူခဲ့သော ကိုယ်တွင်းစွမ်းအင်များက အခြားသူများထက် အဆပေါင်းများစွာ ပိုနေပေသည်။

ဤမျှ များပြားလှသော ကိုယ်တွင်းစွမ်းအင်ပမာဏဖြင့်ပင် သူ၏ဒန်တျန်က ပေါက်ကွဲထွက်ခြင်းမရှိခဲ့ပေ။

ယီယွမ်က မွေးလာတုန်းကတည်းက သာမန်လူတွေထက် အဆပေါင်းများစွာပိုပြီးကြီးမားတဲ့ ဒန်တျန်နဲ့မွေးဖွားလာခဲ့တဲ့ လူတစ်ယောက်လား…..

ဘယ်လိုဟာသမျိုးလဲကွာ…..

ဒီဟာကဂျီးနီးယပ်တစ်ယောက်မဟုတ်တော့ဘူး...လူထူးလူဆန်းတစ်ယောက်ဖြစ်သွားပြီ...ယီယွမ်ရဲ့အမူအရာကိုကြည့်ရတာ သူ့ရဲ့ဒန်တျန်က သူများတွေထက် အဆပေါင်းများစွာ ပိုပြီးကြီးမားတဲ့ပုံစံလည်း မပေါက်ပါဘူး…..

ဒါပေမဲ့ လောကကြီးကသူ့ကို ဘယ်လိုလုပ်ပေးလိုက်တာလဲ…..

“ဟေး...ယီယွမ်ဖြစ်ပေါ်စေခဲ့တဲ့ စိတ်ဝိညာဉ်အရည် ဘယ်နှစ်စက်ရှိမလဲဆိုတာ ခန့်မှန်းကြည့်ချင်လား...ငါခန့်မှန်းကြည့်ရတာ အဲဒါကခုနှစ်စက်ဖြစ်လိမ့်မယ်...ရှစ်စက်လည်း ဖြစ်ရင်ဖြစ်နိုင်တယ်…..”

ထိုစကားကိုကြားသော် အမြီးတက်နင်းခံလိုက်ရသော ကြောင်တစ်ကောင်ကဲ့သို့ စူးရီရှန်းက ထခုန်လိုက်ပေသည်။ “ရှစ်စက်ဟုတ်လား...ဘယ်လိုလုပ်ပြီးဖြစ်နိုင်မှာလဲ...ငါတို့ချင်နိုင်ငံကိုအသာထား ငြိမ်သက်တိမ်တိုက်အဖွဲ့ရဲ့ နယ်မြေဒေသတစ်ခုလုံးမှာ အမြင့်မားဆုံးမှတ်တမ်းက ခြောက်စက်ပဲ...ယီယွမ်က ဘယ်လောက်ပဲ မွန်းစတားဆန်နေပါစေ ခုနှစ်စက်ဆိုတာ အမြင့်ဆုံးပမာဏပဲ...ဘယ်လိုလုပ်ပြီး ရှစ်စက်က ဖြစ်နိုင်မှာလဲ…..”