Kwentong Kolehiyo

BAKIT KINAKALYO SI KUPIDO?

Ang puting pakpak, lumilipad

Ang puting pakpak, saan napadpad?

Nauubos, napupuno, napupuno ang talaan

Ang dami-dami ng mga pangalan

"Matapos akong mahulog,

Puso ko'y unti-unting nadurog

Ang akala ko noon SIYA NA

NASAAN na ang FOREVER niya?"

Bakit kasi nagmamadali?

Forever na agad ang hinihingi

Ate, aral-aral din muna

Para naman magulang mo'y matuwa

Napapano, anong nangyayari?

Napapano, ang daming humihingi?

Napakadaming kabataan

Ang naghahanap ng kasintahan

Nakakapagod, nakakagago

Nakakapagod, nakakaloko

Hindi ako Diyos, 'di rin ako santo

Ako'y munti, ako lang si Kupido

"Kupido, naghihintay ako

Bakit ang tagal ng Soulmate ko?

Hindi ko kayang mag-antay

Hanggang sa dulo ng habang buhay"

Tignan mo nga naman ang isang ito

Atat na atat na makuha ang gusto

Pag-ibig na agad ang inaatupag

Sa pag-aaral ay walang kasipag-sipag

Love, Pag-ibig, Romance, LOVE ulit

Trabaho ko'y nakakasawa dahil paulit-ulit

May mga kabataang nadadapa sa maling akala

Sa pagmamadali, ayan tuloy, nadidisgrasya!

Sandata ko'y nagsisilbing instrumento

Gamit ang aking gintong palaso,

Matatamaan ang puso mo,

Sa isang pitik ng panang hawak ko

Ako'y munti, ako si Kupido, laging nilalapitan

Ng mga naghahangad ng pag-ibig na pangmatagalan

Pero sana'y subukan akong intindihin

Si munting Kupido ay napapagod din

Sa palaging pagptik ng aking mga daliri sa pana

Pakapal ng pakapal ang balat na sawa na

Tanggap ko, ito ang aking tadhana, 

wala na akong magagawa

Tignan mong mabuti ang aking mga kamay

Sa pagitan ng mga daliri ay balat na namamatay

Ang balat na 'yan ay KALYO kung tawagin

Iyong ipagpaumanhin, ako'y nasusugatan din

Hiling ko lang ay wag magmadali

Ang mga kabataang "sparks" ang hinihingi

Paniwalaan mo ako, darating ang pagkakataon

Ako mismo ang magtatagpo sainyo, sa tamang panahon

Sana'y patawarin niyo ako

Dahil minsan ay nagrereklamo

Magkakalyo man ako ng paulit-ulit

Basta may napapasaya, pagod ko'y nasusulit

Ang puting pakpak, lumilipad

Ang puting pakpak, saan napadpad?

Tandaan na ako'y laging nasa serbisyo

Hanggang sa muli, ako si munting Kupido

My-screen-doesn't-have-a-name 

2014 

Faculty of Arts and Letters