၅၇၆။ ရောင်းရင်းကျောင်းသားကို သတ်ဖြတ်သူ-၄
နင်ရှင်းက သူ့ကိုယ်သူ လွန်လွန်ကဲကဲ မှတ်ထင်ထားတာ မဟုတ်လျှင်, ဒါက ဂျန်ဝုရှီအား နင်ရှင်း လုံးဝ အထင်သေးနေတာဟု ဆိုလိုသည်။
သူမအား ဆန့်ကျင်တိုက်ခိုက်ရန် ကြံစည်အားထုတ်နေတာလား။ နင်ရှင်း ထိုလို ဦးနှောက်မျိုး မပိုင်ဆိုင်ချေ။
ငါးရက်ကြာရင်, သူ ကိုယ့်ကိုယ်ကိုတောင် အားကိုးလို့ မရတော့ဘူးဆိုတာကို သိအောင် လုပ်ပေးရမှာပေါ့။ ဂျန်ဝုရှီက လက်ဖက်ရည်ခွက်ကို သူမရှေ့ရှိ စားပွဲပေါ်သို့ အသာအယာ ချကာ ပြောသည်။
လူတွေက သူမထံမှ သေခြင်းတရားကို လာရှာကြလျှင်, သူမက မည်သို့မျှ အကြောင်းပြချက် ရှာပြီး လွှဲဖယ်နေရမည်နည်း။
ဂျန်ဝုရှီ လေညင်းကျောင်းတော်သို့ ရောက်ပြီး သုံးရက်ရှိနေပြီ။ ကျောင်းတော်အတွင်း ကောလာဟလများက ရပ်စဲမသွားပေ။ တစ်ချို့ကျောင်းသားများက ဝါးတောအုပ် တံခါးဝအထိ လာရောက်ကြပြီး အတွင်းသို့ ခဲများဖြင့်ပင် ပေါက်ကြသည်။ ထိုခဲအားလုံးက ဂျန်ဝုရှီနေထိုင်သော ဝါးအိမ်လေး၏ အခန်းသို့ ဦးတည်သည်။
အကြိမ်အတော်များများ ဖန်ဇို ထွက်လာပြီး ထိုကျောင်းသားများအား အနှောင့်အယှက်မပေးဖို့ ကောင်းကောင်းမွန်မွန် ပြောဆိုပြီး ပြန်နှင်ထုတ်သည်။
တချို့ ဆရာများသည်ပင် အတူတူ ပူးပေါင်း၍ ခေါင်းအုပ်ပြီး ဝေဖန် ပြစ်တင်ကြသည်။ သွင်ပြင်အရ ထိုဆရာများက သားရဲဝိညာဉ်ဌာနမှ ဆရာများ ဖြစ်ကြသည်။ ထိုသို့ ဖြစ်ခြင်းက ဂျန်ဝုရှီ တစ်ကြိမ် အတန်းတက်ခဲ့တုန်းက တွေ့ခဲ့ဖူးသော ချင်းယန်ဟဲမှ အရင်းခံသည်။
တပည့်တစ်ယောက် ချင်းယန်ဟဲထံ သွားပြီး ထိုအတန်းတက်တုန်းက ဂျန်ဝုရှီ၏ စရိုက်လက္ခဏာနှင့် ပတ်သက်ပြီး ထင်မြင်ချက်ကို မေးမြန်းခဲ့သည်။
ချင်းယန်ဟဲက ဂျန်ဝုရှီကို ခေါင်းစ ခြေဆုံး အဆုံးမရှိ ပက်ပက်စက်စက် ပြစ်တင်ဝေဖန်ပြသည်။ ထိုလို ကောင်မျိုးကို တပည့်တစ်ယောက်အနေဖြင့် သင်ပြပေးရတာ သူ့ဘဝမှာ နောင်တအရဆုံးဟူ၍ပင် သူက ပြောလိုက်သေးသည်။
