၆၈၃။ အပြန် ခရီး (၁)
ထိုအခိုက်မှာ ဖြစ်ပျက်ခဲ့သမျှ အရာရာကြောင့် ဂျန်ဝုရှီက စိတ်ပျက်ဝမ်းနည်းခြင်းကို နည်းနည်းလေးမျှ မခံစားရပေ။ သူမက ရှင်းလင်းသော မိုးကောင်းကင်ကို ကြည့်ချင်ရုံ, သူမအပေါ် ကျဆင်းနေသော နွေးထွေးသော နေရောင်ကို ခံစားချင်ရုံသာ ရှိသည်။
သူမမျက်လုံးများ နေရောင်ကြောင့် စူးရှရှ ဖြစ်လာတော့မှ မျက်လုံးများ လွှဲဖယ်၍ ခေါင်းငုံ့ကာ သူမဝတ်ဆင်ထားသော ငွေရောင်လက်စွပ်ကို ကြည့်လိုက်သည်။
ထိန်လင်းသော နေရောင်အောက်တွင် ငွေရောင် လက်စွပ်က တဖျတ်ဖျတ် လင်းလက်လို့နေသည်။
မြင်းဆွဲရထားလုံးကို သူတို့ နောက်တစ်ကြိမ် စီးနင်းကြသည်။ မြင်းဆွဲရထားကို သူတို့ စီးနင်းလိုက်သည်နှင့် အလွန်ကြာညောင်းစွာ မစီးနင်းခဲ့ရသော ရထားကို စီးနင်းလိုက်ရသလို သူတို့ ခံစားချက်ဝင်သွားသည်။
ရထားလုံးကို စီးနင်းသည့် ပထမနေ့မှာ သူတို့အားလုံး ရထားလုံးကို လေးလံစွာ မှီ၍ နှစ်ခြိုက်စွာ အိပ်ပျော်သွားကြသည်။ အန္တရာယ်နှင့် မလုံခြုံမှုကို မခံစားရတော့သဖြင့် နောက်ဆုံးတွင် သူတို့အားလုံး ငြိမ်းချမ်းစွာ အနားယူ အိပ်စက်နိုင်သွားကြသည်။
ရထားလုံးက လမ်းကြမ်းကြောင့် တဂျုန်းဂျုန်း ခုန်၍ လှုပ်နေသော်လည်း သူတို့၏ အနားယူခြင်းကို အနှောင့်အယှက် မဖြစ်စေခဲ့ပေ။ သူတို့အားလုံး အိပ်မက်ကောင်းများကိုပင် မက်နေကြသည်။
နောက်ရက်များမှာ ဂျန်ဝုရှီက သူမ၏ ဝိညာဉ်စွမ်းအားကို ခရမ်းရောင်အဆင့်သို့ ယာယီ မြှင့်တင်ဖို့ ကြိုးစားခြင်းကို မရပ်မနား လေ့ကျင့်သည်။ ကျောက်ချူတို့က ဘေးနားမှာ နေ၍ သူမကို နည်းပြကြသည်။ သူမ အဆင်ပြေပြေ တိုးတက်လာပြီး သူမ၏ စွမ်းရည်အသစ်မှာ အလွန်အသားကျလာသည်။
သို့သော် တစ်ချက်တော့ ရှိသည်။ ဂျန်ဝုရှီ၏ ခရမ်းရောင်အဆင့်သို့ ယာယီမြှင့်တင်၍ ထိန်းထားနိုင်သော အချိန်က အလွန် တိုတောင်းသည်။
ခရမ်းရောင်အဆင့်သို့ မြှင့်တင်ဖို့ သူမမှာ ရှိသမျှ ဝိညာဉ်စွမ်းအားများ အားလုံးကို အမြန်ဆုံး နှုန်းထားဖြင့် လောင်ကျွမ်းပစ်ဖို့ လိုအပ်သည်။ ဝိညာဉ်စွမ်းအားကို အဟုန်ပြင်းပြင်းဖြင့် တွန်းထုတ်နိုင်ပါမှ မတူကွဲပြားသော အဆင့်သို့ ရောက်ရှိနိုင်သည်။ ရလဒ်အနေဖြင့် သူမ၏ ဝိညာဉ်စွမ်းအားများ အမြန်အဆန် ကုန်ဆုံးလာသဖြင့် အတော်ကြာကြာ သူမ ထိန်းမထားနိုင်ပေ။
