ပြိုင်ဘက်ကင်းဆေးနတ်ဘုရား

Chapter 148

ပြိုင်ဘက်ကင်းဆေးနတ်ဘုရား

ဘာသာပြန်သူ-ဖြိုးသူဝင်း

စာစဉ် ( ၁၃ )

Chapter - 148

မျောက်ဝံဘုရင် က သူ၏ အပြုအမူအား ရပ်တန့်လိုက်မှုကို မြင်ခဲ့ရသော် ယီယွမ် က အကြီးအကျယ် စိတ်သက်သာရာ ရသွားသည့်ပုံဖြင့် သက်ပြင်းချလိုက်၏။ သူ၏ ခန္ဓာကိုယ်မှာ လူသေကောင်တစ်ယောက် ဖြစ်လုနီးပါး ခံစားနေခဲ့ရသည်။

သူက တစ်ချိန်လုံး ကြိုးစား၍ အားတင်းထားရသော်လည်း အဆင့်(3)မိစ္ဆာသားရဲ တစ်ကောင်၏ အော်ရာမှ ဖိအားက ဟာသတစ်ခု မဟုတ်ပေ။

ဤမျောက်ဝံဘုရင်က စူးယူဘိုင် ကဲ့သို့ စိတ်သလင်းဖြစ်တည်ခြင်းနယ်ပယ် တစ်ပိုင်းအဆင့် တစ်ကောင်မဟုတ်ပေ။ အဆင့်(3)မိစ္ဆာသားရဲ တစ်ကောင်ဖြစ်သည်။ လူသား စိတ်သလင်းဖြစ်တည်ခြင်းနယ်ပယ် အစစ်တစ်ယောက်နှင့် တူညီသော စွမ်းအားရှိပေ၏။

ယီယွမ် က မည်မျှပင် မွန်းစတားဆန်နေပါစေ အဓိကနယ်ပယ်ကြီး နှစ်ခုကို ဖြတ်ကျော်၍ သူ၏ ပြိုင်ဘက်ကို ရင်ဆင်တိုက်ခိုက်အနိုင်ယူရန်မှာ လုံးဝမဖြစ်နိုင်ပေ။

ချီစွမ်းအင်နယ်ပယ် သိုင်းပညာရှင်တစ်ယောက် ၏ တိုက်ခိုက်မှုက အဆင့်(3)မိစ္ဆာသားရဲ တစ်ကောင်ကို ခြိမ်းခြောက်နိုင်ခဲ့သည်ဆိုခြင်းကပင် ကောင်းကင်ဘုံ၏ အလိုကို ဆန့်ကျင်နေခဲ့ပြီး ဖြစ်သည်။

သူ၏ ဗလုံးပထွေး ပြောဆိုလိုက်မှုက ယီယွမ် အတွက် နောက်ဆုံး ဝှက်ဖဲ ဖြစ်ပေ၏။ အကယ်၍ ထိုဝှက်ဖဲကသာ ထိရောက်မှု မရှိခဲ့လျှင် သူက ဤနေရာတွင် သေဆုံးသွားရပေမည်။

သို့သော် ကံကောင်းထောက်မစွာဖြင့် ယီယွမ်၏ နှုတ်မှ ထွက်လာသော စကားများက မျောက်ဝံတစ်ကောင်ကို ဗျပ်စောင်းတီးပြနေသည့်ပုံစံမျိုး မဟုတ်ခဲ့ပေ။ ဤ မျောက်ဝံဘုရင် က ထိုစကားများကို အမှန်တကယ် နားလည်နေခဲ့သည်။

ယီယွမ်ပြောခဲ့သောစကားမှာ ယေဘုယျသားရဲဘာသာစကား ဖြစ်၏။ ထိုအရာကို မရေမတွက်နိုင်သော နှစ်ပေါင်းများစွာကတည်းက နတ်ဘုရားနိုင်ငံတော်၏  မိစ္ဆာမျိုးနွယ်စု ခွန်အားကြီးပုဂ္ဂိုလ်များက မိစ္ဆာမျိုးနွယ်စု တစ်ခုလုံးအတွက် ယေဘုယျသားရဲဘာသာစကား အဖြစ် စုစည်းသတ်မှတ်ပေးခဲ့ခြင်းဖြစ်သည်။ ရည်ရွယ်ချက် မှာ မိစ္ဆာမျိုးနွယ်စု များအကြားတွင် အချင်းချင်း ဆက်သွယ်ပြောဆိုနိုင်ရန် ဖြစ်၏။