၅၁၆။ ဇွဲကောင်းစွာ လိုက်လာသူ-၇
ဆီးနှင်းကြာပန်းလေး ပေးစွမ်းနိုင်သော အကျိုးဆက်ကို ဂျန်ဝုရှီသည်ပင် မတွေးတောမိပေ။
သိုးငယ်လေး ပြောသော စကားကို ကျောက်ချူတို့အုပ်စု နားမလည်ကြချေ။ ထို့ပြင် ကြောင်နက်လေး ပြောတာကိုလည်း နားမလည်ကြချေ။ ထို့ကြောင့် သူတို့က ဂျန်ဝုရှီကို မျက်တောင်မခတ်တမ်း ကြည့်နေကြသည်။ သူမ ရှင်းပြမှာကို စောင့်ဆိုင်းနေကြသည်။
ဂျန်ဝုရှီက ရွေးချယ်စရာ မရှိတော့မူ၍ သိုးငယ်လေး ပြောစကား၏ ဆိုလိုရင်းကို အကျဉ်းချုပ် ရှင်းပြသည်။
ဒါဆို ငါတို့နဲ့ တိုက်ခိုက်နေတုန်း ရုတ်တရက် ထွက်ပြေးသွားတာက, ရှီလေးကြောင့်ပေါ့ ကျောက်ချူက သူ့မေးစေ့ကို ပွတ်သပ်လျက် မေးသည်။ ထိုစဉ်တုန်းက ဒီလောက် အားကောင်းသော ကာကွယ်သူအဆင့် လိပ်ပြာသားရဲကြီးက ဘာ့ကြောင့် အလျင်အမြန် ဆုတ်ခွာ ထွက်ပြေးရသလဲ, သူ အံ့ဩခဲ့သည်။
သိုးငယ်လေးက ဝိညာဉ်အသိဉာဏ်အဆင့်ကို ပိုင်ဆိုင်ထားသည်။ ထို့ကြောင့် ကျောက်ချူ ပြောစကားကို နားလည်သည်။ သူက ရှက်ရွံ့စွာ ခေါင်းငုံ့ထားလိုက်သည်။ သူက အနည်းငယ် ရှက်မိသည်။ သူက သူ့ရှေ့ခွာဖြင့် မြက်များကို ရှပ်နေ၏။
(တကယ်တော့ အဲတုန်းက ထွက်ပြေးခဲ့တာက... နာကျင်တာက ကြောက်စရာကောင်းလို့လေ...)
(ဒါပေမဲ့ ဒါက လျှို့ဝှက်ချက်ပေါ့၊ ဘာဖြစ်ဖြစ် ဘယ်သူ့ကိုမှ မပြောပြဘူး။)
(ဟမ့်)
(တစ်လုံးမှကို မပြောဘူး)
ပဲဟ်ဟ်ဟ်, ပဲဟ်ဟ်ဟ်... သိုးငယ်လေးက ဂျန်ဝုရှီကို မော့ကြည့်သည်။ သူ့မျက်လုံးများက တင်းမာ ပြတ်သားပုံပေါ်နေသည်။
(ငါ ကနေ့က စပြီး နင့်နောက်မှာ ကပ်လိုက်နေမှာနော်။)
ကြောင်နက်လေး၏ နှုတ်ခမ်းများ တွန့်သွားသည်။ သူက သိုးငယ်လေး၏ စကားကို အပြည့်အဝ ဘာသာပြန်ပေးသည်။
ဂျန်ဝုရှီက တိတ်ဆိတ်သွားသည်။ သို့သော် ရွေးချယ်မှုလည်း မလုပ်သလို ငြင်းပယ်မှုလည်း မလုပ်ချေ။ သူမက သိုးငယ်လေးကို ကြည့်လိုက်သည်။ လက်ခံရမလား, ငြင်းပယ်ရမလား သူမ ချင့်ချိန်စဉ်းစားနေသည်။
