၆၆၃။ ချောက်နက် အောက်ခြေမှာ (၁)
တိုက်ခိုက်လာသော လေက အလွန် ပြင်းထန်သော အဟုန်ရှိပြီး စွမ်းအားပြင်းထန်သော လေပြင်း ဖြစ်သည်။ ဂျန်ဝုရှီက ကြိုးမှာ ဆိုင်းထားရင်း ယမ်းခါသွားသည်။ သူမ တတ်နိုင်သမျှ အကုန်က သူမခန္ဓာကိုယ်ကို ကြိုးမှာ ခိုင်ခိုင်မာမာ ချိတ်ဆွဲထားခြင်းသာ ဖြစ်သည်။ သူမ၏ ခန္ဓာကိုယ်တစ်ခုလုံးကို ချောက်နံရံမျက်နှာပြင်တွင် ကန်ထားသော ခြေထောက်ကို ဗဟိုပြုထားလိုက်သည်။
ရုတ်တရက် အေးစက်၍ ထူးဆန်းသော လေက အတော်ကြာအောင် တိုက်ခိုက်သွားပြီးနောက် ရပ်တန့်သွားသည်။ သို့သော် မကြာခင်မှာပင် ထိုလေပြင်းက နောက်တစ်ကြိမ် တိုက်ခိုက်လာပြန်သည်။
၎င်းလေပြင်းက တိကျသော စည်းချက်လည်းမပါ, ပုံစံကွက်လည်း မရှိဘဲ သူတို့အားလုံးကို ကလော်ထုတ်၍ အသူတရာနက်သော ချောက်နက်ထဲသို့ ပြုတ်ကျရန် ရည်ရွယ်တိုက်ခိုက်နေပုံရသည်။ သူတို့အားလုံး အစောကတည်းက ပင်ပန်းနွမ်းနယ်နေခဲ့ပြီး ဖြစ်သည်။ လေပြင်းက နောက်ထပ် သူတို့အားလုံးအတွက် ပြင်းထန်၍ မခံမရပ်နိုင်ဖြစ်သော အတားအဆီးတစ်ခု ဖြစ်လာသည်။
(သူတို့ အရှိန်မြှင့်ဖို့ လိုအပ်လာလေပြီ။)
ဂျန်ဝုရှီက အသက်ပြင်းပြင်း ရှိုက်လိုက်သည်။ လုံခြုံစိတ်ချရမှုမရှိသော, စိုစွတ်၍ ချောနေသော ချောက်နက် မျက်နှာပြင်နှင့် ရင်ဆိုင်နေရသည့် အပြင်, အေးစက်၍ နိမ့်လွန်းသော အပူချိန်နှင့်ပါ သူတို့ ရင်ဆိုင်နေရသည်။ ထို့ပြင် ရေခဲလွှာ ကပ်လာသော ကြိုးကို ထိန်းသိမ်းနေရပြန်သဖြင့် သူတို့၏ ဝိညာဉ်စွမ်းအားများက မြူထုထဲတွင် အဆက်မပြတ် ပျောက်လွင့်လာလေ၏။
အခုတစ်ဖန် အပြောင်းအလဲ မြန်သော လေပြင်းက ကြိုးများမှာ တဲတဲလေးမျှ ဆွဲချိတ်နေရသော သူတို့အား ခွာထုတ်ပစ်ရန် ကြိုးစားနေပြန်သည်။ သူတို့အားလုံး အသည်းအသန် ဖြစ်လာသည်။ သူတို့ မယုံကြည်နိုင်လောက်အောင် စိတ်ဖိစီးလာကြသည်။
သဘာဝဘေးရန်က အဆက်မပြတ် မညှာမတာ သူတို့အား နှိပ်စက်လာသည်။ ဂျန်ဝုရှီ၏ စိတ်က သူ့အတိုင်းအတာကို ဆွဲဆန့်လိုက်သည်။
